Տ. Պետրոսյանի անվան շախմատի տուն-մարզադպրոցում այսօր պարգևատրվել են Հայաստանի շախմատի տղամարդկանց և կանանց առաջնությունների հաղթողները։
Կանանց 78-րդ առաջնության հաղթողներին և մրցանակակիրներին պարգևատրել է ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը,
տղամարդկանց 83-րդ առաջնության հաղթողներին՝ Շախմատի ֆեդերացիայի նախագահի առաջին տեղակալ Սմբատ Լպուտյանը։
Հիշեցնենք՝ կանանց պայքարում չեմպիոնի կոչումը կարիերայում 5-րդ անգամ նվաճել է գրոսմայստեր Մարիա Գևորգյանը, իսկ տղամարդկանց պայքարում Հայաստանի կրկնակի չեմպիոն է հռչակվել գրոսմայստեր Սամվել Տեր-Սահակյանը։
«Առաջնությունը շատ հետաքրքիր ու լարված ընթացք ունեցավ, մինչև վերջին րոպեն պարզ չէր, թե ով է հաղթելու։ Շնորհավորում եմ բոլորին առաջնության կայացման առթիվ։ Հայաստանի առաջնությունում հաղթանակն իսկապես կարևոր նվաճում է։ Ուրախ եմ, որ մեծ հետաքրքրության կա Հայաստանի առաջնության հանդեպ։ Շնորհակալ եմ նաև ԿԳՄՍ նախարարությանը՝ մեր մարզաձևի հանդեպ ունեցած մեծ հետաքրքրության և աջակցության համար»,- ասում է Սմբատ Լպուտյանը։
ՀՀ ԿԳՄՍ նախարարի տեղակալ Կարեն Գիլոյանը ևս ընդգծել է Հայաստանի առաջնությունում հաղթանակի կարևորությունը․ «Շախմատն իսկապես այն քիչ մարզաձևերից է, որտեղ Հայաստանի չեմպիոն տիտղոսը շատ լուրջ նվաճում է։ Սա մեր ձեռքբերումն է։ Շատ լավ է , որ ունենք այսքան ուժեղ շախմատիստներ և Հայաստանի առաջնությունն անցնում է այսքան լարված պայքարում։ Հաջողություն ենք մաղթում նրանց, ովքեր տեղ վաստակեցին Հայաստանի հավաքականներում։ Շնորհավորում եմ չեմպիոններին և բոլոր մրցանակակիրներին։ Մաղթում եմ, որ այս հաջողությունը զարգացնեն միջազգային մրզասպարեզում և բարձր պահեն Հայաստանի պատիվը»։
Կանանց առաջնությունում հիմնական պայքարն ընթացել է փորձառու շախմատիստուհիներ Մարիա Գևորգյանի և Սուսաննա Գաբոյանի միջև, ինչի արդյունքում նրանք զբաղեցրել են առաջին և երկրորդ տեղերը համապատասխանաբար։ Կազմակերպիչների խոսքով, առավել անսպասելի է եղել երրորդ մրցանակին արժանացած Արփինե Գրիգորյանի արդյունքը։ Այս երեք շախմատիստուհիներն իրավունք են ստացել մասնակցելու Հայաստանի 79-րդ առաջնությանը, որը կանցկացվի արդեն 2024 թվականի հունվարին, իսկ չեմպիոնի կոչումը նվաճած Մարիա Գևորգյանը կընդգրկվի Հայաստանի հավաքականի կազմում` 2023 թվականի միջազգային մրցաշարերին մասնակցելու համար։ Մարիայի խոսքով՝ այս նվաճումը մեծ պատիվ է իր համար․
«Հայաստանի առաջնությունն իրապես շատ ուժեղ մրցաշար է, և նաև ամբողջ աշխարհի համար։ Շատ ուրախ եմ, որ կարողացա չեմպիոն դառնալ։ Շատ պարտավորեցնող է։ Սուսաննային հաղթելուց հետո համոզված էի, որ կկարողանամ նվաճել չեմպիոնությունը»,- խոստովանում է Մարիա Գևորգյանը։
Տղամարդկանց մրցաշարն անցել է չափազանց լարված պայքարում, վերջին տուրից առաջ 3-4 շախմատիստ հավակնել է չեմպիոնի կոչմանը։ Արդյունքում լավագույն եռյակը եզրափակել է գրոսմայստեր Ռոբերտ Հովհաննիսյանը, արծաթե մեդալին արժանացել է Մանուել Պետրոսյանը՝ 6 միավորով, իսկ հաղթողի տիտղոսը 6,5 միավորով նվաճել է Սամվել Տեր-Սահակյանը՝ վերջին՝ վճռորոշ տուրում առավելության հասնելով Ռոբերտ Հովհաննիսյանի նկատմամբ։
Հայաստանի 2023 թվականի չեմպիոնի խոսքով՝ վերջին տուրերում է իրապես հավատացել, որ կարող է պայքարել չեմպիոնության համար․
«Մրցաշարն ինձ համար բավական դժվար սկսվեց, քանի որ առաջին տուրում սևերով պարտվեցի Տիգրան Պետրոսյանին։ Երբ 7-րդ տուրում ոչ-ոքի խաղացի Արամ Հակոբյանի հետ, արդեն սկսեցի հույսեր փայփայել, որ կկարողանամ պայքարել մրցանակային տեղերի համար։ Բայց այդ հույսերը մեծ ու լուրջ չէին, քանի որ Մանուելը մեկնարկում մի քանի հաղթանակներ տարավ ու այնպիսի տեմպով էր սկսել, որ չէի կարծում՝ շանս կունենամ։
Երբ Ռոբերտը հաղթեց Մանուելին, մրցաշարի մյուս շախմատիստներին ու նաև ինձ որոշ հույսեր տվեց՝ առաջին տեղի համար պայքարելու։ Վերջին տուրում էլ դժվարին հաղթանակ տարա և նվաճեցի չեմպիոնությունը։ Կարողացա օգտագործել իմ հնարավորությունը»,- ասում է Սամվել Տեր-Սահակյանը։
Հիշեցնենք՝ Սամվել Տեր-Սահակյանը 9 հնարավորից վաստակել է 6.5 միավոր:
