Կատալոնական «Բարսելոնան» Ռոբերտ Լևանդովսկու հեռանալուց հետո շարունակում է նոր կենտրոնական հարձակվողի փնտրտուքները, հաղորդում է Bild-ը։
Ըստ աղբյուրի տեղեկությունների՝ «Բարսելոնայի» մարզական տնօրեն Դեկուն դիտարկել է Դորտմունդի «Բորուսիայի» հարձակվող Սերու Գիրասիին ձեռք բերելու տարբերակը։ Կատալոնական ակումբի ներկայացուցիչները հարցում են արել Գվինեայի հավաքականի 30-ամյա հարձակվողի վերաբերյալ, սակայն տրանսֆերի լիարժեք քննարկման գործը չի հասել։
Հնարավոր գործարքի գլխավոր խոչընդոտը եղել են ֆուտբոլիստի ֆինանսական պահանջները։ Գիրասին տարեկան վաստակում է մոտ 10 միլիոն եվրո, ինչը չի համապատասխանում «Բարսելոնայի» ներկայիս ֆինանսական հնարավորություններին։ Բացի այդ, հարձակվողի պայմանագրով սահմանված հրաժարագինը կազմում է մոտ 50 միլիոն եվրո։ Այս պայմանների համադրությունը տրանսֆերը չափազանց ծախսատար է դարձրել կատալոնական ակումբի համար։
Գիրասին դարձել է Դեկուի հերթական տրանսֆերային նպատակակետը, որը «Բարսելոնային» չի հաջողվել իրագործել այս ամռանը։ Ավելի վաղ կատալոնացիները փորձում էին պայմանավորվել Մադրիդի «Ատլետիկոյի» արգենտինացի հարձակվող Խուլիան Ալվարեսի տեղափոխության շուրջ, սակայն բանակցություններն արդյունք չէին տվել:
Հիշեցնենք, որ Գիրասին «Բորուսիային» է միացել 2024 թվականին՝ տեղափոխվելով «Շտուտգարտից», և կարճ ժամանակում դարձել է թիմի առանցքային խաղացողներից մեկը։ Նախորդ մրցաշրջանում 30-ամյա հարձակվողը բոլոր մրցաշարերում անցկացրել է 46 հանդիպում՝ դառնալով 22 գոլի և 6 արդյունավետ փոխանցման հեղինակ։ Նրա գործող պայմանագրի ժամկետը դորտմունդյան ակումբի հետ նախատեսված է մինչև 2028 թվականը։
