Տրանսֆերային անցուդարձ․ Հովհաննիսյանը հնարավոր է տեղափոխվի թոփ լիգա, Մխիթարյանը մնում է Ռոմայում, Ռոնալդուն ու Ռամոսը կհեռանա՞ն

Ամառային տրանսֆերային պատուհանն արդեն բացել է փեղկերն ու արդեն իսկ որոշ ակումբներ կատարել են նոր ձեռքբերումներ։ Իսկ որոշ ֆուտբոլիտների շուրջ չեն դադարում շրջանառվել տրանսֆերային տարբեր նորություններ։ Առաջարկում ենք ծանոթանալ վերջին տրանսֆերային նորություններին և արդեն կայացած գործարքներին։

«Ինտերը» կարող է ձեռք բերել ՊՍՎ-ի հարձակվող Դոնյել Մալենին: Այս մասին հայտնում է Tuttosport- ը: Միլանյան ակումբը հարձակվողին ձեռք կբերի, եթե  Լաուտարո Մարտինեսը հեռանա թիմից այս ամառ:

Իր հերթին «Յուվենտուսի» գլխավոր մարզիչ Մասիմիլիանո Ալեգրին հանդիպելու է ակումբի ղեկավարության հետ ՝ քննարկելու ակումբի տրանսֆերային քաղաքականությունը: Այս մասին հաղորդում է calciomercato.com-ը: «Յուվենտուսի» նոր գլխավոր մարզիչը թուրինյան ակումբի ղեկավարությանը խնդրել է գնել նոր կենտրոնական հարձակվող՝ անկախ այն բանից ՝ Կրիշտիանու Ռոնալդուն կմնա ակումբում, թե՝ ոչ: Ալեգրիի կարճ ցուցակում ընդգրկված են երեք խաղացողներ՝ Արկադիուշ Միլիկը «Նապոլիից», Դուշան Վլահովիչ ՝ «Ֆիորենտինայից» և Դոնիել Մալենը՝ ՊՍՎ-ից:

Հաղորդվում է, որ Ալեգրին ցանկանում է ուժեղացնել նաև կիսապաշտպանության գիծը և ցանկանում է թիմում տեսնել «Մանչեսթեր Յունայթեդի» կիսապաշտպան Պոլ Պոգբային:

Մադրիդի «Ռեալի» պաշտպան Սերխիո Ռամոսը չի ընդունել ակումբի առաջարկը նոր պայմանագիր կնքելու վերաբերյալ: Այս մասին հաղորդում է MundoDeportivo-ն: Ինչպես հաղորդվում է, մադրիդյան ակումբի ղեկավարությունը չի փոխի պայմանագրի պայմանները, որոնք առաջարկվել են թիմի ավագին: «Սերուցքայինները» առաջարկում են մեկ տարվա պայմանագիր՝ ֆուտբոլիստի աշխատավարձի 10% կրճատմամբ: Ռամոսը ցանկանում է երկու տարվա պայմանագիր կնքել:

Փոխարենը՝ Մադրիդի «Ռեալն» իր պաշտոնական կայքում հայտնել է թիմի կիսապաշտպան Լուկաս Վասկեսի հետ պայմանագիրը: Ֆուտբոլիստի հետ նոր պայմանագիրը նախատեսված է մինչև 2024 թվականի ամառը:

ՊԱՇՏՈՆԱԿԱՆ․ «Չելսին» հայտարարեց հարձակվող Օլիվյե Ժիրուի պայմանագիրը մեկ տարով երկարաձգելու մասին: Նախորդ պայմանագրի ժամկետը ֆրանսիացի ֆուտբոլիստի հետ ավարտվում էր այս ամառ: Ժիրուն «Չելսիին» միացել է   2018-ի ձմռանը: «Կապույտների» կազմում նա անցկացրել է 119 հանդիպում և խփել 39 գոլ: Թիմը հայտարարել է նաև պաշտպան Տիագո Սիլվայի հետ պայմանագիրը երկարաձգելու մասին: 36-ամյա բրազիլացի խաղացողի հետ նոր համաձայնագիրը ուժի մեջ է մինչև 2021/22 մրցաշրջանի ավարտը: Եվ ամենակարևորը՝ «Չելսին» իր պաշտոնական կայքում հայտնել է թիմի գլխավոր մարզիչ Թոմաս Տուխելի հետ պայմանագիրը մինչև 2024 թվականը երկարաձգելու մասին:

«Այաքսի» դարպասապահ Անդրե Օնանան համաձայնության է եկել Լոնդոնի «Արսենալի» հետ պայմանագրի անձնական պայմանների շուրջ: Այդ մասին հայտնում է լրագրող Նիկոլո Շիրան։ Պայմանագիրն ուժի մեջ կլինի մինչև 2024 թվականը ևս մեկ մրցաշրջան երկարաձգելու հնարավորությամբ: Այժմ ակումբները պետք է շտկեն գործարքի վերջին մանրամասները: 25-ամյա Օնանան Բարսելոնայի սան է: Հիշեցնենք, որ 25-ամյա կամերունցի դարպասապահը 12 ամսով որակազրկվել է այն բանից հետո, երբ նրա մոտ դոպինգ էր հայտնաբերվել։ Օնանան այս որոշումը բողոքարկել է մարզական արբիտրաժային դատարանում (CAS), որը դարպասապահի բողոքարկումը կքննի հունիսին։ Եթե բողոքարկումը բավարարվի, ապա նրա որակազրկման ժամկետը կկրճատվի՝ հասցվելով 8 ամսի, և կավարտվի 2021 թվականի հոկտեմբերին։

ՊԱՇՏՈՆԱԿԱՆ․ «Բարսելոնայի» տնօրենների խորհուրդը վստահություն է հայտնել «Բարսելոնայի» գլխավոր մարզիչ Ռոնալդ Կումանի նկատմամբ: Նիդերլանդացի մասնագետ Ռոնալդ Կումանը մյուս մրցաշրջանում ևս կմարզի «կապտանռնագույններին»: «Քննարկումներից հետո մենք որոշեցինք շարունակել աշխատանքը Կումանի հետ: Նա գործող պայմանագիր ունի ակումբի հետ»,- հայտնել է «Բարսելոնայի» տնօրեն Ժոան Լապորտան:

ՊՍԺ-ն բանակցություններ է սկսել «Յուվենտուսի» հարձակվող Կրիշտիանու Ռոնալդուի տրանսֆերի հարցով: Tuttojuve-ն հայտնում է, որ փարիզցիները պորտուգալացուն դիտարկում են որպես Կիլիան Մբապեին փոխարինող, ով կարող է տեղափոխվել Մադրիդի «Ռեալ»: Ռոնալդուի տեղափոխությունը ՊՍԺ կունենա նաև մեծ կոմերցիոն նշանակություն, իսկ Nike-ը, որը ՊՍԺ-ի տեխնիկական հովանավորն է, պայմանագիր ունի Կրիշտիանուի հետ: Նշվում է, որ ակումբները քննարկում են Ռոնալդուի ու հարձակվող Մաուրո Իկարդիի հետ կապված փոխանակումը, քանի որ «Յուվենտուսը» մտադիր է ուժեղացնել հարձակվողի դիրքն այս ամառ:

Իր հերթին իսպանական հեղինակավոր AS պարբերականը նշում է, որ թուրինցիները պատրաստ են 25-30 մլն եվրոյի դիմաց բաժանվել հարձակվողից։ Այնուամենայնիվ, այս գործարքի իրականացումը կախված կլինի Ռոնալդուիի որոշումից։

«Ռոման»  շարունակում է դարպասապահի որոնումները: Այս մասին հաղորդում  է express.co.uk-ը: Աղբյուրի համաձայն, թիմի նոր մարզիչ Ժոզե Մոուրինյոն ցանկանում է ակումբում տեսնել իր նախկին ֆուտբոլիստ, «Տոտենհեմի» եւ Ֆրանսիայի ազգային հավաքականի դարպասապահ Ուգո Լյորիսին: Հաղորդվում է, որ Մոուրինյոն արդեն կապ է հաստատել 34-ամյա ֆրանսիացու հետ հնարավոր տեղափոխության հետ կապված:

Սակայան կա ևս մեկ հետաքրքիր տարբերակ․«Միլանի» դարպասապահ Ջանլուիջի Դոնարուման կարող է տեղափոխվել «Յուվենտուս», որը փորձում է վաճառել Վոյցեխ Շեսնիի տրանսֆերը, հայտնում է Tuttosport-ը: Թուրինյան ակումբը ցանկանում է վաճառել լեհ դարպասապահի տրանսֆերը, սակայն դժվար թե ինչ-որ ակումբ համաձայնվի վճարել Շեսնիին այդքան մեծ աշխատավարձ: Այս պարագայում Դոնարումային (կամ էլ հենց Շեսնիին) «Յուվեն» վարձավճարով կարող է ուղարկել «Ռոմա», որը հուսալի դարպասապահ է փնտրում, իսկ հակառակ ուղղությամբ կարող է գնալ Ալեսանդրո Ֆլորենցին։

Օրերս գրել էինք, որ «Բոկա Խունիորսը» պաշտոնական առաջարկ է արել Հայաստանի հավաքականի ֆուտբոլիստ Նորբերտո Բրիասկո Բալեկյանի տրանսֆերի համար (մանրամասներն՝ այստեղ)։ ESPN-ի լրագրող Դիեգո Մոնրոյը F90-ի եթերում նշել է.

ՊԱՇՏՈՆԱԿԱՆ․ «Բավարիայի» մամուլի ծառայությունը հայտարարեց հարձակվող Էրիկ Չուպո-Մոտինգի հետ պայմանագրի երկարաձգման մասին: Կամերունի հավաքականի հարձակվողի պայմանագիրը ուժի մեջ կլինի մինչև 2023 թվականի ամառ: Հարձակվողը մյունխենյան ակումբում է խաղում նախորդ տարվա հոկտեմբերից:

«Ինտերի» հարձակվող Ռոմելու Լուկակուն մեկնաբանել է շշուկներն այն մասին, թե ինքը կարող է հեռանալ միլանյան ակումբից: «Ես մնում եմ «Ինտերում»: Գուցե, չարժե, որ այսպես խոսեմ: Բայց արդեն զրուցել եմ Սիմոնե Ինձագիի հետ: Դրական զրույց էր: «Ինտերում» ինձ ամեն ինչ գոհացնում է»,- Լուկակուի խոսքերն է փոխանցում լրագրող Նիկոլո Շիրան:

ՊԱՇՏՈՆԱԿԱՆ․ Լոնդոնի «Արսենալից» հեռացել են պաշտպան Դավիդ Լուիսը, կիսապաշտպաններ Դանի Սեբալոսը և Մարտին Էդեգորը, դարպասապահ Մեթյու Ռայանը: Այս մասին հայտնում է անգլիական ակումբի մամուլի ծառայությունը: Սեբալոսը և Էդեգորը վարձավճարով հանդես էին գալիս «Արսենալում»: Երկու ֆուտբոլիստների տրանսֆերային իրավունքներն էլ  պատկանում են Մադրիդի «Ռեալին»:  Պայմանագրերի ժամկետը լրանալու պատճառով Լուիսն ու Ռայանը հեռացել են «Արսենալից»

«Կայրաթի» ֆուտբոլիստ Կամո Հովհաննիսյանը հայտնվել է հեղինակավոր գործակալներից մեկի դիտակետում (անունը չի նշվում), ով ներկա է եղել Խորվաթիայի և Հայաստանի ազգային հավաքականների ընկերական խաղին․ խաղն ավարտվեց 1:1 հաշվով:

Այս մասին հայտնում է Vesti.kz-ն՝ հղում անելով “Тень отца Гурмана” տելեգրամյան ալիքին։

Նշվում է, որ նման խաղերին միշտ էլ ներկա են հայտնի գործակալներ: Նրանցից մեկը, ով շատ հեղինակավոր է, եկել էր դիտելու երիտասարդ խորվաթներին, սակայն իր դիտակետում հայտնվել է Հովհաննիսյան: Հնարավոր է` Կամոն կարող է կրկնել իր հայրենակից Վարազդատ Հարոյանի ուղին և հայտնվել Եվրոպայի թոփ լիգաներից մեկում:

ՊԱՇՏՈՆԱԿԱՆ․ «Ռոման» պաշտոնական կայքում հայտնել է Հայաստանի հավաքականի կիսապաշտպան Հենրիխ Մխիթարյանի հետ պայմանագիրը երկարաձգելու մասին։ Այն նախատեսված է մինչև 2022 թվականի հունիսի 30-ը։

«Այս երկու տարվա մեջ «Ռոման» գրավել է ինձ։ Եվ դա շնորհիվ երկրպագուների անհավանական կրքի»,- ասել է Հայաստանի հավաքականի ավագը։