Ֆուտբոլի Հայաստանի երիտասարդական հավաքականի կիսապաշտպան Գևորգ Տարախչյանը որոշ ժամանակ առաջ համալրեց «Ուրարտուի» շարքերը: Գևորգը «Ուրարտուի» մանկապատանեկան դպրոցի սան է, նորամուտը Հայաստանի ամենաբարձր լիգայում նշել է հենց հարազատ ակումբում: Այնուհետև, խաղային պրակտիկա ձեռք բերելու նպատակով տեղափոխվել է ԲԿՄԱ, որտեղ իրեն գերազանց է դրսևորել՝ դառնալով թիմի առանցքային ֆուտբոլիստներից մեկը:
Մրցաշրջանի մեկնարկում Տարախչյանը դեռևս ԲԿՄԱ-ի ֆուտբոլիստ էր, երբ ստացավ «Ուրարտու» վերադառնալու առաջարկը: Նարեկ Գրիգորյանի տրանսֆերից ու Կարեն Մելքոնյանի ծանր վնասվածքից հետո Գևորգի վերադառնալը լրջորեն օգնեց թիմին՝ առջևի գծում մրցակիցներին այլընտրանք առաջարկելու տեսանկյունից:
ArmSport-ի հետ զրույցում Գևորգ Տարախչյանը խոսել է հարազատ ակումբ վերադառնալու, մարզչի հետ արդյունավետ աշխատանքի ու ԲԿՄԱ-ում անցկացրած ժամանակահատվածի մասին:
– Գևորգ, ինչպե՞ս ստացվեց վերադարձդ «Ուրարտու», կխնդրեմ՝ մի փոքր մանրամասնես: Ի՞նչ զրույց ծավալվեց քո ու մարզչի հետ:
– Մինչև մարզչի հետ խոսելը, զրուցել էի մեր թիմի սկաուտ Էրիկ Վարդանյանի հետ: Առաջինը նա ինձ տեղեկացրեց, որ թիմն ինձնով հետաքրքրված է, որից հետո էլ արդեն եկա ու խոսեցի նաև մարզչի հետ: Նրա կողմից մեծ վստահություն զգացի ու հասկացա, որ իմ որակներով կկարողանամ օգնել թիմին:
– Գնալով ավելի շատ խաղաժամանակ ես ստանում: Ինչպե՞ս է ընթանում ադապտացիադ «հին» նոր ակումբում:
– Դե, բնականաբար, շատ քիչ ֆուտբոլիստներ են մնացել հին «Ուրարտուի» կազմից, որոնց հետ ես խաղացել էի: Կան նոր ֆուտբոլիստներ, բայց կարելի է ասել՝ բոլորի ֆուտբոլային որակներին արդեն ծանոթ եմ: Ուրախ եմ, որ մարզիչը վստահում ու խաղաժամանակ է տալիս ինձ՝ որպես նորեկ թիմում: Կփորձեմ անել ավելին, որպեսզի ավելի շատ խաղաժամանակ ստանամ ու արդյունավետ օգտագործեմ դա խաղադաշտում:
– Ինչպե՞ս ես գնահատում քո մարզավիճակն այս պահին: Խաղային ի՞նչ որակներ ունես ավելացնելու, ըստ քեզ:
– Կարծում եմ՝ շատ լավ մարզավիճակում եմ, ինձ համար մրցաշրջանը լավ է ընթանում, լավ կլինի՝ լինելով հարձակման գծի ֆուտբոլիստ՝ ավելի շատ գոլային փոխանցումներ կատարեմ և գոլեր խփեմ:
– Ի՞նչ տվեց քեզ վարձավճարով ԲԿՄԱ-ում հանդես գալը: Որքանո՞վ այն կարելի է հաջող համարել:
– Կարծում եմ՝ ԲԿՄԱ-ն շատ մեծ շանս է բոլոր հայ երիտասարդ ֆուտբոլիստների համար, որպեսզի կարողանան ավելի շատ խաղաժամանակ ստանալ Բարձրագույն խմբում և մեկ քայլ առաջ գնան դեպի մեծ ֆուտբոլ: ԲԿՄԱ-ն, միանշանակ, իմ կարիերայում մեծ դեր խաղաց, ես շատ բան սովորեցի Ռաֆայել Նազարյանի գլխավորած թիմում խաղալով և շնորհակալ եմ նրան, որ օգնեց ինձ ու ճիշտ ճանապարհը ցույց տվեց, թե ինչպես կարելի է զարգանալ ու լինել լավ ֆուտբոլիստ:
– Երևում է, որ առջևի գծում «Ուրարտուն» ունի որոշակի խնդիրներ պահերի իրացման հետ կապված: Ի՞նչ է ասում մարզիչը և հատկապես ի՞նչ է քեզնից ակնկալում նա:
– Մենք շատ պահեր ենք ունենում հարձակման գծում, կարողանում ենք ստեղծել դրանք, բայց հաճախ մի փոքր չի հերիքում վերջավորությունը։ Կարծում եմ՝ հետագա խաղերում կշտկվի ամեն ինչ, որովհետև մարզումների ժամանակ աշխատում ենք նաև այդ ուղղությամբ, մարզիչը ցանկանում է, որ ես ավելի շատ ուղղահայաց ֆուտբոլ խաղամ և ավելի արագություն տամ թիմի գրոհներին, ինչը, կարծում եմ, ստացվում է:
Ռոբերտ Գասպարյան
