Հայաստանի ազգային հավաքականի 33-ամյա հարձակվող Ալեքսանդր Կարապետյանը «Արարատ-Արմենիայի» կազմում իր առաջին իսկ խաղում ցույց տվեց բարձր կարգն ու հիանալի հանդիպում անցկացրեց՝ «Փյունիկի» հետ մրցավեճում՝ դառնալով գոլի ու գոլային փոխանցման հեղինակ:
«Շատ բարդ հանդիպում էր: «Փյունիկը» շատ լավ էր խաղում: Ուրախ եմ, որ գոլի հեղինակ դարձա ու օգնեցի թիմիս հաղթել»,-ArmSport-ի հետ զրույցում ասում է Կարապետյանը:
Հայաստանի ազգային հավաքականի ֆուտբոլիստը, որն իր կարիերայի ընթացքում հանդես է եկել Գերմանիայում, Լյուքսեմբուրգում և Ռուսաստանում, խոստովանում է՝ Հայաստանի առաջնության մակարդակն իրեն հաճելիորեն զարմացրել է.
«Հայաստանի առաջնության մակարդակը լավն է, եթե անկեղծ լինեմ՝ չէի սպասում: Շատ են լավ ֆուտբոլիստները, ովքեր ունեն ամբիցիաներ՝ ինչպես տեղացի, այնպես էլ արտասահմանցի: Ամբողջ աշխարհից սա մի մեծ միքս է: Նախքան Հայաստան գալս ես միայն արդյունքներին էի հետևում»:
«Շատ առաջարկներ ունեի տարբեր երկրներից, բայց որոշեցի տեղափոխվել Հայաստան: Սիրում եմ մեր երկիրը ու շատ մեծ ցանկություն ունեի մի օր Հայաստանում խաղալու: Ինձ հիանալի եմ զգում «Արարատ-Արմենիայում»:
«Տղաները հիանալի են: Կարծես՝ երկար ժամանակ է՝ այստեղ եմ խաղում: Նրանք ադապտացիոն փուլը շատ են հեշտացնում ինձ համար: «Արարատ-Արմենիայի հետ իմ նպատակը մեկն է՝ խաղալ եվրագավաթներում, ու դառնալ Հայաստանի չեմպիոն: Սա ոչ միայն իմ, այլև ամբղջ թիմի նպատակն է, ու մենք ամեն ինչ կանենք դրան հասնելու համար»,- ասում է 33-ամյա հարձակվողը:
Խոսելով հայաստանյան կյանքի մասին՝ Կարապետյանն ընդգծում է՝ ամենից շատ հայկական ուտեստներն է հավանում:
«Ապրում եմ քաղաքի կենտրոնում ու այնտեղ շատ են հիանալի ռեստորանները: Սիրում եմ հայկական ուտեստներ, Հայաստանի մրգերն ու բանջարեղենները: Մարդիկ շատ լավն են, շատ բայրացակամ են իմ հանդեպ: Ինձ այստեղ շատ լավ եմ զգում: Զգում եմ՝ ճիշտ էր իմ՝ այստեղ տեղափոխվելը», — ասում է Ալեքսանդր Կարապետյանը:
Հիշեցնենք՝ Ալեքսանդր Կարապետյանն «Արարատ-Արմենիա» տեղափոխվեց ռուսական «Տամբովից», որի շուրջ ստեղծված իրավիճակի մասին ֆուտբոլիստը չցանկացավ խոսել:
Հաջորդ հանդիպումն «Արարատ-Արմենիան» կանցկացնի վաղը՝ փետրվարի 25-ին՝ Չարենցավանի «Քաղաքային» մարզադաշտում հյուրընկալվելով «Արարատի» կողմից: Հանդիպման մեկնարկը 15:00-ին է:
