Իտալական և համաշխարհային ֆուտբոլը ծանր կորուստ է կրել: 66 տարեկան հասակում կյանքից հեռացել է Իտալիայի ազգային հավաքականի և «Միլանի» լեգենդար պաշտպան Ֆրանկո Բարեզին։
Մահվան պաշտոնական պատճառը դեռևս չի հաղորդվում: Հայտնի է, որ 2025 թվականի օգոստոսին Բարեզին վիրահատվել էր՝ թոքի հանգույցը հեռացնելու նպատակով, ինչից հետո անցնում էր իմունոթերապիայի կուրս և վերականգնողական բուժում՝ ուռուցքաբանի հսկողությամբ։ Նրա վերջին հրապարակային ելույթը կայացել էր փետրվարին՝ Միլան-Կորտինա ձմեռային Օլիմպիական խաղերի բացման արարողության ժամանակ։ Այդ օրը Բարեզին իր երկարամյա մրցակից, Միլանի «Ինտերի» նախկին պաշտպան Ջուզեպպե Բերգոմիի հետ Օլիմպիական ջահը տարել էր իր հարազատ «Սան Սիրո» մարզադաշտ:
Բարեզին համարվում է 1980-90-ականների իտալական ֆուտբոլի «ոսկե դարաշրջանի» ամենաճանաչելի խորհրդանիշներից մեկը, ով իր խաղով վերաիմաստավորել է ֆուտբոլում ազատ պաշտպանի դերը։ Նա իր ողջ 20-ամյա պրոֆեսիոնալ կարիերան անցկացրել է «Միլանում» (1977-1997թթ.), որից 15 մրցաշրջանների ընթացքում եղել է թիմի ավագը:
Փառահեղ կարիերայի գլխավոր դրվագները
- «Միլանի» կազմում 20 անընդմեջ մրցաշրջանում անցկացրել է ընդհանուր առմամբ 719 հանդիպում և խփել 33 գոլ:
- Դարձել է Ա Սերիայի 6-ակի չեմպիոն և նվաճել եվրոպական 3 բարձրագույն գավաթ (Չեմպիոնների լիգա)։
- Ֆաբիո Կապելոյի գլխավորությամբ նա առաջնորդել է հանրահայտ «Անպարտելիներին», որոնք Ա Սերիայում 58 հանդիպում անընդմեջ պարտություն չեն կրել: Բարեզին ղեկավարում էր Պաոլո Մալդինի-Ալեսանդրո Կոստակուրտա-Մաուրո Տասոտի լեգենդար պաշտպանական գիծը:
- Իտալիայի հավաքականում անցկացրել է 81 հանդիպում և 1982 թվականին դարձել Աշխարհի չեմպիոն:
- 1994 թվականի ԱԱ-ի եզրափակչում Բրազիլիայի դեմ նա խաղաց ամբողջ 120 րոպեն՝ ծնկի վիրահատությունից ընդամենը 25 օր անց: Այդ խաղում Իտալիան պարտվեց հետխաղյա 11-մետրանոցներով, իսկ Բարեզին վրիպողներից մեկն էր:
- Նա հավատարիմ մնաց «Միլանին» անգամ 1980-ականների սկզբին, երբ թիմը երկու անգամ նահանջեց Սերիա Բ, և օգնեց ակումբին վերադառնալ բարձրագույն լիգա:
- 1999 թվականին ճանաչվել է «Միլանի» դարի լավագույն ֆուտբոլիստ: 2020 թվականին նա նշանակվել էր ակումբի պատվավոր փոխնախագահ:
- Նրա ավագ եղբայրը՝ Ջուզեպպե Բարեզին, ևս հանդես էր գալիս Իտալիայի հավաքականում և եղել է «Միլանի» համաքաղաքային մրցակցի՝ «Ինտերի» ավագը:
- Ի նշան երախտագիտության՝ կարիերայի ավարտին «Միլանն» իր պատմության մեջ առաջին անգամ շրջանառությունից հանել է Բարեզիի 6 համարի մարզաշապիկը։
«Ամբողջ «Միլանի» պատմությունն արտասվում է Ֆրանկո Բարեզիի մահվան կապակցությամբ: Նրա օրինակն ու ազնվությունը հավերժ կմնան ակումբի ԴՆԹ-ում, ինչպես նաև նրա խորհրդանշական 6 համարի մարզաշապիկը»,- նշված է «Միլանի» պաշտոնական հայտարարության մեջ:
Ցավակցական խոսքերով են հանդես եկել նաև Ա Սերիան, Թուրինի «Յուվենտուսը» և «Նապոլին»` ի դեմս նախագահ Աուրելիո Դե Լաուրենտիսի և մարզիչ Մասիմիլիանո Ալեգրիի։
«Յուվենտուսի» տարածած հաղորդագրության մեջ մասնավորապես ասվում է. «Կան մարդիկ, ովքեր իրենց տաղանդով մտնում են պատմության մեջ, և ուրիշներ, ովքեր իրենց մարդկայնությամբ հավերժ մնում են այնտեղ: Ֆրանկո Բարեզին օժտված էր երկուսով էլ: Նա օրինակ է խաղացողների և երկրպագուների սերունդների համար, ով սիրված և հարգված էր ֆուտբոլի բոլոր սիրահարների կողմից»:
