Հայաստանի Բարձրագույն խմբի առաջնության 20-րդ տուրի շրջանակում առաջնության առաջատար, գործող չեմպիոն «Արարատ-Արմենիան» ՀՖՖ Տեխնիկական/Ֆուտբոլի Ակադեմիայում հյուրընկալել էր Վանաձորի «Լոռիին»։
Առաջին կեսում Վարդան Մինասյանի սաները զգալի ակտիվություն էին դրսևորում։ Մի քանի անգամ վանաձորյան ակումբին վերահաս գոլից փրկեց թիմի դարպասապահ Վարդան Շահատունին։
Երկրորդ կեսի սկզբնամասում «Լոռին» մնաց 10 ֆուտբոլիստներով։ Երկրորդ դեղին քարտի համար դաշտից հեռացվեց Պրիմաել Յեուլե Ալեքսանդրը, ով խախտեց խաղի կանոնները Անտոն Կոբյալկոյի դեմ պայքարում։ Վերջինս լավ հնարավորություն ուներ գրավելու «Լոռիի» դարպասը։
10 ֆուտբոլիստներով մնալու հանգամանքից օգտվելով՝ Վարդան Մինասյանը թիմի գրեթե բոլոր ուժեղագույն ֆուտբոլիստներին նետեց մարտի։ «Արարատ-Արմենիան» բազմաթիվ գոլային պահեր ուներ, սակայն երբեմն դարպասաձողը, երբեմն էլ «Լոռիի» դարպասապահ Վարդան Շահատունին խոչընդոտում էին դարպասի գրավմանը։ Հանդիպման հաշիվն այդպես էլ չբացվեց՝ 0-0։
Այս արդյունքից հետո «Արարատ-Արմենիան» 38 միավոր ունի 20 խաղից հետո։ «Լոռին» 2-րդ տեղում է 34 միավորով։ Վանաձորյան թիմը ևս 20 հանդիպում է անցկացրել։