Այսօր՝ սեպտեմբերի 4-ին, ՖԻՖԱ-ն իր պաշտոնական կայքում ներկայացրեց Աշխարհի 2025թ․ ակումբային առաջնության նոր լոգոտիպը։
Մրցաշարը կանցկացվի նոր ձևաչափով՝ ընդգրկելով արդեն 32 ակումբ։ ՖԻՖԱ-ի նախագահ Ջանի Ինֆանտինոյի համոզմամբ, նոր ձևաչափով մրցաշարից ստացված եկամուտը մեծ խթան կլինի մարզաձևի զարգացման համար։ Նրա խոսքով՝ ՖԻՖԱ-ն կարող է 2022-26 թվականների ընթացքում 10 մլրդ դոլարից ավելի եկամուտ ապահովել, ընդ որում այդ հաշվարկում ներառված չէ 2025 թվականի ակումբային առաջնությունից սպասվող գումարը։
Առաջիկա տարիներին ֆուտբոլի «մեծ եղբայրը» որոշել է համաշխարհային համբավ ունեցող մարզաձևը «տեղափոխել» ԱՄՆ: 2018 թվականին Աշխարհի առաջնությունը Ռուսաստանում անցկացնելուց հետո ՖԻՖԱ-ն Քաթարի հետ կապված սկանդալային պատմությունները պետք էր ինչ-որ ձև կոմպենսացներ: Հատկանշական է, որ Աշխարհի 2026 թվականի առաջնությունը նույնպես անմասն չի լինելու ԱՄՆ-ից, բացի այդ, մրցաշարին կմասնակցեն ոչ թե սովորականի պես 32, այլ 48 հավաքականներ։ Աշխարհի առաջնությունն առաջին անգամ կանցկացվի երեք երկրներում․ Կանադայում, ԱՄՆ-ում և Մեքսիկայում։
Սկսենք սկզբից․ աշխարհի ակումբային առաջնությունը հիմնվել է 2000 թվականին։ Մրցաշարին մասնակցում էին 7 ակումբներ։ Առաջին անգամ մրցաշարը անցկացվել է 2000 թվականին, ապա 2005-ին, որից հետո անց է կացվել ամեն տարի:
Մրցաշարում 5 անգամ չեմպիոն է դարձել Մադրիդի «Ռեալը» (2014, 2016, 2017, 2018, 2022)։ Երեք անգամ չեմպիոն է դարձել կատալոնական «Բարսելոնան» (2009, 2011, 2015):
Նոր մրցաշարի լոգոն
2025 թվականի ֆուտբոլի ակումբային աշխարհի առաջնությանը, որը կանցկացվի գալիք տարվա հունիսի 15-ից մինչև հուլիսի 13-ը, կմասնակցեն ներկայացուցիչներ վեց մայրցամաքային կոնֆեդերացիաներից՝ ԱՖԿ (Ասիա), ԿԱՖ (Աֆրիկա), Կոնկակաֆ (Հյուսիսային, Կենտրոնական Ամերիկա և Կարիբյան ավազան), ԿՈՆՄԵԲՈԼ (Հարավային Ամերիկա), ՕՖԿ (Օվկիանիա) և ՈւԵՖԱ (Եվրոպա):
Ներկայումս 32 թիմերից 30-ն արդեն որակավորվել են, ԿՈՆՄԵԲՈԼ-ի լրացուցիչ ակումբը և ընդունող երկրի ներկայացուցիչը կհաստատվեն սահմանված կարգով:
Բոլորս էլ հասկանում ենք, որ այսպիսի ձևաչափերով մրցաշարերը նախ գլխացավանք են ակումբների և ամենաառաջինը ակումբների գլխավոր մարզիչների համար:
Մեծ հավանականությամբ, հանդիպումների հեռարձակման իրավունքները ձեռք կբերի Apple TV-ն։ ԶԼՄ-ների հաղորդմամբ՝ գործարքի գումարը կազմելու է մոտ 1 միլիարդ դոլար։ Դա հսկայական գումար է այդ մրցաշարի համար, որին, ինչպես արդեն հայտնի է, չեն մասնակցի բազմաթիվ եվրոպական բարձրակարգ թիմեր։
Քանի որ որակավորման մրցաշար չի լինի, ՖԻՖԱ-ն սահմանել է չափանիշներ, որոնց համաձայն կընթանա ընտրությունը ակումբային աշխարհի առաջնության համար: Հաշվարկների համար նշվում են բոլոր կոնֆեդերացիաների ակումբների ելույթների ցուցանիշները մայրցամաքային առաջնություններում չորսամյա ցիկլում (այսինքն՝ 2021-ից սկսած): Հաղթողները ավտոմատ կերպով ստանում են ուղեգրեր, իսկ մնացածներին ընտրելու են ըստ մայրցամաքային վարկանիշի:
Բոլորի համար, բացի եվրոպական թիմերից, միավորներն հաշվարկվում են հետևյալ կերպ.
— 3 միավոր՝ մրցաշարի յուրաքանչյուր փուլում առաջընթացի համար
— 1 միավոր՝ ոչ-ոքիի համար
— 3 միավոր՝ հաղթանակի համար
Եվրոպայի համար հաշվի են առնվում միայն Չեմպիոնների լիգայի արդյունքները, իսկ հաշվարկի մեթոդաբանությունն այսպիսին է.
— 1 միավոր՝ յուրաքանչյուր հաջորդ փուլ անցնելու համար
— 5 միավոր՝ 1/8 եզրափակիչ դուրս գալու համար
— 4 միավոր՝ խմբային փուլ դուրս գալու համար
— 1 միավոր՝ ոչ-ոքիի համար
— 2 միավոր՝ հաղթանակի համար
Կարևոր չափանիշ է այն, որ յուրաքանչյուր երկրից կարող է լինել առավելագույնը երկու թիմ: Բացառությունն է միայն այն դեպքում, եթե չորսամյա ընտրական ցիկլի ընթացքում մեկ երկրից հայտնվում են Չեմպիոնների լիգայի երկուսից ավելի հաղթողներ:
Մասնակից ակումբների ցանկը (30 հայտնի)
ՈւԵՖԱ
ՊՍԺ (Ֆրանսիա), «Բորուսիա Դորտմունդ» (Գերմանիա), «Պորտու» (Պորտուգալիա), «Աթլետիկո Մադրիդ» (Իսպանիա), «Մանչեսթեր Սիթի» (Անգլիա), «Բավարիա» (Գերմանիա), «Բենֆիկա» (Պորտուգալիա), «Զալցբուրգ» (Ավստրիա), «Ինտեր» (Իտալիա), «Ռեալ Մադրիդ» (Իսպանիա), «Չելսի» (Անգլիա), «Յուվենտուս» (Իտալիա)
ԿՈՆՄԵԲՈԼ
«Ֆլումինենսե» (Բրազիլիա), «Ռիվեր Փլեյթ» (Արգենտինա), «Բոկա Խունիորս» (Արգենտինա), «Պալմեյրաս» (Բրազիլիա), «Ֆլամենգո» (Բրազիլիա)
ԿՈՆԿԱԿԱՖ
«Մոնթերեյ» (Մեքսիկա), «Սիեթլ Սաունդերս» (ԱՄՆ), «Լեոն» (Մեքսիկա), «Պաչուկա» (Մեքսիկա)
ԱՖԿ
«Ուլսան» (Հարավային Կորեա), «Ալ Հիլալ» (Սաուդյան Արաբիա), «Ուրավա Ռեդ Դայմոնդս» (Ճապոնիա), «Էլ Աին» (ԱՄԷ)
ԿԱՖ
«Ալ Ահլի» (Եգիպտոս), «Վիդադ» (Մարոկկո), «Էսպերանս» (Թունիս), «Մամելոդի Սանդաունս» (ՀԱՀ)
ՕՖԿ
«Օքլենդ Սիթի» (Նոր Զելանդիա)
ՖԻՖԱ-ն շուտով կհայտարարի 2025 թվականի ակումբային աշխարհի առաջնության մի քանի կարևոր մանրամասներ, ներառյալ 63 հանդիպումները հյուրընկալող մարզադաշտերի ցանկը, նոր գավաթի տեսքը, վիճակահանությունը, տոմսերի վաճառքի և խաղացանկի մանրամասները:
