Շախմատի Հայաստանի 2023 թվականի չեմպիոն Սամվել Տեր-Սահակյանն ArmSport-ի հետ զրույցում կիսվել է տպավորություններով․
Հայաստանի առաջնությունում հաղթելը մեծ պատիվ է։ Ուրախ եմ, որ արդեն Հայաստանի կրկնակի չեմպիոն եմ։ Մեծ ոգևորություն է համալրել Հայաստանի ազգային հավաքականի կազմն ու այդպիսի շախմատիստների կողքին հնարավորություն ունենալ մասնակցել Եվրոպայի թիմային առաջնությանը։
Առաջնությունը շատ դժվար սկսվեց ինձ համար, քանի որ առաջին իսկ տուրում պարտություն կրեցի, բայց հաջորդ 8 տուրերում կարողացա հավաքվել և միավորներ վաստակել։ Կառանձնացնեմ վերջին տուրում Ռոբերտ Հովհաննիսյանի նկատմամբ տարած հաղթանակը, որը վճռորոշ էր առաջին տեղի համար պայքարում։ Բայց, իհարկե, կարևոր էր նաև երկրորդ տուրում հաղթանակը, քանի որ առաջին պարտությունից հետո այդ հաղթանակն ինձ շատ էր պետք։
Չէի սպասում, որ կհաղթեմ Ռոբերտին։ Վերջին տուրում հաղթանակը շատ կարևոր էր։ Ռոբերտը բացի շատ ուժեղ շախմատիստ լինելուց, այսպիսի մրցաշարերում կրկնակի ու եռակի անգամ ավելի լավ է խաղում։ Անկեղծ, չէի էլ պատկերացնում, որ վերջին պարտիայում կարող եմ հաղթել նրան։
Առաջնության մեկնարկից առաջ ամենաբարձր նպատակներն էի դրել իմ առջև, բայց առաջին տուրում կրած պարտությունից հետո նպատակները փոխվեցին․ արդեն կարևոր էր առաջնությունը շատ վատ չավարտել, բայց երբ 7-րդ տուրում ոչ-ոքի խաղացի և ընդամենը կես միավոր էի զիջում Մանուելին, որոշակի հույսեր արթնացան։ Դրանք անիրատեսական էին, քանի Մանուել Պետրոսյանն ամբողջ առաջնության ընթացքում հիանալի հանդես եկավ և միանգամայն արժանի էր չեմպիոնությանը․ շատ լավ էր սկսել և ամեն ինչ իր օգտին էր ընթանում։ Միայն Ռոբերտ Հովհաննիսյանից կրած պարտությունը որոշակի հույսեր արթնացրեց թե՛ Ռոբերտի, թե՛ առաջնության մյուս մասնակիցների մոտ։
Նախորդ տարի հաջողություններ գրանցեցինք թե՛ անհատական մրցաշարերում և թե՛ թիմային։ Այս տարի նախատեսում ենք մասնակցել Եվրոպայի թիմային առաջնությանը։ Անհատական մրցաշարեր ևս կան։ Հուսանք՝ այս տարին պակաս չի լինի հաջողություններով, և ինչու ոչ մի՝ հնարավորություն կունենանք նախորդ տարվա հաջողությունները բարելավելու։
Տղամարդկանց 83-րդ առաջնության վերջին՝ 9-րդ տուրում, Սամվել Տեր-Սահակյանը հաղթել է Ռոբերտ Հովհաննիսյանին, ինչի շնորհիվ նվաճել է Հայաստանի չեմպիոնի կոչումը՝ վաստակելով 6.5 միավոր: Երկրորդ տեղը զբաղեցրել է գրոսմայստեր Մանուել Պետրոսյանը՝ 6 միավորով: Գրոսմայստերներ Ռոբերտ Հովհաննիսյանը և Տիգրան Հարությունյանը վաստակել են 5.5 միավոր: Լրացուցիչ ցուցանիշներով երրորդ տեղը զբաղեցրել է Ռոբերտ Հովհաննիսյանը:
