Համաշխարհային մարզական մամուլում օգոստոսի 25-ի երեկոյան մի իսկական «ռումբ» պայթեց։ Հայտնի դարձավ, որ «Բարսելոնայի» ավագ, առաջատար, բոլոր ժամանակների լավագույն ռմբարկու ու ակումբի լեգենդ Լիոնել Մեսսին ֆաքսի միջոցով հայտնել է ակումբի ղեկավարությանը, որ ցանկանում է հեռանալ թիմից։
Ինչու՞
«Բարսելոնան» ոչ թե անդունդի եզրում է, այլ հենց անդունդում։ Չեմպիոնների լիգայի քառորդ եզրափակչում «Բավարիային» 2-8 հաշվով պարտությունը վերջին էպիզոդն էր կատալոնական ակումբի սարսափ ժանրի սերիալում։ «Ռոմայի» ու «Լիվերպուլի» դեմ խաղերում նախորդ 2 տարիներին ունեցած առավելությունը կորցնելուց հետո պարտությունների կողքին իր դառնությամբ կանգնեց ամենասարսափելին։
Դա իսկապես հատակն էր։ Այդպես ասաց նաև Պիկեն։ Բայց ինչու՞ է Մեսսին ուզում լքել «խորտակվող» նավը։ Արգենտինացի հարձակվողը մեծ հաշվով ապացուցելու ոչինչ չունի։ Նա խաղում է «Բարսելոնայում» ողջ կյանքը։ Հաղթել է հնարավոր ու անհնարին ցանկացած տիտղոս, «Ոսկե գնդակի» վեցակի դափնեկիր է, ու այդ ամենը՝ կատալոնական թիմում։
Մեսսիի հարաբերությունները լավ չեն ակումբի ղեկավարության հետ։ Երեկ հայտնի դարձավ, որ արգենտինացի լեգենդի հետ «կոշտ» զրույց է ունեցել նաև նորանշանակ գլխավոր մարզիչ Ռոնալդ Կումանը։ Նա ուղիղ տեքստով ասել է Մեսսիին, որ հանդերձարանում չեն լինելու արտոնյալներ։ Մեսսին վերջին տարիներին իրոք այդպիսիսնն էր, ու դա գաղտնիք չէ ոչ ոքի համար։ Այս ամենի մեջ գուցե Մեսսին չի կարողանում գտնել անհրաժեշտ մոտիվացիան, որով իր կյանքի թիմին կվերադարձնի բարձունքներ, որտեղ նրանք արգենտինացու հետ ոչ մեկ անգամ են եղել։
Նոր մարտահրավե՞ր
Մեսսին գուցե փնտրում է նոր արկածներ։ Ամեն դեպքում անընդհատ նույն բանը նույն տեղում անելը գուցե ձանձրացնի անգամ հենց Մեսսիին։ Գուցե Մեսսին զգում է, որ ակումբի մոտալուտ սերնդափոխության ծրագրերում պետք է ազատել անվիճելի առաջատարի ու միայնակ խաղեր հաղթողի տեղը։ «Բարսելոնային» գուցե արդեն թիմ է պետք, ոչ թե անվիճելի առաջատար։
Առաջին արձագանքներ
Աղմուկը թերևս այս աստիճան թափ չէր հավաքի, եթե Մեսսիի՝ «Բարսելոնան» լքելու ցանկության վերաբերյալ լուրից րոպեներ անց Twitter-ում գրառում չկատարեր Կառլես Պույոլը։ «Բարսելոնայի» նախկին ավագի «կրակոտ» գրառման վրա իր մեկնաբանությամբ «յուղ լցրեց» Լուիս Սուարեսը։
Twitter-ի իր էջում Մեսսիին հրաժեշտի նամակ գրեց նաև Կատալոնիայի առաջնորդը։ Կիմ Տորան շնորհակալություն է հայտնել Մեսսիին արտակարգ ֆուտբոլի ու պարգևած երջանկության համար։ Կատալոնիայի կառավարության ղեկավարի խոսքով՝ նրանք հաջողակ են եղել, որ այս տարիներին աշխարհի լավագույն ֆուտբոլիստը եղել է իրենց հետ։
«Կատալոնիան միշտ լինելու է քո տունը»,-գրել է Տորան։
Catalunya serà sempre casa teva. Moltes gràcies per tots aquest temps de felicitat i d’un futbol extraordinari. Hem tingut la sort de compartir uns anys de les nostres vides amb el millor jugador del món. I un noble esportista No t’oblidarem mai. Leo Messi, Creu de Sant Jordi. pic.twitter.com/Ojev577MoE
— Quim Torra i Pla (@QuimTorraiPla) August 25, 2020
Բողոքի ակցիաներ Կատալոնիայում
Եթե Կատալոնիայի ղեկավարը շտապեց հրաժեշտի նամակ գրել Մեսսիին, ապա «կապտանռնագույնների», կամ որ այս դեպքում առավել դիպուկ է ասել, Մեսսիի երկրպագուները որոշեցին իրենց բողոքի ձայնը բարձրացնել։ Շատ պարզ․ նրանք պահանջում են Բարտոմեուի հրաժարականը։ Եվ իսկապես․ եթե Բարտոմեուն հեռանա, գուցե Մեսսիի հրաժեշտը այս տարի չկայանա։
Իրավական հարցեր ու «Բարսելոնայի» պատասխանը
Մի շարք իրավաբաններ, ֆուտբոլային ակումբների նախկին տնօրեններ սկսեցին գրել այն մասին, որ Մեսսին այս տարի չի կարող հեռանալ։ Դրանք իրավական գործընթացներ են, որոնք անհնար են դարձնում Մեսսիի տեղափոխությունը այլ թիմ։
Այդ պատճառով «Բարսելոնան» ժողով է արել ու պատասխան ֆաքս ուղարկել Լեոյին՝ հայտնելով, որ ցանկանում են նրան պահել թիմում մինչև կարիերայի ավարտը։ Ի դեպ, այդ ժողովի ընթացքում տնօրենների խորհրդի անդամներից ոմանք պահանջել են Բարտոմեուի հրաժարականը։
Ավարտենք հումորով։ Բազմաթիվ արձագանքների մեջ առանձնացավ նաև Ֆորմուլա 1-ի առաջատար թիմի՝ «Մերսեդեսի» զվարճալի լուսանկարը։ «Մերսեդեսը» հրավիրում էր Մեսսիին տեղափոխվել Մեծ Բրիտանիայի Բրեքլի քաղաք, որտեղ գտնվում է թիմի ավտոմոբիլային գործարանը, ու թերևս փոխել մարզաձևը։
— Mercedes-AMG F1 (@MercedesAMGF1) August 25, 2020
Արամ Սահակյան
