Այսօր՝ հոկտեմբերի 23-ին, ՈւԵՖԱ Կոնֆերենցիաների լիգայի 2025/2026 մրցաշրջանի լիգայի փուլի երկրորդ տուրում, ռումինական «Ունիվերսիտատեա Կրայովան» կհյուրընկալի Հայաստանի չեմպիոն «Նոային»:
Երևանյան ակումբի ճապոնացի կիսապաշտպան Տակուտո Օշիման նախախաղային ասուլիսի ընթացքում պատասխանել է լրագրողների հարցերին։
– Նախքան «Նոա» տեղափոխվելը խաղացել եք մրցակցի կազմում։ Ի՞նչ կասեք այդ ակումբի մասին, որոնք են նրանց ուժեղ կողմերը։
«Ինչպես բոլորը գիտեն, նրանք շատ լավ թիմ են։ Երբ հակառակորդը կորցնում է գնդակը, նրանք շատ արագ են վերցնում նախաձեռնությունը և հիանալի են վերահսկում խաղը»։
– Դուք լավ հանդես եկաք «Ռիեկայի» դեմ առաջին տուրում։ Դա Ձեր առաջին հանդիպումն էր եվրագավաթային մրցաշարի հիմնական փուլում։ Ի՞նչ զգացում ունեիք, արդյո՞ք մակարդակը շատ բարձր էր։
«Ինձ համար յուրաքանչյուր խաղ կարևոր է։ Ես միշտ փորձում եմ անել ամեն ինչ թիմի օգուտի համար, և այդպես է յուրաքանչյուր խաղում»։
– Ինչպե՞ս կհամեմատեք Հայաստանի և Ռումինիայի առաջնությունները՝ նշելով որակական տարբերությունները։
«Ինձ համար Հայկական Պրեմիեր լիգան ավելի բարդ էր, քան ես սպասում էի։ Ռումինիայի առաջնությունը ավելի ինտենսիվ է, բայց չէի սպասում, որ Հայաստանի առաջնությունը այսքան բարդ կլինի»։
– Դու հեռանալուց հետո կապ պահպանո՞ւմ ես նախկին խաղընկերներիդ հետ։
«Այո, շատերի հետ դեռ շփվում եմ՝ նրանք, ովքեր դեռ այնտեղ են, իսկ նրանք, ովքեր լքել են թիմը՝ ոչ»։
– «Նոայի» գլխավոր մարզչին պատմե՞լ ես «Ունիվերսիտատեայի» թույլ կողմերի մասին։
«Ոչ, ուզում եմ ազնվորեն խաղալ։ Եթե պատմեի բոլոր գաղտնիքները, դա անարդար կլիներ»։
– Ինչպիսի՞ զգացումներ ունես նախկին թիմակիցներիդ և երկրպագուներիդ դեմ խաղալուց առաջ։
«Երբեք չեմ խաղացել նախկին թիմիս դեմ։ Դա անսովոր զգացում է՝ խաղալ ընկերների դեմ»։
– Նոստալգիական զգացումներ ունե՞ս խաղից առաջ։
«Իհարկե, կարոտել եմ այս հրաշալի մարզադաշտին և հիանալի երկրպագուներին։ Մեզ սպասվում է հիանալի մթնոլորտ։ Հույս ունեմ՝ լավ կընդունեն մեզ»։
– Երբ ամռանը հեռացար «Կրայովայից», սպասո՞ւմ էիր, որ այսքան շուտ կվերադառնաս։
«Ոչ, չեմ մտածել, որ այդպես կլինի։ Ինձ համար դա անակնկալ էր, բայց ուրախ եմ վերադարձիս համար»։
– «Կրայովայի» որ ֆուտբոլիստի հետ ես փոխանակվելու մարզաշապիկներով։
«Միգուցե Լիես Ուրիի հետ՝ նա իմ լավագույն ընկերն է։ Մենք շատ ժամանակ ենք անցկացրել միասին և միշտ կապի մեջ ենք։ Նաև լավ հարաբերություններ ունեմ Անզոր Մեքվաբիշվիլիի հետ․ մենք երեքով միշտ կապի մեջ ենք»,- ասել է Օշիման։
«Ունիվերսիտատեա Կրայովա» — «Նոա» հանդիպումը կկայանա այսօր՝ հոկտեմբերի 23-ին, Երևանի ժամանակով 23:00-ին։
