Մյունխենի «Բավարիան» պատրաստվում է բանակցություններ սկսել Մայքլ Օլիսեի հետ՝ գործող պայմանագրի ժամկետը երկարաձգելու նպատակով։ Սպասվում է, որ այս գործընթացն ավելի բարդ կլինի, քան Հարի Քեյնի դեպքում էր։
Մյունխենյան ակումբը մտադիր է զգալիորեն բարելավել ֆուտբոլիստի ֆինանսական պայմաններն ու նրա աշխատավարձը 14-ից հասցնել տարեկան 25 միլիոն եվրոյի։ Սակայն, ինչպես հաղորդում է AS-ը՝ հղում անելով Sport Bild-ին, Օլիսեի գլխավոր պահանջն այն է, որ նոր պայմանագրում անպայման ներառվի հրաժարագնի (հնարավոր գնման) կետ։ Ենթադրվում է, որ 200 միլիոն եվրոն բավարար գումար կլինի դրա համար։
Ներկա պահին 24-ամյա ֆուտբոլիստի պայմանագրում նման կետ նախատեսված չէ։ Նրա գործող համաձայնագիրը գերմանական գրանդի հետ ուժի մեջ է մինչև 2029 թվականի ամառ։
Նշենք, որ Մայքլ Օլիսեն «Բավարիայի» կազմում ընդհանուր առմամբ անցկացրել է 114 հանդիպում՝ դառնալով 50 գոլի և 58 գոլային փոխանցման հեղինակ։
