Հայաստանի ծանրամարտի կանանց հավաքականը փետրվարի 19-ից մինչև մարտի 7-ը Ծաղկաձորում կանցկացնի ուսումնամարզական հավաք: Այդ մասին հայտնում է ՀԱՕԿ-ի պաշտոնական կայքը։ Գլխավոր մարզիչ Արտաշես Ներսիսյանն ասել է, որ հիմնական նպատակը աղջիկների ընդհանուր ֆիզպատրաստականության որակները բարելավելն է:
Ծաղկաձորյան հավաքից հետո աշխատանքները կշարունակվեն Երևանում: Մարզումները կունենան տեխնիկան հղկելու և կիլոգրամներն աստիճանաբար ծանրացնելու նշանակություն: Դրան կհաջորդի Մոսկվայում ապրիլի 3-ին մեկնարկող Եվրոպայի առաջնությունը: Հույս կա, որ Իզաբելա Յայլյանը և Տաթև Հակոբյանը Տոկիոյի Oլիմպիական խաղեր մեկնելու ուղեգրի կարժանանան: Նրանցից յուրաքանչյուրն արդեն մասնակցել է մրցակարգով սահմանված միջազգային վարկանիշային մրցաշարերից հինգին և մոսկովյան ստուգատեսը թվով վերջինը` վեցերորդը կլինի:
Գլխավոր մարզիչն անդրադարձավ Երևանում անցկացված Հայաստանի առաջնությանը: Մեր երկրում կանանց ծանրամարտի աշխարհագրությունն ընդարձակվել է: Հայտավորված շուրջ 50 մարզուհիները ներկայացնում էին Գյումրին, Արարատը, Էջմիածինը, Քասախը, Երևանն ու Վանաձորը:
