Չեմպիոնների լիգայի եզրափակչի մասնակիցներն արդեն հայտնի են։ Իսկ ահա այսօր կկայանան եվրագավաթային մյուս մրցաշարերի կիսաեզրափակիչների պատասխան հանդիպումները։
Նախ վերհիշենք՝ ովքեր են պայքարում եզրափակչի համար և ծանոթանանք հանդիպումների ժամանակցույցին․
Եվրոպա Լիգա
⏳ 23:00 Ռեյնջերս (Շոտլանդիա)-ՌԲ Լայպցիգ (Գերմանիա)
⏳ 23:00 Այնտրախտ (Գերմանիա)-Վեսթ Հեմ (Անգլիա)
Կոնֆերենցիաների լիգա
⏳ 23:00 Մարսել (Ֆրանսիա)-Ֆեյենորդ (Նիդեռլանդներ)
⏳ 23:00 Ռոմա (Իտալիա)-Լեսթեր (Անգլիա)
Սկսենք Եվրոպա լիգայից։ Բայց մինչ այդ նշենք մեկ կարևոր փաստ․ բացի հեղինակավոր տիտղոսից և պարգևավճարներից, այս մրցաշարերում թիմերը հետապնդում են ևս մեկ շատ կարևոր նպատակ․ Եվրոպա լիգայի հաղթողը հաջորդ մրցաշրջանում իրավունք է ստանում մասնակցել Չեմպիոնների լիգայի խմբային փուլին, իսկ Կոնֆերենցիաների լիգայի հաղթողը՝ ԵԼ-ի խմբային փուլին։ Իսկ դա, անկասկած, լրացուցիչ մոտիվացիա է յուրաքանչյուր թիմի համար։
ԵԼ-ի կիսաեզրափակչի առաջին խաղերում առավելությունը գերմանական ակումբների կողմն էր․ «Լայպցիգը» սեփական հարկի տակ դժվարին հաղթանակ տարավ 1-0 հաշվով, իսկ «Այնտրախտը» 2-1 հաշվով հաղթեց մրցակցի հարկի տակ։ Առավելությունը երկու խաղում էլ կազմում է ընդամենը մեկ գոլ և պատասխան խաղերում սպասվում է պարզապես թեժ ու անզիջում պայքար։
Մի փոքր հոգեբանորեն դժվար է լինելու «Լայպցիգի» համար, քանի որ թիմը պայքարում է երկու ճակատով․ առաջնությունում Տեդեսկոյի սաները պայքարում են լավագույն քառյակում հայտնվելու համար և վերջին խաղերում այդքան էլ տպավորիչ հանդես չեն գալիս։ Լավագույն քառյակում հայտնվելը թիմին հնարավորություն կտա մասնակցել ՉԼ-ի խմբային փուլում, բայց, չմոռանանք, նույն հնարավորությունը տալիս է նաև հաղթանակը ԵԼ-ում։ «Ցլերը» կարող են ՉԼ-ի ուղեգիր ձեռք բերել միանգամից երկու մրցաշարերում, բայց մյուս կողմից էլ, հնարավոր է թիմը չհայտնվի լավագույն քառյակում, իսկ ԵԼ-ում ձախողվի։ Դա, անշուշտ, լրացուցիչ հոգեբանական բալաստ է թե՛ խաղացողների, թե՛ մարզչական շտաբի համար։
Իսկ ահա մյուս թիմերը՝ «Այնտրախտը», «Վեսթ Հեմը» և «Ռեյնջերսը» գլխավորապես ֆիքսված են ԵԼ-ում հաղթելու վրա։ Գերմանական ակումբը առաջնությունում ոչ մի հարց չունի լուծելու։ Լոնդոնյան թիմը մաթեմատիկական շանսեր ունի լավագույն քառյակում տեղ զբաղեցնելու համար, սակայն, եկեք անկեղծ լինենք, դա ավելի շուտ «ֆանտաստիկայի բաժնից» է, իսկ «Ռեյնջերսի» պահը մի փոքր նման է «Լայպցիգի» իրավիճակին։ Թիմը պայքարում է չեմպիոնության համար, և հիշեցնենք, որ Շոտլանդիայի չեմպիոնը ավտոմատ ուղեգիր է ստանում ՉԼ-ի խմբային փուլ, քանի որ «Զենիթը», հայտնի պատճառներով (մանրամասներն՝ այստեղ), չի մասնակցի մրցաշարին։ Սակայն, վան Բրոնկհորստի թիմը այս պահին 6 միավորով զիջում է առաջնությունում «Սելթիկին», վերջինս էլ գտնվում է հիանալի մարզավիճակում և դժվար թե բաց թողնի այդ առավելությունը։ Մեծ հավանականությամբ, «Ռեյնջերսն» առաջնությունում կզբաղեցնի երկրորդ տեղը, ինչը թույլ է տալիս մասնակցել ՉԼ-ի որակավորման փուլին։ Չմոռանանք, ԵԼ-ում հաղթանակը տալիս է ուղիղ ուղեգիր ՉԼ․․․ այնպես որ, շոտլանդացիների համար շատ կարևոր է այս մրցաշարում հաղթելը։
Բայց, եկեք մի կողմ դնենք այդ ուղեգիրը․․․ Տիտղոս․․․ սա ևս շատ կարևոր է այս կվարտետի յուրաքանչյուր ներկայացուցչի համար։
Տեդեսկոն «Սպարտակում» իր արկածներից հետո պետք է ապացուցի, որ ինքը դեռ հեռանկարային թոփ մարզիչ է, իսկ իր ներկայիս ակումբը՝ «Լայպցիգը», բավականին երիտասարդ ակումբ է, այսպես ասած՝ նորեկ եվրագավաթներում, ու մինչ այժմ իր թանգարանում ոչ մի միջազգային գավաթ չունի։ Սա ևս մեկ մոտիվացիա է․․․ Ինչ վերաբերում է մյուս երեքին, ապա այս թիմերը վաղո՜ւց ինչ-որ բան չեն նվաճել միջազգային ասպարեզում․․․ Ժամանակն է արդեն դա շտկել։ Հետաքրքիր մեկ փաստ ևս․ այս տարի ԵԼ-ում կարող է լինել գերմանական եզրափակիչ, կամ էլ՝ բրիտանական։ Այս պահին, ավելի հավանական է թվում առաջինը, սակայն․․․ ՉԼ-ում էլ բոլորը սպասում էին անգլիական եզրափակիչ։
Կոնֆերենցիաների լիգայում ոչ պակաս թեժ է լինելու։ Այստեղ ևս երկու զույգերում ակնհայտ ֆավորիտ չկա առաջին խաղերից հետո։
«Ռոման» և «Լեսթերն» առաջին խաղում չպարզեցին հաղթողին՝ 1-1, իսկ «Ֆեյենորդը» սեփական հարկի տակ 3-2 հաշվով հաղթեց «Մարսելին»։ Ի տարբերություն ԵԼ-ի թիմերի, այստեղ ավելի շատ, հավանաբար, թիմերը մոտիվացված են հենց տիտղոսը նվաճելու համար։ Բացի «Լեսթերից», մյուս թիմերը ևս վաղուց տիտղոսներ չեն նվաճել միջազգային հարթակում, իսկ «աղվեսներն» ընդհանրապես ոչ մի տիտղոս էլ չունեն եվրագավաթներում։ Բացի այդ, ի տարբերություն մյուս երեք թիմերի, Ռոջերսի թիմն Անգլիայի առաջնությունում դժվար թե ապահովի որևէ եվրագավաթային ուղեգիր, այնպես որ, այս մրցաշարում հաղթանակը գրեթե միակ հնարավորությունն է աշնանը կրկին միջազգային ասպարեզում ներկայանալու համար։ Երկու մոտիվացիան քիչ չէ և «Լեսթերն» ամեն ինչ կանի իր նպատակին հասնելու համար։
«Ռոմայի» համար բավականին բարդ ժամանակշրջան է․ առաջիկա խաղերում կբացակայի թիմի առաջատարներից մեկը, եթե ոչ առաջատարը՝ Հենրիխ Մխիթարյանը, թիմն առաջնությունում պայքարում է ԵԼ-ի ուղեգիր տվող գոտում ամրապնդվելու համար (որը տալիս է նաև Կոնֆերենցիաների լիգայում հաղթանակը), կարճ ասած՝ Մոուրինյուի համար շատ դժվար հատված է։ Ինչ վերաբերում է մյուս զույգին՝ այստեղ ևս սպասվում է շատ դժվար և անկանխատեսելի դիմակայություն։
Ամփոփելով, նշենք, որ Չեմպիոնների լիգայի կիսաեզրափակիչները ապացուցեցին, որ այս փուլում չկան ակնհայտ ֆավորիտներ, հնարավոր է ամեն ինչ, այնպես որ, նույնն էլ ակնկալվում է մյուս երկու մրցաշարերի կիսաեզրափակիչներում․․․ Զինվում ենք ադու-բուդիով, քաղցրեղենով ու զովացուցիչ ըմպելիքներով ու վայելում ենք այս երեկոյի թեժ ու անկանխատեսելի հանդիպումները․․․
Վար Բաբայան
