Սեպտեմբերի 30-ին կայացավ «Յուվենտուսի» հայաստանյան ակադեմիայի պաշտոնական բացման արարողությունը։ Ներկա էին ՀՖՖ նախագահ Արմեն Մելիքբեկյանը, Երևանի քաղաքապետ Տիգրան Ավինյանը, ՀՀ ԿԳՄՍ նախարար Ժաննա Անդրեասյանը, ՈՒԵՖԱ-ի գլխավոր քարտուղար Թեոդոր Թեոդորիդիսը, «Յուվենտուսի» գլխավոր բիզնես տնօրեն Պետեր Սիլվերստոնը, ակումբի լեգենդ Ֆաբրիցիո Ռավանելլին և այլ հյուրեր։ Այս մասին հայտնում է ՀՖՖ-ի մամուլի ծառայությունը։
Բացման արարողությունը մեկնարկեց ակադեմիայի Ավան մարզաբազայում։ Հյուրերը շրջեցին մարզաբազայում, ծանոթացան կատարված աշխատանքներին, ենթակառուցվածքներին և հետևեցին երեխաների մարզումներին։ Ավանի մարզաբազան ներառում է մարզիչների և դրա կարիքն ունեցող երեխաների համար նախատեսված կացարան, մարզասրահ, բժշկական հետազոտությունների և վերականգնողական գոտիներ, նորագույն տեխնոլոգիաներով հագեցած վերլուծության սենյակ, խանութ-սրահ և այլ ենթակառուցվածքներ։ Շինությունը կառուցվել է ժամանակակից «կանաչ շենքերի» ստանդարտներին համապատասխան։
Այնուհետև հյուրերն այցելեցին Կոտայքի մարզի Նոր Հաճն համայնք՝ որտեղ տրվեց երրորդ մասնաճյուղի և սպորտային թաղամասի շինաշխատանքների մեկնարկը։
Օրվա երկրորդ հատվածում տեղի ունեցավ ՈՒԵՖԱ 2-րդ կատեգորիայի ստանդարտներին համապատասխանող Freedom Arena-ի և «Կենտրոն» մարզաբազայի բացման հանդիսավոր արարողությունը։ Բացի ֆուտբոլային հանդիպումներից, Freedom Arena-ում հնարավոր կլինի անցկացնել սպորտային և այլ միջոցառումներ։ Մարզադաշտը կունենա շուրջ 2000 նստատեղ։ Սպորտային համալիրի տարածքում կգործի նաև Հայաստանում առաջին մասնագիտացված սպորտային-բժշկական կլինիկան և վերականգնողական կենտրոնը՝ Medicina Dello Sport:
«Առաջին հերթին շնորհավորում եմ բոլոր նրանց, ովքեր ներգրավված են եղել «Յուվենտուսի» հայաստանյան ակադեմիայի բացման գործընթացում։ Սա ՀՀ Կառավարության, ՀՖՖ-ի, մասնավոր ներդրողների և ՈւԵՖԱ-ի մեր գործընկերների գործակցության հիանալի օրինակ է։ Այսօրվա տեսածը պարզապես գերազանցեց մեր սպասելիքները։ Հայաստան է գալիս հարուստ ավանդույթներ ու սեփական դպրոց ունեցող ակումբ, ինչը նոր մեթոդաբանություն կբերի մեր երկիր և կնպաստի հայկական ֆուտբոլի զարգացմանը։ Կարծում եմ՝ սա դեռ սկիզբն է, և հաջորդ տարիներին մենք կունենանք նոր, նույնքան կարևոր նախաձեռնություններ», — ասել է ՀՖՖ նախագահը։
«Յուվենտուսի» հայաստանյան ակադեմիայում արդեն մարզվում են հարյուրավոր երեխաներ։ Նրանց հետ աշխատում է «Յուվենտուսի» համակարգից ժամանած 15 օտարերկրյա մարզիչ, որոնք Հայաստան են բերել ակումբի ժամանակակից մարզչական մեթոդաբանությունը և գիտելիքահեն մոտեցումը։ Հարյուրավոր սաներ արդեն մասնակցում են Հայաստանի մանկապատանեկան առաջնություններին։ Ակադեմիայի լավագույն սաները հնարավորություն կունենան մեկնելու Թուրին՝ «Յուվենտուսի» մայր ակադեմիա, մասնակցելու «Յուվենտուսի» ակադեմիաների աշխարհի առաջնությանը։
