Եռացատկորդ Լևոն Աղասյանը, որը վերջերս հաղթող է դարձել Բալկանյան երկրների՝ մարզասրահում անցկացվող 27-րդ առաջնությունում, ArmSport-ի հետ զրույցում կիսվել է տպավորություններով:
«Իմ ելույթից դժգոհ չեմ ` չնայած ցածր արդյունքին։ Բավականին հեռու ցատկեր եմ արել, բայց այդ ցատկերը որպես արդյունք չգրանցվեցին, որովհետև ցատկատախտակը թույլատրելիից շատ տրորեցի»,- ասում է Աղասյանը, որը ցույց է տվել 16.26 մ․ արդյունք ու դարձել ոսկե մեդալակիր։
Թեև Լևոնը բազմիցս մասնակցել է Ստամբուլում անցկացվող մրցաշարին, ասում է՝ այս անգամ զգացողություններն այլ էին.
«Այս տարի ուրիշ զգացողությամբ եմ մասնակցել այս մրցաշարին։ Առաջին անգամն էր, որ պատերազմից հետո մեկնում ենք Թուրքիա, և հաղթելու ցանկությունս մեծ էր։
Ոսկե մեդալի համար շատ ուրախ եմ, և սա կլինի այս տարվա հաղթանակների սկիզբը»:
Աղասյանը մարտին Սերբիայի մայրաքաղաք Բելգրադում կմասնակցի փակ մարզադահլիճների աշխարհի առաջնությանը: Այդ մրցաշարով կապանցի մարզիկը կավարտի ձմեռային մրցաշրջանը. «Մարզվում եմ Երևանում։ Լավ մարզավիճակում եմ գտնվում, բայց ամեն ինչ որոշվում է մրցման պահին ու մրցման վայրում: Անկեղծ ասած, չեմ սիրում խոսել սպասելիքների մասին»:
Աղասյանի խոսքով, ամառային մրցաշրջանը կմեկնարկի մայիսի վերջին, բայց մրցաշարերի մասին դեռևս հստակ տեղեկություններ չկան:
Հիշեցնենք՝ մարզասրահների աշխարհի առաջնությունը կանցկացվի Սերբիայում մարտի 18-ից 22-ը:
Ինչ վերաբերում է աթլետիկայի Հայաստանի հավաքականին, ապա հունիսի 11-ին մեր ընտրանին Մալթայում ուժերը կչափի Եվրոպայի փոքր երկրների առաջնությունում, իսկ մայիսին և օգոստոսին՝ աշխարհի ու Եվրոպայի առաջնություններում:
