Քևին Սիսթրոմի ու Մայք Կրիգերի ստեղծած սոցիալական հարթակը շատ շուտով գալու էր մարտահրավեր նետելու Facebook-ին, այնպիսի մարտահրավեր, որ հարթակի տերը դառնալու համար հայտնի Մարկ Ցուկերբերգը պատրաստ էր միլիարդներ ծախսել։ Ինսթագրա՜մ․․․
Ողջու՜յն։ Օրեր առաջ համաշխարհային ֆուտբոլի գլխավոր աստղերից մեկը՝ Կրիշտիանու Ռոնալդուն իր հերթական ռեկորդը թարմացրեց, սակայն այս անգամ պորտուգալացի ֆուտբոլիստին դրա համար պետք չէր ինչ-որ հրաշալի բան անել կանաչ խաղադաշտում։ Ամեն ինչ եկավ վիրտուալ աշխարհի տիրույթում։ Ռոնալդուն դարձավ առաջին մարդը աշխարհում, ով Instagram-ի իր էջում 200 միլիոն ու արդեն ավել հետևորդ ունի։ Եկեք շոշափենք այս թեման։
Նախ սկսենք նրանից, որ ամեն դեպքում Ռոնալդուն էջերի տեսանկյունից առաջատարը չէ։ Ինսթագրամի պաշտոնական էջը Ինսթագրամում ունի 330 միլիոն հետևորդ։ Այնպես որ, Ռոնալդուն դեռ ունի բարձունքներ հաղթահարելու։
Ինսթագրամում ամենաշատ հետևորդ ունեցող էջեր / թոփ-10
1․ Ինսթագրամ (@Instagram) – 330 միլիոն հետևորդ
2․ Կրիշտիանու Ռոնալդու (@cristiano) – 200 միլիոն հետևորդ
3․ Արիանա Գրանդե (@arianagrande) – 173 միլիոն հետևորդ
4․ Դուեյն Ջոնսոն (@therock) – 170 միլիոն հետևորդ
5․ Սելենա Գոմես (@selenagomez) – 167 միլիոն հետևորդ
6․ Քայլ Ջեներ (@kyliejenner) – 160 միլիոն հետևորդ
7․ Քիմ Քարդաշյան (@kimkardashian) – 158 միլիոն հետևորդ
8․ Լիոնել Մեսսի (@leomessi) – 142 միլիոն հետևորդ
9․ Բեյոնսե (@beyonce) – 139 միլիոն հետևորդ
10․ Նեյմար (@neymarjr) – 132 միլիոն հետևորդ
Մինչ մարզական աշխարհը արձանագրում էր Ռոնալդուի ոչ ֆուտբոլային, բայց տպավորիչ ռեկորդը, բրիտանական ամենապրովոկացիոն թերթերից մեկը փորձեց հասկանալ, թե 200 միլիոն օգտատերերից քանիսի՞ն կարելի է համարել իսկապես օգտատեր, իսկ քանիսին՝ ֆեյք։ Այսպես, The Sun-ը, հղում անելով HypeAuditor-ին, գրեց, որ Ռոնալդուին հետևող էջերից ավելի քան 50 միլիոնը ֆեյքեր են։
Օ՜ ո՛չ, ինչպե՞ս։ Հիմա պարզաբանենք կայքի պարզաբանումը։ Ներեցե՛ք կրկնաբանության համար։ Եվ այսպես, աղբյուրի պնդմամբ՝ պորտուգալացի գերաստղին հետևողներից 18,7 տոկոսը այսպես կոչված «կասկածելի հաշիվներ» են, որոնք զբաղվում են մեկնաբանությունների, հավանումների (like), և բաժանորդների լցոնմամբ։ Հետևորդների ևս 6,4 տոկոսը համարվում են զանգվածային բաժանորդներ, որոնք ավտոմատացված ռեժիմով բաժանորդագրված են ավելի քան 1500 էջերի։ Մի խոսքով, եթե հավատանք այս հետազոտությանը, ապա Ռոնալդուի հետևորդների 25,1 տոկոսը, այսինքն 50,2 միլիոն հետևորդները ֆեյք են։
Ամեն դեպքում սա բնական երևույթ է ցանկացած աստղի հաշվի պարագայում։ Նման մեծ պորտալում դժվար է պատկերացնել, որ միլիոնավոր օգտատերերի մեջ բոլորը սովորական մարդիկ են և չկա գեթ մեկ կեղծ էջ։
Ռոնալդուի ակտիվությունը Instagram-ում տալիս է իր արդյունքը։ Շատ են լինում դեպքեր, երբ Կրիշտիանուն ուղիղ եթեր (live) է մտնում ու սկսում շփվել իր երկրպագուների հետ, ցուցադրում է իր շքեղ առանձնատունը։ Այստեղ կա կարևոր նրբերանգ։ Ռոնալդուին անկասկած շատ է օգնում այն փաստը, որ նա ազատ խոսում է մի քանի լեզուներով։
Եթե նման ուղիղ եթեր աներ Մեսսին, համաձայնվեք առնվազն հետաքրքիր չէր լինի, քանի որ արգենտինացին անգամ անգլերեն է դժվարությամբ խոսում։ Իսկ CR7-ը «չռթում» է թե՛ պորտուգալերեն, թե՛ իսպաներեն, թե՛ անգլերեն։ Եվ իհարկե, ասածս չունի ենթատեքստ Մեսսիի լեզվական գիտելիքների բացը ի ցույց դնելու։ Լեոն ողջ կարիերայի ընթացքում խաղում է Իսպանիայում ու պարտավոր չէ խոսել թեկուզ անգլերենով։
Բացի ֆուտբոլիստ լինելուց Ռոնալդուն նաև կոմերցիոն տեսանկյունից ուղղակի ԴԵՄՔ է։ Չկա ուրիշ բառ այդ բոլոր երևույթները նկարագրելու համար։ Ահա պատճառներից մեկը, թե ինչու է նա ավելի ցանկալի Instagram-ում, քան օրինակ Նեյմարը։ Զուգահեռներ տանելով՝ եկեք մի պահ մտածենք, թե ինչու Դևիդ Բեքհեմը ավելի շատ հետևորդ ունի նույն պորտալում, քան ենթադրենք իր նախկին թիմակից Ռոբերտո Կառլոսը։
Խելահեղ եկամուտների տիրույթ
Մինչ 200 միլիոն հետևորդի շեմը հաղթահարելը, Ռոնալդուն մեկ այլ ռեկորդ էր գրանցել Ինստագրամի միջոցով, որը ևս բացառիկ էր։ Բանից պարզվում է Ռոնալդուն տարեկան կտրվածքով ավելի շատ գումար է վաստակում Ինստագրամի հրապարակումներից, քան օրինակ «Յուվենտուսում» իր մրցելույթներից։ Ռոնալդուի աշխատավարձը Թուրինում մոտավոր կազմում է տարեկան 31 միլիոն եվրո, մինչդեռ Ինստագրամում նա 47,8 միլիոն դոլար է աշխատել մեկ տարում։
Ինստագրամից ստացած եկամուտներ գովազդային հրապարակումների համար-թոփ-10
1․ Կրիշտիանու Ռոնալդու – 47,8 միլիոն դոլար
2․ Լիոնել Մեսսի – 23,3 միլիոն
3․ Քենդալ Ջեներ – 15,9 միլիոն
4․ Դևիդ Բեքհեմ – 10,7 միլիոն
5․Սելենա Գոմես – 8 միլիոն
6․ Նեյմար – 7,2 միլիոն
7․ Զլատան Իբրահիմովիչ – 4 միլիոն
8․ Քայլ Ջեներ – 3,8 միլիոն
9․ Ռոնալդինյո – 2,6 միլիոն
10․ Խլոե Քարդաշյան – 1,20 միլիոն
Մոլորակի ամենահայտնի սոցիալական վիրտուալ հարթակներից մեկում ֆուտբոլիստի կողմից 200 միլիոն հետևորդի շեմը հաղթահարելը հերթական անգամ խոսում է այն մասին, որ ֆուտբոլը իր մասսայականությամբ կարող է մարտահրավեր նետել ցանկացած բանի։ Եվս մեկ անգամ պետք է ընդգծել Կրիշտիանու Ռոնալդուի գործոնը։ Եթե ոչ նա, ապա ով պետք է առաջինը հատեր 200 միլիոն հետևորդների սահմանը․․․
Արամ Սահակյան
