«Նյուքասլ Յունայթեդի» հարձակվող Ալեքսանդր Իսակը պաշտոնական հայտարարությամբ հայտնել է, որ այլևս իրեն չի տեսնում թիմի կազմում։
Ավելի վաղ անգլիական մամուլում տեղեկություն էր տարածվել, որ «Նյուքասլը» մերժել է «Լիվերպուլի»՝ Իսակի համար առաջարկած 110 միլիոն ֆունտ ստեռլինգի և բոնուսների առաջարկը։ Դրանից հետո շվեդ հարձակվողը հրաժարվել է մասնակցել մարզումներին և խաղալ թիմի կազմում։
«Ես երկար ժամանակ լռում էի, մինչ մյուսները խոսում էին։ Այդ լռությունը հնարավորություն տվեց մարդկանց ներկայացնել իրենց տարբերակները, թեև նրանք լավ գիտեն, որ դրանք չեն արտացոլում այն, ինչ ասվել և պայմանավորվել է փակ դռների հետևում։ Իրականությունն այն է, որ խոստումներ են տրվել, և ակումբը վաղուց գիտի իմ դիրքորոշումը։ Ներկայացնել, թե այս խնդիրները առաջացել են միայն հիմա, նշանակում է խաբել։ Երբ խոստումները խախտվում են, և վստահությունը կորցվում է, հարաբերությունները չեն կարող շարունակվել։ Սա է իմ իրավիճակը, և այդ պատճառով փոփոխությունները օգտակար կլինեն բոլորի համար, ոչ միայն ինձ»,- նշել է Իսակը։
Ակումբը նույնպես հանդես է եկել հայտարարությամբ՝ պարզաբանելով իր դիրքորոշումը․
«Ալեքսանդր Իսակն ունի գործող պայմանագիր մեզ հետ, և ակումբի որևէ ներկայացուցիչ երբեք երաշխիքներ չի տվել նրա հնարավոր հեռանալու վերաբերյալ այս ամռանը։ Մենք ձգտում ենք պահպանել մեր լավագույն խաղացողներին, սակայն հաշվի ենք առնում նաև ֆուտբոլիստների ցանկությունները և լսում նրանց։ Ինչպես բացատրել ենք Իսակին և նրա ներկայացուցիչներին, ցանկացած որոշում կայացնելիս պարտավոր ենք առաջնորդվել «Նյուքասլ Յունայթեդի», թիմի և մեր երկրպագուների շահերով։ Մենք հստակորեն պարզաբանել ենք, որ վաճառքի պայմանները այս ամռանը չեն փոխվել և չենք ակնկալում, որ դրանք կիրականացվեն»։
Ալեքսանդր Իսակը «Նյուքասլում» հանդես է գալիս 2022 թվականից՝ տեղափոխվելով «Ռեալ Սոսյեդադից»։ Նրա պայմանագիրը գործում է մինչև 2028 թվականի ամառը։ 2024/25 մրցաշրջանում նա մասնակցել է 42 հանդիպման բոլոր մրցաշարերում՝ խփելով 27 գոլ և կատարելով 6 գոլային փոխանցում, ինչի շնորհիվ դարձել է թիմի լավագույն ռմբարկուն։
