Այսօր՝ մայիսի 29-ին, Չեմպիոնների լիգայի եզրափակչի շրջանակում Պորտուգալիայի Պորտու քաղաքում կհանդիպեն անգլիական երկու թիմ՝ «Մանչեսթեր Սիթին» ու «Չելսին»։
Թիմերի հավանական մեկնարկային կազմերը՝ ըստ ՈՒԵՖԱ-ի․
«Մանչեսթեր Սիթի»-Էդերսոն, Ուոքեր, Սթոունզ, Ռուբեն Դիաշ, Զինչենկո, Բերնարդո Սիլվա, Ֆերնանդինյո, Գյունդողան, Մահրեզ, Դե Բրույնե, Ֆոդեն
«Չելսի»-Մենդի, Քրիստենսեն, Տիագո Սիլվա, Ռյուդիգեր, Ասպիլիկուետա, Ժորժինյո, Կանտե, Չիլվել, Պուլիշիչ, Վերներ, Մաունթ
Ճանապարհ դեպի եզրափակիչ
Խմբում Գվարդիոլայի սաները զբաղեցրին 1-ին հորիզոնականը՝ դուրս թողնելով «Պորտուին», «Օլիմպիակոսին» ու «Մարսելին»։ 1/8 եզրափակչում «Սիթին» ճանապարհից հեռացրեց Մյոնխենգլադբախի «Բորուսիային», քառորդում՝ Դորտմունդի «Բորուսիային»։
Կիսաեզրափակչում «Սիթին» մրցաշարից դուրս թողեց արդեն ՊՍԺ-ին՝ ընդհանուր դիմակայությունում հաղթելով 4-1 հաշվով։
Գվարդիոլայի թիմը պատմության մեջ առաջին անգամ դուրս եկավ ակումբային ամենահեղինակավոր մրցաշարի եզրափակիչ ու այսօր լավ շանս ունի նաև տիտղոսը նվաճելու համար։
«Չելսին» իր հերթին խմբային փուլում մրցեց «Սևիլյայի», «Ռենի» ու «Կրասնոդարի» հետ։ 1/8 եզրափակչից դուրս թողեց Մադրիդի «Ատլետիկոյին», քառորդից՝ «Պորտուին»։
Կիսաեզրափակչում լոնդոնցիները ճանապարհից հեռացրին Մադրիդի «Ռեալին»։ Տուխելի սաներն ընդհանուր դիմակայությունում հաղթեցին 3-1 հաշվով։
Վերջին անգամ ՉԼ եզրափակչում «Չելսին» խաղացել է 2011/12 մրցաշրջանում, որտեղ հաղթել է Մյունխենի «Բավարիային»:
Թիմերի միջև կայացած խաղերը
«Մանչեսթեր Սիթին» ու «Չելսին» իրար հանդիպել են ընդհանուր առմամբ 153 անգամ․ 61 անգամ հաղթել են լոնդոնցիները, 54 անգամ՝ «Սիթին», իսկ 38 խաղ ավարտվել է ոչ-ոքի։ Գոլերի տարբերությունը՝ 219-207՝ հօգուտ «Չելսիի»։
Սա թիմերի միջև եվրագավաթային առաջին խաղն է։ Մինչ այս նրանք միմյանց դեմ մրցել են միայն ներքին մրցաշարերում։
Ընթացիկ մրցաշրջանում «Սիթին» ու «Չելսին» 3 անգամ են խաղացել իրար դեմ։ Հունվարի 3-ին ԱՊԼ հերթական տուրն ավարտվեց «քաղաքայինների»՝ 3-1 հաշվով հաղթանակով։ Իսկ մյուս երկու խաղերում ուժեղ գտնվեց «Չելսին»․ ապրիլի 17-ին Անգլիայի Գավաթում (1-0) և մայիսի 8-ին՝ երկրի առաջնությունում (2-1): Այս երկու խաղերում լոնդոնցիներին արդեն մարզում էր Թոմաս Տուխելը։
Այս վիճակագրությունն, իհարկե, հոգեբանական մեծ առավելություն կտա լոնդոնյան թիմին։
Երկրպագուները
«Սիթին» Պորտուգալիայում աջակցության պակաս չի ունենա, այս մասին հոգացել է անձամբ ակումբի սեփականատեր Շեյխ Մանսուրը՝ ասելով, որ ակումբի երկրպագուների համար մի քանի հազար տոմս կգնի։
«Գվարդիոլան ու «Սիթին» հիանալի մրցաշրջան են անցկացրել: Չեմպիոնների լիգայի եզրափակչին հասնելն իսկապես պատմական պահ է ակումբի համար: Անհավատալիորեն կարևոր է, որ հնարավորինս շատ երկրպագուներ կարողանան ներկա լինել այս հատուկ խաղին»,-ակումբի մամուլի ծառայության հետ զրույցում ասել էր նա։
Ի տարբերություն «քաղաքայինների»՝ «Չելսիի» երկրպագուները իրար հետևից վերադարձնում են գնած տոմսերը։ Իսկ պատճառը հետևյալն է․ ՈՒԵՖԱ-ն ակումբներին հատկացրել է 5800-ական տոմս։ «Չելսին» արագորեն իրացրել է իր բաժնի 2800 տոմսը, որոնք հասանելի էին բաց վաճառքում։ Այդ տոմսերը գնած երկրպագուները պիտի ինքնուրույն հասնեն Պորտուգալիա։ Իսկ մնացած 3000 տոմսերի հետ, որոնց գնորդներն Անգլիայից Պորտուգալիա և հակառակ ուղղությամբ պիտի մեկնեին չարտերային չվերթով, խնդիրներ են ծագել։ Այդ տոմսերի գնորդները պիտի հավելյալ 200 ֆունտ վճարեն չարտերի համար, ինչը շատ երկրպագուների անարդար և թանկ է թվացել ու նրանք որոշել են ուղղակի վերադարձնել տոմսերը։
Այսպիսով, տրիբունաներում հաղթանակը, ամենայն հավանականությամբ, կլինի «Սիթիինը»։
Թիմերի ապագա աստղերը
Եզրափակիչն այսօր կորոշի լավագույն ակումբին, բայց այն նաև կարևոր է անհատ ֆուտբոլիստների տեսանկյունից։ Սա լավ շանս է հատկապես Ֆիլ Ֆոդենի ու Մեյսոն Մաունթի համար՝ ամրապնդելու իրենց նշանակությունն իրենց թիմերի համար, որոնց օգնեցին անցնել եզրափակիչ բերող ճանապարհը։
Ֆոդենն ու Մաունթը, միանշանակ, արդեն ոչ միայն Անգլիայում, այլև ողջ Եվրոպայում լավագույն երիտասարդ ֆուտբոլիստների թվում են։ Եվ նման տիտղոս նվաճելը յուրաքանչյուրի դեպքում էլ կընդգծի նրա բարձրակարգ լինելը։
Մարզիչների կարծիքներն ու սպասելիքները
Պեպ Գվարդիոլա․ ««Չելսին» խնդիրներ է ստեղծում բոլոր մրցակիցների համար։ Կան թիմեր, որոնք պիտի շատ եզրափակիչներով անցնեն, որպեսզի կարողանան հաղթել դրանցից մեկը։ Կան թիմեր էլ, որոնց մեկ եզրափակիչ է պետք, որն էլ կարողանում են հաղթել։ Հուսամ՝ սա հենց այդ դեպքն է»։
Թոմաս Տուխել․ «Միշտ դժվար է խաղալ Գվարդիոլայի թիմերի դեմ։ Ես դիտում էի նրա «Բարսելոնայի» խաղերը, որ սովորեմ նրանից։ Նա հաղթող մեքենաներ է պատրաստում»։
Չեմպիոնների լիգայի եզրափակիչը «Մանչեսթեր Սիթիի» ու «Չելսիի» միջև կսպասարկի իսպանական մրցավարական անձնակազմը։ Գլխավոր մրցավարը կլինի Անտոնիո Մատեու Լահոզը, նրան կօգնեն Պաու Սեբրիան Դևիսը և Ռոբերտո դել Պալոմարը։ VAR համակարգի պատասխանատուն կլինի Ալեխանդրո Էռնանդեսը, իսկ 4-րդ պաշտոնյան՝ Կառլոս դել Սելլո Գրանդեն։
Հիշեցնենք, որ ՉԼ եզրափակիչը պետք է կայանար Թուրքիայի Ստամբուլ քաղաքում, սակայն կորոնավիրուսի համավարակով պայմանավորված՝ ՈՒԵՖԱ-ն որոշեց փոխել հանդիպման վայրը, քանի որ Թուրքիան Մեծ Բրիտանիայի կառավարության այն երկրների ցանկում է, որտեղից վերադառանալիս պետք է անցնել 14-օրյա կարանտինային ռեժիմի։
