Լա լիգայի պատվիրակված հանձնաժողովը մերժել է Մադրիդի «Ռեալի» բողոքն ընդդեմ Լա լիգայի 29-րդ տուրի՝ «Օսասունայի» հետ (4:2) հանդիպման մրցավար Խուան Մարտինես Մունուերայի։
«Լա Լիգայի պատվիրակված հանձնաժողովը գտնում է, որ այս բողոքն իսպանացի մրցավարների դեմ Մադրիդի «Ռեալի» կողմից իրականացվող անողոք արշավի ևս մեկ դրսևորում է՝ նրանց վրա ճնշում գործադրելու ենթադրյալ մտադրությամբ՝ նշված խմբի որոշումներից մրցակցային առավելություն ստանալու նպատակով։
Ինչպես հայտարարել և հաստատել է մրցավարների տեխնիկական կոմիտեն, Խուան Մարտինես Մունուերայի գործողություններն անթերի էին և լիովին համապատասխանում էին մրցավարությունը կարգավորող կանոններին: Փաստերի ցանկացած այլ մեկնաբանություն պարզապես սխալ է»,- ասվում է Լա Լիգայի պաշտոնական կայքում տարածված հաղորդագրության մեջ:
Հիշեցնենք, որ միջադեպը տեղի է ունեցել «Օսասունայի» հետ հանդիպման առաջին խաղակեսում։ Բասկերի երկրպագուները վանկարկել են. «Վինիսիուս, մեռիր»: Գլխավոր մրցավար Խուան Մարտինես Մունուերան, ըստ մադրիդյան կողմի, կամավոր և միտումնավոր բաց է թողել Վինիսիուս Ժունիորի հասցեին վիրավորանքները, չնայած այն բանին, որ Մադրիդի «Ռեալի» խաղացողները մրցավարի ուշադրությունը հրավիրել են տրիբունաներից հնչող բղավոցների վրա և այդ վանկարկումները չի արտացոլել իր արձանագրության մեջ: Մադրիդի «Ռեալն» իր հերթին մրցավարի դեմ բողոք է ներկայացրել Իսպանիայի ֆուտբոլի թագավորական ֆեդերացիայի (RFEF) կարգապահական կոմիտե և բռնության, ռասիզմի, այլատյացության և սպորտում անհանդուրժողականության դեմ պայքարի պետական հանձնաժողով։
