Օգոստոսի 9-ին Ռուսաստանի Պրեմիեր լիգայի ընթացիկ մրցաշրջանի երրորդ տուրում Մոսկվայի «Ռոդինան» արտագնա խաղում անակնկալ հաղթանակ էր տարել Սանկտ Պետերբուրգի «Զենիթի» նկատմամբ (2:1): Այդ հանդիպման գլխավոր հերոսը դարձավ Հայաստանի Մ-21 հավաքականի 20-ամյա հարձակվող Արթուր Ղարիբյանը, ով աչքի ընկավ դուբլով։
«Ակրոնի» դեմ կայացած վերջին խաղից հետո (3:3) հայ ֆուտբոլիստը հարցազրույց է տվել «РБ Спорт»-ին՝ խոսելով պետերբուրգյան ակումբի դեմ ցուցադրած փայլուն խաղի, իր կյանքում տեղի ունեցած փոփոխությունների և ստացած շնորհավորանքների մասին։
Ղարիբյանի խոսքով՝ այդ հանդիպումից հետո ամենաանսպասելի ու հաճելի շնորհավորանքն ստացել է Ռուսաստանի հավաքականի նախկին հարձակվող Ռոման Պավլյուչենկոյից։
«Պավլյուչենկոն անձամբ գրեց և շնորհավորեց ինձ։ Ժամանակին նա մարզել է ինձ, ուստի ես էլ պատասխանեցի, որ ամբողջովին իրեն եմ քաշել»,- ժպիտով նշել է 20-ամյա հարձակվողը։
Խոսելով այն մասին, թե արդյոք իրեն հայտնի է զգում սենսացիոն դուբլից հետո՝ Ղարիբյանն անկեղծացել է.
«Անկեղծ ասած՝ այո, այդ խաղը շատ բան փոխեց իմ կյանքում։ «Զենիթին» երկու գոլ խփելն ուղղակի հիանալի է, ես շատ էի ցանկանում դա անել։ Բայց այս ամենն իզուր կլինի, եթե ես կանգ առնեմ։ Պետք է շարունակեմ նույն ոգով ու դառնամ լավագույնը»։
Գնահատելով ՌՊԼ-ի մակարդակը մեկնարկային տուրերից հետո՝ երիտասարդ ֆուտբոլիստը նշել է, որ այն բարձրակարգ է, սակայն առայժմ որևէ «առանձնահատուկ բան» չի նկատել։ Իսկ այն հարցին, թե արդյոք արդյունավետ խաղից հետո աղջիկներն սկսել են ավելի հաճախ գրել իրեն սոցիալական ցանցերում, հարձակվողը հստակ պատասխանել է.
«Ես ընկերուհի ունեմ, ուստի նման բաներն ինձ բոլորովին չեն հետաքրքրում»։
Հավելենք, որ ընթացիկ մրցաշրջանում Արթուր Ղարիբյանը «Ռոդինայի» կազմում անցկացրել է 4 հանդիպում՝ դառնալով 2 գոլի և 1 արդյունավետ փոխանցման հեղինակ (Ռուսաստանի Գավաթի խաղարկությունում՝ «Ռուբինի» դեմ խաղում՝ 5:0)։ Transfermarkt հեղինակավոր պորտալը ֆուտբոլիստի տրանսֆերային արժեքը գնահատում է 225 հազար եվրո։
