«Բավարիայի» հարձակվող Ռոբերտ Լևանդովսկին մեկնաբանել է իր թիմի չեմպիոնությունը Բունդեսլիգայում։ Մյունխենցիները 9-րդ տարին անընդմեջ հռչակվում են Գերմանիայի չեմպիոն։
«Մեզ համար կարևոր չէր, թե ինչ է տեղի ունեցել Լայպցիգում։ Ամենակարևորը խաղադաշտում ցույց տալն էր, որ մենք Գերմանիայի չեմպիոնն ենք։ Մենք հիանալի խաղ ցուցադրեցինք։ Ես միշտ ցույց եմ տալիս իմ առավելագույնն ու փորձում եմ ամեն ինչ տալ թիմի համար։ Մենք շարունակում ենք զարգանալ՝ սա պարզապես անհավանական է։ Ես կարող եմ շնորհակալ լինել, որ այսքան շատ գոլային փոխանցումներ եմ ստանում իմ թիմակիցներից»,- Լևանդովսկու խոսքերն է փոխանցում «Բավարիայի» մամուլի քարտուղարությունը։
Ընթացիկ մրցաշրջանում Լևանդովսկին 39 գոլ է խփել Բունդեսլիգայում և մոտեցել է «Բավարիայի» նախկին հարձակվող Գերդ Մյուլերին՝ մեկ մրցաշրջանի ընթացքում խփած գոլերի քանակով։
«Բավարիան» իր պատմության մեջ 31-րդ անգամ է դարձել Գերմանիայի չեմպիոն այն բանից հետո, երբ «Լայպցիգը» պարտվեց Դորտմունդի «Բորուսիային»․ առաջնության ավարտից 2 տուր առաջ մյունխենյան ակումբն իր համար ապահովեց Գերմանիայի չեմպիոնությունը, իսկ մայիսի 8-ին՝ արդեն չեմպիոնի կարգավիճակում, 6-0 հաշվով ջախջախեց Մյունխենգլադբախի «Բորուսիային», Լևանդովսկին էլ երեք գոլ գրանցեց իր ակտիվում։