ArmSport-ը շարունակում է ներկայացնել այն հայ ֆուտբոլիստներին, ովքեր ձմեռային տրանսֆերային պատուհանի ընթացքում խզել են պայմանագիրը և ազատ խաղացողի կարգավիճակում են:
Էդգար Մանուչարյան. դիրքը՝ հարձակվող, տարիք՝ 33
Հայկական ֆուտբոլի երբեմնի ամենավառ կերպարներից մեկը ազատ խաղացողի կարգավիճակում է: Էդգարը «Ալաշկերտից» է տեղափոխվել «Փյունիկ», որի կազմում անցկացրեց մրցաշրջանի առաջին հատվածը: Ճիշտ է՝ Մանուչարյանը շատ քիչ խաղաց. ընդամենը 3 հանդիպում, սակայն պետք է հաշվի առնել երևանյան թիմում առկա բարձր մրցակցությունը:
Մանուչարյանի փորձը կարող է օգտակար լինել ընթացիկ առաջնությունում մեծ հավակնություններ ունեցող թիմերի համար: Մամուլում լուրեր էր տարածվել, որկ Մանուչարյանը մարզվում է Երևանի «Արարատի» հետ, սակայն ակումբի մամուլի ծառայությունից հերքեցին դա:
Ղուկաս Պողոսյան. դիրքը՝ կիսապաշտպան, տարիքը՝ 25
«Փյունիկի» սանը բավականին երկար ժամանակ է «Ալաշկերտում» էր և համարվում էր թիմի առանցքային ֆուտբոլիստներից մեկը: Սակայն ԲԽ-ի ընթացիկ առաջնության առաջին հատվածը արդյունավետ չստավեց Ղուկասի համար. 6 խաղ և ոչ մի արդյունավետ գործողություն:
«Ալաշկերտի» կազմում Պողոսյանը աչքի է ընկել մի շարք անհավանական գոլերով: Նրա գլխավոր առավելությունը հարվածների ուժգնությունն է. ամենաանհավանական դիրքերից այս ֆուտբոլիստը կարող է խոցել մրցակցի դարպասը: Ղուկաս Պողոսյանը արդեն փորձառու է և նա, առաջատարի որակները օգտագործելով, կարող է կամային հատկանիշներ ավելացնել հայկական յուրաքանչյուր թիմի:
Անդրանիկ Ոսկանյան. դիրքը՝ պաշտպան, տարիքը՝ 29
Հայ ամենափորձառու ֆուտբոլիստներից մեկը խզել է պայմանագիրը «Ուրարտուի» հետ, ուր վերադարձել էր «Ալաշկերտից»: «Ուրարտուի» կազմում Անդրանիկը ամրապնդվել չկարողացավ. մասնակցեց Եվրոպա լիգայի խաղարկության «Չուկարիչկիի» դեմ հանդիպումներին, մեկ անգամ էլ փոխարինման մտավ ԲԽ-ի առաջնության խաղում:
Ոսկանյանը մշտապես աչքի է ընկել կայուն խաղով: Նա պաշտպան է, ով բավականին քիչ է սխալվում, դիրքային պայքարում հստակ է և լավ է գործում 2-րդ հարկում: Բարձրագույն խմբի առաջնություններում մոտ 10 տարվա փորձը Անդրանիկին թույլ կտա կարիերայի վերջին փուլն անցկացնել բարձր մակարդակով:
Գագիկ Մաղաքյան. դիրքը՝ պաշտպան, տարիքը՝ 23
Մաղաքյանը «Ուրարտուի» սան է, նախորդ տարվա ամռանը տեղափոխվել է «Գանձասար-Կապան, որի կազմում ընդամենը 2 հանդիպման է մասնակցել:
Տարբեր տարիքային հավաքականներում Գագիկը լավ փորձ է կուտակել, ուստի հասուն և հիմնային ֆուտբոլ ցուցադրելու ժամանակն է: Կարևորն այն է, որ ֆուտբոլիստը կարողանա իր կարիերային հարմար թիմ գտնել և ստանալ բավարար խաղաժամանակ: Ըստ մեր տեղեկությունների` նա մարզվում է «Սևանում»:
Առաջին մասն՝ այստեղ:
Արման Առաքելյան
