Կորոնավիրուսի համաճարակը միավորել է ամբողջ աշխարհին ու նույն հարթության վրա կանգնեցրել մարդկանց։ Ֆուտբոլիստներից շատերը ևս փորձում են ամեն կերպ օգնել կարիքավորներին,բուժհաստատություններին, երեխաներին։ Ներկայացնում ենք Sports.ru կայքի բլոգեր Ազատհան Չեկաբաևի անդրադարձը ՄՅՈՒ-ի ֆուտբոլիստ Մարկուս Ռեշֆորդի բարեգործությունների վերաբերյալ։
Երբ կորոնավիրուսի պատճառով Մեծ Բրիտանիայում դպրոցները փակվեցին, Մարկուս Ռեշֆորդը մտածեց, թե ինչով պիտի սնվեն անապահով ընտանիքների երեխաները։
«Հասկացա, որ դպրոցների փակվելու պատճառով որոշ երեխաներ անվճար սնունդ չեն ստանա»,- ասում է 22-ամյա հարձակվողը։
Մարկուսը վերհիշեց սեփական փորձը․ «Երբ ես դպրոցում էի սովորում, այնտեղ անվճար սնունդ էի ստանում։ Մայրս մոտավորապես մինչև ժամը 6-ը տուն չէր գալիս, դրա համար հաջորդիվ ես մոտ ժամը 8-ին էի սնվում։ Իմ բախտը բերել էր, բայց ավելի վատ պայմաններում ապրող երեխաներ կան, որոնք տանը ուտելիք չեն ստանում»։
Ֆուտբոլիստն աշխատում է բարեգործական FareShare կազմակերպությունում։
«Մենք մեծ աշխատանք ենք կատարել ու 100 հազար ֆունտ ենք հավաքել, որը կուղղվի 400 հազար երեխայի համար սնունդ ձեռք բերելուն»,- ասել է Ռեշը։
Guys, across the UK there are over 32,000 schools. Tomorrow all of these will close. Many of the children attending these schools rely on free meals, so I’ve spent the last few days talking to organisations to understand how this deficit is going to be filled. (1) pic.twitter.com/3Iusr6E9kM
— Marcus Rashford (@MarcusRashford) March 19, 2020
Համաճարակից տուժածներին օգնություն ցուցաբերելու համար միավորվել են նույնիսկ «Մանչեսթեր Յունայթեդն» ու «Մանչեսթեր Սիթին»։ Ակումբները 50 հազարական ֆունտ են ուղղել Մանչեսթերի սննդային ֆոնդին։
«Կարծում եմ՝ դժվարին ժամանակներում կարևոր է, որ երկու ակումբն էլ միավորվեն ու փոխեն իրավիճակը։ Երբեմն բաներ են լինում, որոնք ֆուտբոլից կարևոր են»,- ասում է ֆուտբոլիստը։
Համաճարակից առաջ Մարկուսը դարձել էր լսողության հետ խնդիրներ ունեցող երեխաների մասնակցությամբ պոեզիայի մրցույթի ժյուրիի անդամ։ Ֆուտբոլիստը խոստացել է սահմանափակումները վերանալուն պես անձամբ հանձնել մրցանակները․ «Հենց որ այս ամենն ավարտվի, կգնամ դպրոց, կտեսնեմ երեխաներին ու կհանձնեմ նրանց մրցույթի մրցանակները»։
Ռեշֆորդն առաջին տարին չէ, որ օգնում է երեխաներին․ Սուրբ Ծննդյան տոներին նա մոր հետ միասին 1200 նվեր էր պատրաստել
Դեկտեմբերին Մարկուսը կազմակերպել էր #InTheBox կոչվող սուրբծննդյան բարի ակցիան։ Դրա իմաստն այն էր, որ կոշիկի տուփի մեջ հավաքվեին ամենաանհրաժեշտ իրերը։ Ցանկալի իրերի շարքում էին սանրը, ձեռնոցները, ձեռքերի ախտահանիչ միջոցները, ջեռակը (грелки), գլխարկը, օճառը, դեզոդորանտը, կիսագուլպաները, ատամի մածուկն ու խոզանակը, թաց անձեռոցիկն ու լապտերը։
ՄՅՈՒ-ի ֆուտբոլիստը մոր հետ միասին 1200 սուրբծննդյան նվեր էր պատրաստել անապահովների ու անտունների կացարանների համար։ Նրանք այցելել էին Մանչեսթերի երեք խոշորագույն կացարաններ։
«Հպարտանում եմ իմ ծննդավայրով։ Ինչպես նաև նրանով, որքան հոգատար մարդիկ կան մեր քաղաքում։ Անչափ ուրախ ու երախտապարտ եմ բոլորին իրենց աջակցության համար, ովքեր օգնեցին #InTheBox ակցիային աշխարհն ավելի լավը դարձնել»,-գրել է Ռեշֆորդն ինստագրամյան իր էջում։
Մարկուսն ասում է, որ իրեն դուր է գալիս մարդկանց դեմքերին ժպիտ տեսնելը։
Եվ չի մոռանում արմատների մասին։ #InTheBox ակցիայից հետո Ռեշֆորդը ուտելիքով ու այլ բազմազան իրերով նվերներ էր ուղարկել Սենթ-Քիթսում գտնվող մանկատուն։ Դա Կարիբյան ծովում գտնվող կղզի է, որտեղ ապրել է ֆուտբոլիստի տատիկը։
«Իմ Նանա Կիլիան Հենրին մինչև մահանալն ապրում էր Հեյնս Սմիթ գյուղում: Մեզ համար դա անելը շատ կարևոր էր նրա հիշատակի համար»,-այն ժամանակ գրել էր Ռեշֆորդը։
Մարկուսը երեխաներին օգնում է այն ժամանակվանից, ինչ հաստատվել է ՄՅՈՒ-ի հիմնական կազմում։ «Պարզապես փորձում եմ հետագա սերնդի համար դրական օրինակ ծառայել»,- ասում է ֆուտբոլիստը։
