Մեկ մրցաշրջանի ընթացքում ավելի շատ գոլ խփել քան Արա Հակոբյանը չի հաջողվել ոչ մեկին անկախ Հայաստանի պատմության ողջ ընթացում։ 2003 թվականին Արա Հակոբյանը «Բանանցի» (ներկայիս «Ուրարտու») կազմում 24 խաղում 45 գոլ խփեց, սահմանեց մի ռեկորդ, որն արդեն 17 տարի է անգերազանցելի է։
«Իրականում այդքան էլ մոտ չէի «Ոսկե խաղակոշիկը» ստանալուն։ Եվրոպական թոփ-առաջնություններում խփված մեկ գոլը 2 միավոր էր հաշվարկվում։ Իսկ մեր առաջնության մակարդակը ցածր էր. մեկ գոլը մեկ միավոր էր: Այդ տարի Թիերի Անրին 30 գոլ խփեց ու 60 միավորով հենց նա դարձավ «Ոսկե խաղակոշիկի» դափնեկիրը։ Ես 5-րդ կամ 6-րդ հորիզոնականում էի, արդեն չեմ հիշում»,- «Ուրարտուի» մամուլի քարտուղարության հետ զրույցում պատմել է Արա Հակոբյանն ու հույս հայտնել, որ «Ուրարտուի» ֆուտբոլիստներից մեկը կգերազանցի իր ռեկորդը:
«Կարծում եմ՝ իմ ցուցանիշը երբևէ չի գերազանցվի, չնայած ինքս շատ կցանկանամ, որ «Ուրարտուի» ֆուտբոլիստներից որևէ մեկը հասնի, անգամ գերազանցի այդ ցուցանիշը։ Վերջին ժամանակներում ցածր արդյունավետություն է նկատվում։ Այսօր բոլորն ավելի կենտրոնացած են պաշտպանության վրա։ Չնայած միայն մեզ մոտ է այդպես, եվրոպական թոփ-առաջնություններում, անգամ Ռուսաստանում արդյունավետությունը գնալով աճում է»,- ասել է Արա Հակոբյանը:
Արա Հակոբյանը նաև պատմել է, որ Հայաստանի ազգային հավաքականի նախկին ֆուտբոլիստ ու մարզիչ Արթուր Պետրոսյանի միջնորդությամբ կարող էր հայտնվել շվեյցարական «Ցյուրիխում».
«Ցավոտ հարցի եք անդրադառնում, որովհետև այդ տարիներին չկար ֆուտբոլային այն աժիոտաժը, որը կա հիմա։ Արտասահմանից քչերն էին հետաքրքրվում հայկական ֆուտբոլով ու քչերը գիտեին նման արդյունավետության մասին։ Եթե այդ ամենը հիմա լիներ, ապա ամեն ինչ ավելի հնչեղ կլիներ ու բնականաբար այդ փաստը ավելի մեծ ակումբների կհետաքրքրեր։ «Բանանցից» հետո տեղափոխվեցի Դոնեցկի «Մետալուրգ», բայց այնպես չէր, որ միանգամից պայմանագիր ստորագրեցի, գնացի ու մոտ 1,5 ամիս փորձաշրջան անցա: «Մետալուրգն» ինձ համար լավ թիմ էր, որտեղ իմ խաղընկերները Յայա Տուրեի ու Գեորգի Դեմետրաձեի նման բարձր խաղամակարդակ ունեցող ֆուտբոլիստներն էին։
Իհարկե, կարող էի ավելի բարձրակարգ ակումբներում խաղալ, Արթուր Պետրոսյանի միջնորդությամբ կարող էի հայնտվել շվեյցարական «Ցյուրիխում», բայց, ցավոք, չստացվեց։ Շատ ուրախ եմ նաև, որ խաղացել եմ Հայաստանի ազգային հավաքականում։ Հավաքականի կազմում 7 գոլ եմ խփել ու այդ կերպ կարողացել եմ ուրախացնել մեր ժողովրդին»,- ասել է Արա Հակոբյանը:
Արա Հակոբյանի հետ հարցազրույցն ամբողջութամբ՝ կարող եք կարդալ «Ուրարտուի» պաշտոնական կայքում:
