Լոնդոնի «Չելսին» մոտ է «Ռայո Վալեկանոյի» 28-ամյա ձախ պաշտպան Պեպ Չավարիայի տրանսֆերի ձևակերպմանը: Այս մասին հայտնում է իսպանական հեղինակավոր Marca պարբերականը։
Աղբյուրի համաձայն՝ իսպանացի ֆուտբոլիստի տեղափոխությունը «ազնվականների» համար կարժենա շուրջ 25 միլիոն եվրո՝ ներառյալ հնարավոր բոնուսները:
Գործարքը վերջնականապես ավարտին հասցնելու համար ակումբներին մնացել է հարթել ընդամենը վերջին դետալները. Չավարիայի տրանսֆերի մասին պաշտոնապես կհայտարարվի առաջիկայում: Նշվում է, որ «Ռայո Վալեկանոն» սկզբնական շրջանում ավելի մեծ գումար էր պահանջում խաղացողի դիմաց՝ վկայակոչելով նրա պայմանագրում ամրագրված 50 միլիոն եվրո հրաժարագինը, սակայն կողմերին, ի վերջո, հաջողվել է ընդհանուր հայտարարի գալ:
Ֆուտբոլիստի ծառայություններով ակտիվորեն հետաքրքրված էր նաև գերմանական Լևերկուզենի «Բայերը», սակայն պաշտպանը նախապատվությունը տվել է անգլիական ակումբին:
Այս տեղափոխությունը ռեկորդային վաճառք կդառնա «Ռայո Վալեկանոյի» համար: Ներկայումս իսպանական ակումբի պատմության ամենաթանկարժեք գործարքն Ադրիան Էմբարբայի տեղափոխությունն է «Էսպանյոլ», որը 2020 թվականին իրականացվել է 10 միլիոն եվրոյի դիմաց:
Լոնդոնյան թիմի կազմում Պեպ Չավարիան կփոխարինի Մարկ Կուկուրելյային, որն ավելի վաղ տեղափոխվել է Մադրիդի «Ռեալ»:
Հիշեցնենք, որ «Ռայո Վալեկանոյի» կազմում անցկացրած չորս տարիների ընթացքում Չավարիան մասնակցել է 125 հանդիպման՝ դառնալով 2 գոլի և 8 գոլային փոխանցման հեղինակ:
