Հայաստանի չեմպիոն «Ուրարտուն» Չեմպիոնների լիգայի որակավորման առաջին փուլում կմրցի Բոսնիա և Հերցեգովինան ներկայացնող «Զրինսկիի» հետ։ Armsport-ը ներկայացնում է, թե ինչ վիճակում է «Ուրարտուն» մոտենում առաջին հանդիպմանը։
ՉԼ․ որակավորման 1-ին փուլ․ «Ուրարտու» — «Զրինսկի»
Առաջին խաղը կկայանա Երևանում՝ հուլիսի 11-ին (19:00, «Ուրարտու» ստադիոն), իսկ պատասխան խաղը Մոստարում՝ հուլիսի 18-ին։
Ըստ Transfermarkt-ի՝ «Զրինսկիի» ընդհանուր տրանսֆերային արժեքը կազմում է 7․68 մլն եվրո։ «Ուրարտուի» ֆուտբոլիստների ընդհանուր տրանսֆերային արժեքը կազմում է 5․68 մլն եվրո։
2022-23 թթ․ մրցաշրջանի ավարտից հետո Հայաստանի նորընծա չեմպիոնի կազմում որոշակի փոփոխություններ են տեղի ունեցել։
Թիմից հեռացել են՝ (տվյալները՝ Transfermarkt.com-ի)
դարպասապահ Արսեն Բեգլարյանը
պաշտպան Ռաֆայել Կարիոկան
պաշտպան Վադիմ Պարամոնովը
կիսապաշտպան Դավիթ Խուրցիձեն
հարձակվող Դմիտրո Խլյոբասը
հարձակվող Մաքսիմ Մայրովիչը
Թիմը համալրել են՝
դարպասապահ Դմիտրի Աբակումովը
կիսապաշտպան Միքայել Միրզոյանը
վինգեր Արտյոմ Մաքսիմենկոն
պաշտպան Պերիշա Պեշուկիչը
կիսապաշտպան Պավել Մագիլևետսը
կիսապաշտպան Էդուարդոն
* Նախորդ մրցաշրջանում «Ուրարտուի» ավագ Ժիրայր Մարգարյանը, որի տրանսֆերային իրավունքները պատկանում են ուկրաինական «Վերեսին», ևս մեկ տարի վարձակալական հիմունքներով կշարունակի հանդես գալ երևանյան ակումբում։
Վերջին շրջանում շատ է խոսվում Ուգոչուկվու Իվուի հնարավոր հեռանալու մասին։ Սակայն ՉԼ-ի որակավորման 1-ին փուլին հաշված օրեր են մնացել, ինչն էլ թույլ է տալիս ենթադրել, որ Հայաստանի հավաքականի նորեկը կմասնակցի առաջիկա հանդիպմանը։
«Ուրարտուի» հարձակվող Յայա Սանոգոն արդեն բավականին ժամանակ է ունեցել մարզաշապիկ ձեռք բերելու համար, էապես կուժեղացնի թիմի հարձակման գիծը։ Պետք չէ մոռանալ նաև Արաս Օզբիլիսի մասին։ Նախորդ մրցաշրջանի երկրորդ հատվածում փորձառու կիսապաշտպանը լուրջ ներդրում ունեցավ թիմի հաջողություններում։
Լուրջ կորուստ կարելի է համարել միայն Դավիթ Խուրցիձեի հեռանալը։ Զարմանալի էր, որ «Ուրարտուն» ոչ միայն չպահեց նրան թիմում, այլ ֆուտբոլիստը տեղափոխվեց «Ալաշկերտ», որը գալիք մրցաշրջանում չեմպիոնության հավակնորդներից մեկն է լինելու։
«Ուրարտուն» ինչպես երիտասարդ, այնպես էլ փորձառու ֆուտբոլիստներով համալրված թիմ ունի, որը նվազագույնը պետք է ցուցադրի իր պոտենցիալը։
Ամենայն հավանականությամբ, ակումբը դեռ չի ավարտել աշխատանքը տրանսֆերային շուկայում։ Բնականաբար, եթե հաջողվի հաղթահարել «Զրինսկիի» արգելքը, ապա թիմը նվազագույնը կմասնակցի Կոնֆերենցիաների լիգայի փլեյ-օֆֆին։
Պետք է հիշել, որ Չեմպիոնների լիգայի որակավորման 1-ին փուլը չհաղթահարելու դեպքում թիմը շարունակելու է պայքարը Կոնֆերենցիաների լիգայի որակավորման 2-րդ փուլում, որտեղ մրցելու է «Ֆարուլ Կոնստանտա» (Ռումինիա) – «Շերիֆ» (Մոլդովա) զույգի պարտվողի հետ։
Բալկանյան թիմերի հետ դիմակայությունները
Առաջիկա մրցակցի մասին ամփոփ տեղեկություն հրապարակել էր «Ուրարտուի» մամուլի ծառայությունը։
Բալկանյան թիմերի հետ դառը փորձ «Ուրարտուն» արդեն ունեցել է։ Վերջին տարիներից կարելի է հիշել 2018 թվականին Եվրոպա լիգայի որակավորման առաջին փուլում բոսնիական «Սարաևոյից» կրած պարտությունը՝ 1։2 հաշվով տանը և 0։3 հաշվով արտագնա խաղում։
Ավելի ցավալի է եղել 2019 թվականին սերբական «Չուկարիչկիի» հետ դիմակայությունը, որտեղ երևանյան թիմը նախ՝ 0։3 հաշվով զիջել է արտագնա խաղում, իսկ հետո՝ 0։5 հաշվով պարտվել տանը։
«Զրինսկին», անկասկած, բարդ մրցակից է Հայաստանի չեմպիոնի համար։ Դժվարություն է առաջացնում նաև այն հանգամանքը, որ առաջին խաղը կայանալու է Երևանում, իսկ ինչպես գիտենք, երկխաղյա դիմակայություններում ավելի լարված է լինում պատասխան հանդիպումը։ Ստացվում է, որ դրական արդյունքի հույս ունենալու համար «Ուրարտուն» պետք է առաջին խաղում հաղթի։ Դա, իհարկե, բարդ է, սակայն ոչ անհավանական։ Գուցե ծեծված խոսքեր են, բայց ֆուտբոլը հենց դրանով էլ անկանխատեսելի է։ Միշտ չէ, որ հաղթում է այն թիմը, որը ֆավորիտ է։
2021 թվականին մոլդովական «Շերիֆը» հաղթահարել է Չեմպիոնների լիգայի որակավորման բոլոր փուլերը և խաղացել խմբային փուլում։ Երևանի «Փյունիկը» նախորդ մրցաշրջանում հաղթահարել է ՉԼ-ի որակավորման 1-ին և 2-րդ փուլերը՝ հաղթելով ռումինական «Կլուժին» և Լյուքսեմբուրգը ներկայացնող «Դյուդելանժին»։
«Զրինսկիի» կազմն ու խաղն ուսումնասիրելը երկրպագուների գործը չէ, և դա նրանց ոչինչ չի տա։ Դա գուցե տեղին կլինի առաջին խաղից հետո, երբ որոշակի պատկերացում կկազմենք 2 թիմերի՝ միմյանց դեմ ցուցադրած խաղի մասին։
Ինչպե՞ս են թիմերն անցկացրել նախամրցաշրջանային փուլը
«Ուրարտուն» հավաք է անցկացրել Վրաստանում, որտեղ ընկերական հանդիպումներ է անցկացրել։
«Սաբուրթալոյի» հետ խաղն ավարտվել է ոչ-ոքի՝ 2։2 հաշվով։ Հայաստանի չեմպիոնի կազմում աչքի են ընկել Լեոան Սաբուան և թիմի նորեկ Արտյոմ Մաքսիմենկոն։
«Գագրայի» հետ հանդիպումն ավարտվել է 0։0 հաշվով։
Վերջին ընկերական խաղը կայացել է Երևանում։ «Ուրարտուն» Արման Ղազարյանի և Լեոն Սաբուայի գոլերի շնորհիվ 2։1 հաշվով հաղթել է «Վեսթ Արմենիային»։
«Զրինսկին» 4 ընկերական/ստուգողական հանդիպում է անցկացրել։ Թիմը 3 հաղթանակ է տարել և յուրաքանչյուր խաղում խփել է 3-ական գոլ։ Միակ պարտությունը թիմը կրել է առաջին խաղում՝ զիջելով սլովենական «Մուրային»։
Ընկերական կամ, ինչպես ասում են, ստուգողական հանդիպումները շատ կարևոր են, բայց ոչ թե երկրպագուների, այլ մարզիչների և ֆուտբոլիստների համար։ 2 թիմերն էլ բավարար ժամանակ են ունեցել պատրաստվելու համար։
Միայն առաջին խաղից հետո հնարավոր կլինի պատկերացում կազմել, թե ինչ շանսեր ունեն թիմերը՝ հատկապես «Ուրարտուն»։ Եթե նույնիսկ առաջին խաղում բոսնիական թիմը չհաղթի, ապա պատասխան հանդիպմանը լինելու է ֆավորիտ։ Այդ պատճառով էլ «Ուրարտուն» պետք է փորձի օգտագործել ոչ միայն իր ուժեղ կողմերը, այլ նաև մրցակցի հնարավոր սխալները։
Տոմսերի մասին տեղեկությունը՝ «Ուրարտուի» պաշտոնական կայքում։
«Ուրարտուի» մարզչական շտաբի՝ հատկապես Դմիտրի Գունկոյի համար սա նոր մարտահրավեր է։ Հայաստանում «Ոսկե դուբլից» հետո նրա գլխավորած թիմը պետք է ապացուցի, որ այս արդյունքը պատահական չէր։ «Ուրարտուն» իսկապես փայլուն մրցաշրջան անցկացրեց Fastex Հայաստանի Պրեմիեր լիգայում։ Հիմա ժամանակն է ապացուցելու, որ այդ հաղթանակները պատահական չէին։ «Ուրարտուն» պետք է հիմնվի միայն իր խաղի և իր հնարավորությունների վրա։
Բացի թիմային հաջողություններից, սա նաև մարզչական լավ կարիերա կառուցելու հիանալի հնարավորություն է։ Եթե Գունկոյի մոտ ստացվի «Ուրարտուի» հետ հնարավորինս առաջ գնալ եվրագավաթային մրցաշարերում, ապա նրա մարզչական կարիերայում, անկասկած, նոր հորիզոններ կբացվեն։
Հաջողություն մաղթենք Հայաստանի չեմպիոնին եվրագավաթային մրցաշրջանում։ Հուլիսի 11-ին՝ Երևանի ժամանակով 19։00-ին, «Ուրարտու» մարզադաշտում աջակցենք երևանյան թիմին։
Միհրան Ալեքսանյան