«Արսենալի» գլխավոր մարզիչ Միկել Արտետան խոսել է «Բրայթոնի» հետ Անգլիայի առաջնության 17-րդ տուրի առաջիկա հանդիպման մասին։ Հանդիպումը կկայանա այսօր՝ դեկտեմբերի 17-ին։
«Մենք կփորձենք ցույց տալ մեր լավագույն խաղը։ Մենք սիրում ենք հաղթել, և թիմը պատրաստ է ամեն ինչ անել խաղերում հաղթելու համար: Մենք դա ցույց տվեցինք «Աստոն Վիլլայի» դեմ խաղում, երբ, իմ կարծիքով, ավելի լավ էինք խաղում և պետք է հաղթեինք այդ խաղում: Եկեք նորից դա փորձենք «Բրայթոնի» դեմ, որը, անշուշտ, շատ կդժվարացնի մեր կյանքը։
Նրանք իսկապես լավ թիմ ունեն։ Անցյալ տարի մենք վերահսկում էինք հանդիպումը, բայց գոլ բաց թողեցինք, իսկ հետո խաղն ամբողջությամբ փոխվեց։
Կարծում եմ՝ նրանք իրենց խաղը տեղափոխել են այլ մակարդակ և իսկապես հաջող են հանդես գալիս նաև եվրոպական մրցաշարում։ Դուք տեսաք նախորդ օրը, թե ինչ արեցին նրանք։
Նրանք հաջողության հասան նույնիսկ առանցքային ֆուտբոլիստներին վաճառելուց, բազմաթիվ վնասվածքներից հետո, ուստի դրանում մեծ ներդրում ունեն ֆուտբոլիստները, Ռոբերտո Դե Զերբին և մարզչական շտաբը: Այդ ակումբի կատարած աշխատանքն իսկապես տպավորիչ է»,- Արտետայի խոսքերն է մեջբերում «Արսենալի» պաշտոնական կայքը։
