Fastex Հայաստանի Պրեմիեր լիգան մոտեցել է վերջնակետին, կրքերն էլ պիկին են: ՀՊԼ 34-րդ տուրի կենտրոնական խաղում միմյանց հետ կմրցեն «Փյունիկն» ու «Ուրարտուն»: Երկու թիմերն էլ պահպանում են չեմպիոնության շանսերը:
Առաջատարի կարգավիճակում
Այս մրցաշրջանում «Ուրարտուն» հիանալի արդյունք է գրանցել՝ արդեն 7 ամիս՝ 9-րդ տուրից սկսած լինելով առաջին հորիզոնականում: Այս ընթացքում «Ուրարտուն» անցկացրած 34 խաղերից 25-ում հաղթանակ է տոնել, 4-ն ավարտել ոչ-ոքի և 5 խաղում պարտություն կրել՝ ընդհանուր առմամբ վաստակելով 79 միավոր:
Երկու թիմերի դիմակայությունն այս մրցաշրջանում
2022/23 մրցաշրջանի ընթացքում թիմերը հանդիպել են միայն առաջնության շրջանակում: Նախորդ 3 հանդիպումներից երկուսում հաղթանակն ուղեկցել է «Ուրարտուին», մեկ անգամ էլ «Փյունիկն» է առավելության հասել:
Ընթացիկ առաջնության առաջին շրջանում «Ուրարտուն» ընդհատել էր «Փյունիկի» հետ դիմակայությունում առանց հաղթանակների 4 խաղերի շարքը: Իսկ Եղիշե Մելիքյանի թիմին հաջողվել է մրցաշրջանի առաջին հաղթանակն «Ուրարտուի» դեմ գրանցել միայն 3-րդ շրջանում:
Չեմպիոնը կարող է պարզ դառնալ առաջնության ավարտից 1 տուր առաջ
Դմիտրի Գունկոյի թիմը լավ հնարավորություն ունի պատմության մեջ առաջին անգամ «ոսկե դուբլ» գրանցելու և երկրորդ անգամ գլխավերևում պահելու Հայաստանի չեմպիոնի գավաթը: Իսկ դրանից թիմին մեկ քայլ է բաժանում. «Փյունիկի» հետ մրցավեճին Գունկոյի սաները մոտեցել են որոշակի առավելությամբ, ինչն էլ կարող է առաջնության ավարտից մեկ տուր շուտ հայտնի դարձնել հաղթողին. «Ուրարտուն» պետք է հաղթի «Փյունիկին» ցանկացած հաշվով:
Եթե հանդիպումն ավարտվի ոչ-ոքիով, ապա երկու թիմերն էլ կպահպանեն շանսերը, և ամեն ինչ կախված կլինի վերջին տուրից, որտեղ «Ուրարտուն» տանը մրցելու է «Արարատի» հետ, և այդ խաղում թիմին բավարար կլինի անգամ ոչ-ոքին, իսկ «Փյունիկը» հյուրընկալվելու է «Ալաշկերտին»: Ամեն ինչ վերջին տուրը կորոշի նաև այն դեպքում, եթե առավելության հասնել կարողանան Եղիշե Մելիքյանի տղաները:
Դիմակայության լավագույն ռմբարկուն՝ Գևորգ Ղազարյան
Երևանյան դերբիի լավագույն ռմբարկուն «Փյունիկի» հարձակվող Գևորգ Ղազարյանն է, որը 9 գնդակ ունի իր ակտիվում:
Իսկ «Փյունիկի» ներկայիս կազմում «Ուրարտուի» դեմ ամենաշատ խաղն անցկացրել է Էդգար Մալաքյանը՝ 17 խաղ:
Վիճակագրությունը՝ ընդհանուր դիմակայություններում
Թիմերը միմյանց դեմ ընդհանուր առմամբ 94 խաղ են անցկացրել, որոնցից 48-ում հաջողության է հասել «Փյունիկը», 23-ում հաղթել է «Ուրարտուն», գրանցվել է 23 ոչ-ոքի, խփած և բաց թողած գոլերի հարաբերակցությունն էլ 160-100 է:
Վճռորոշ խաղը՝ «Հանրապետական» մարզադաշտում
ՀՊԼ 34-րդ տուրի կենտրոնական հանդիպումը կկայանա հունիսի 2-ին՝ ժամը 20:00-ին, Վազգեն Սարգսյանի անվան «Հանրապետական» մարզադաշտում:
