Շեյխերի դերբի, ով է քաղաքում շերիֆը, Ալեգրին ընդդեմ Տուխելի․ ՉԼ անոնս

Այսօր մեկնարկում է Չեմպիոնների Լիգայի խմբային փուլի երկրորդ տուրը։ Այս երեկո և վաղը կկայանան մի շարք սկզբունքային հանդիպումներ։ Համառոտ ծանթանանք այս պահի դրությամբ խմբերում տիրող իրավիճակին և տուրի գլխավոր իրադարձություններին։

«Շեյխերի դերբին»․․․ Այս տուրի գլխավոր զարդերից մեկը՝ ՊՍԺ-«Սիթի»։ Ի՞նչ սպասել այսօրվա խաղից․․․ անկեղծ, բացարձակապես գաղափար չունենք։ Սուպերգալակտիկոն ընդդեմ Գվարդիոլայի ավազակախմբի․․․ և սա ձեզ համար Դավիթի և Գողիաթի մենամարտը չէ, սա տիտանների բախում է։ Սառը դատելով՝ կարելի է ասել, որ այս պահի դրությամբ մի փոքր առավելություն կարող է ունենալ անգլիական ակումբը․ թիմը բալանսավորված է, խաղակցված, ինչը չի կարելի ասել այսօրվա տանտերերի մասին․ ՊՍԺ-ի հիմնական կազմը լուրջ փոփոխությունների է ենթարկվել այս տարի, և դեռ ակնհայտ է խաղակցվածության պակասը։ Բայց ֆուտբոլը հենց դրա համար ենք սիրում, որ նման խաղերում երբեք չես կարող 100 տոկոսանոց վստահությամբ առավելություն տալ որևէ կողմին։

Մյուս խաղում «Լայպցիգը» կփորձի առաջին միավորները վաստակել «Բրյուգեի» հետ խաղում։ Վերջինս ևս «ամուր ընկույզ» է, իսկ բելգիացիներն էլ դեմ չեն լինի զարգացնել դեռ առաջին տուրում ունեցած հաջողությունը։ Այնպես որ, այստեղ ևս ամեն ինչ անկանխատեսելի է։

28.09/ ՊՍԺ «Մանչեսթեր Սիթիի» / 23:00
28.09/ «Լայպցիգ»-«Բրյուգե» / 23:00

Առաջին տուրից առաջ այս խմբում շատերը բացահայտ ֆավորիտ էին համարում «Լիվերպուլին» և «Աթլետիկոյին», սակայն «Միլանն» ու «Պորտուն» ապացուցեցին, որ այստեղ միավորներ բաժանողի դերում չեն լինելու։ Իտալացիները, չնայած պարտությանը, համառ դիմադրություն ցույց տվեցին «Էնֆիլդում», իսկ «վիշապները» նույնիսկ միավորներ խլեցին Սիմեոնեյի թիմից։ Այնպես որ, այս խմբում այսօր ևս թեժ է լինելու։

28.09/ «Պորտու»- «Լիվերպուլ» / 23:00
28.09/ «Միլան»-«Աթլետիկո» / 23:00

Իսկ ահա այս խմբում, դեռ առաջին տուրում «Այաքսն» ու «Բորուսիան» ցույց տվեցին՝ ովքեր են կվարտետում գլխավորները։ Ալլերի բենեֆիսը՝ պոկերի տեսքով, նախորդ տուրի գլխավոր զարդերից մեկն էր․ այսօր ևս ինչ-որ բան հուշում է, որ «Բեշիքթաշին» ծանր երեկո է սպասվում Ամստերդամում։ Ինչ վերաբերում է այս խմբի մյուս զույգին, ապա «Սպորտինգը» բոլորին «մաղում» է ներքին առաջնությունում, բայց միջազգային ասպարեզում դեռ չի տպավորում։ Կարծում ենք, որ «Բորուսիան» այսօր պետք է որ խնդիրներ չունենա Լիսաբոնում։

28.09/ «Այաքս»- «Բեշիքթաշ» / 20:45
28.09/ «Բորուսիա»-«Սպորտինգ» / 23:00

Չեմպիոնների լիգայի գլխավոր բացահայտումը՝ «Շերիֆը», առաջին տուրում փորձեց բոլորին ցույց տալ, թե ով է քաղաքում շերիֆը։ Եվ արդեն բոլորդ գիտեք, որ դա նրանց հաջողվեց՝ սենսացիոն հաղթանակ տանելով «Շախտյորի» նկատմամբ։ Այսօր մրցակիցն շատ ավելի բարդ է․ «Ռեալը» ևս գտնվում է ֆանտաստիկ մարզավիճակում, և դժվար է պատկերացնել, որ Վերնիդուբի սաները ևս մեկ սենսացիա կգրանցեն Մադրիդում։ Համենայն դեպս, շաաաա՜տ հետաքրքիր կլինի հետևել այսօրվա դիմակայությանը։

Մյուս խաղում, կարծում եմ, «Ինտերը» կկարողանա առաջին միավորները վաստակել այս մրցաշարում, չնայած՝ «Շախտյորն» էլ երբեք չի եղել «դյուրամարս» մրցակից։ Պարզապես, ներկայումս ուկրաինական գրանդն այդքան էլ սարսափելի չի թվում, և, եթե անկեղծ, այն տպավորությունն է, որ նրանց համար նույնիսկ դժվար կլինի պայքարել երրորդ տեղի համար․․․

28.09/ «Շախտյոր»- «Ինտեր» / 20:45
28.09/ «Ռեալ»-«Շերիֆ » / 23:00

«Բավարիան», անխոս, այս պահի դրությամբ ֆավորիտն է այս խմբում (ընդհանրապես՝ մրցաշարում)։ Այնպես որ, թեժ պայքար է սպասվում երկրորդ տեղի համար, որքան էլ որ անսովոր է դա ասել «Բարսելոնայի» առկայության դեպքում։ Դե ինչ, այսօր կտեսնենք՝ կատալոնացիներն արդյո՞ք կկարողանան ապացուցել, որ վաղ է իրենց հետ հաշվի չնստել։

29.09/ «Բավարիա»- «Դինամո» / 23:00
29.09/ «Բենֆիկա»-«Բարսելոնա» / 23:00

«Յանգ Բոյսից» ՄՅՈՒ-ի կրած պարտությունը պատահականություն էր, թե՞՝ ոչ, ամեն ոք ունի իր կարծիքը։ Բայց այս տուրում մրցակիցն ավելի ահեղ է․ հիշեցնենք՝ ՄՅՈՒ-ն ու «Վիլյառեալը» մայիսին հանդիպեցին ԵԼ եզրափակչում և ավելի ուժեղ գտնվեցին իսպանացիները։ Կկարողանա՞ն մանկունիանցիները ռևանշի հասնել թիմի նորեկ Ռոնալդուի հետ․․․ դա կլինի ևս մեկ ինտրիգ այս տուրում։

29.09/ «Ատալանտա»- «Յանգ Բոյս» / 20:45
29.09/ «Մանչեսթեր Յունայթեդ»-«Վիլյառեալ» / 23:00

Ամենահավասար խումբն՝ ըստ իս։ Եվ դա ապացուցում են նույնիսկ թվերը։ Սա միակ խումբն է, որտեղ առաջին տուրից հետո բոլոր թիմերը վաստակել են մեկակական միավոր։ Կանխատեսում եմ, որ այս դուելներից մեկը ևս կավարտվի ոչ-ոքի․․․ Ընդհանրապես, այս կվարտետին հետևելը հետաքրքիր է, ինտրիգներն այստեղ  շատ են․ կկարողանա՞ Ֆրանսիայի չեմպիոն «Լիլը» վերջապես լսեցնել իր մասին, «Սևիլյան» ինչպես միշտ ներկայանում է շատ հետաքրքիր նախագծով, «Զալցբուրգի» երիտասարդ նոր տաղանդները փորձելու են կրկնել Հոլանդի, Մինամինոյի, Սոբոսլայիյի արկածները, իսկ «Վոլֆսբուրգը»․․․ անձամբ ինձ համար խմբային փուլի «սև նժույգներից» մեկն է։

29.09/ «Զալցբուրգ»- «Լիլ» / 23:00
29.09/ «Վոլֆսբուրգ»-«Սևիլյա» / 23:00

Տուրի զարդերից մեկը կլինի «Յուվենտուսի» և «Չելսիի» դիմակայությունը․ Անյելին ընդդեմ Տուխելի․․․ հիանալի աֆիշա այս տուրի համար։ Այսօր ականատես կլինենք երկու տակտիկների հակամարտության և հետաքրքիր կլինի հետևել, թե ինչպես է ճգնաժամի մեջ գտնվող «Յուվեն» փորձելու դիմակայել ՉԼ գործող չեմպիոնին։

Մյուս խաղում ևս հետաքրքիր ինտրիգ է սպասվում․ կկարողանա՞ն արդյոք Կլաուդինյոն և ընկերները սեփական հարկի տակ հաղթել մրցաշարի աութսայդերներից մեկին՝ «Մալմոյին»․․․ Կիմանանք արդեն այս տուրում։

29.09/ «Զենիթ»- «Մալմո» / 20:45
29.09/ «Յուվենտուս»-«Չելսի» / 23:00

Առաջին տուրում միայն երեք ֆուտբոլիստ է դարձել 1-ից ավել գոլի հեղինակ՝ Ալլերը, Նկունկուն և Լևանդովսկին։ Հետաքրքիր է, ովքե՞ր կդառնան երկրորդ տուրի ամենաարդյունավետ ֆուտբոլիստները․․․

Վար Բաբայան