Երևանի «Նոայի» նորանշանակ գլխավոր մարզիչ Դմիտրի Գունկոն հարցազրույց է տվել ակումբի մամուլի ծառայությանը»: Հարցազրույցը ներկայացնում ենք ամբողջությամբ.
— Ի՞նչ զգացողություն ունեք՝ գլխավորելով թիմ` այսօրվա անհանգիստ Հայաստանում, հատկապես, մրցաշրջանի մեկնարկից ամիսներ անց:
— Նախ, ցանկանում եմ երախտագիտությունս հայտնել ակումբի ղեկավարությանը՝ հրավերի, աշխատելու հնարավորության, թիմի մաս լինելու և «Նոա» ակումբի պատմության մասը լինելու համար, ակումբ, որը ասպարեզում է հայտնվել ոչ վաղ անցյալում, բայց արդեն հասել է որոշակի հաջողությունների: Հասկանալի է, որ այդպիսի առաջարկի շուրջ մտածելու համար ժամանակ էր պահանջվուm: Ինձ այն ընձեռվեց, և ահա ես այստեղ եմ: Այո, հասկանում եմ, որ իրավիճակն ամենահանգիստը չէ: Այն, ինչ ես հիմա տեսնում եմ ՝ այստեղ ժամանելով, համընկնում է թիմի ղեկավարության կողմից ինձ նկարագրածի հետ: Ինչ վերաբերում է մրցաշրջանի՝ արդեն իսկ անցած հատվածին, ապա սա, կարելի է ասել, բավականին բարդ առաջնության սկիզբն է, որը տեղի է ունենում անհանգիստ ժամանակահատվածում՝ համավարակային իրավիճակի տեսանկյունից ոչ միայն Հայաստանում,Ռուսաստանում, այլև ամբողջ աշխարհում: Եվ դա պետք է ընդունել որպես իրականություն՝ այն բոլոր գործոնների նման, որոնք կարող են ազդել խաղացողների, նրանց պատրաստվածության վրա: Այնպես որ, ես տեսնում եմ, որ խաղերի օրացույցը «կոտրված» է: Թիմերը տարբեր քանակի հանդիպումներ են անցկացրել, հետաձգված շատ խաղեր կան, շատ խաղացողներ ներկայումս ինքնամեկուսացած են թագավարակի պատճառով, ինչը, կրկնեմ, այժմ բնորոշ է ոչ միայն Հայաստանին:
— Հաշվի առնելով այս ամենը, ի՞նչ նպատակներ և խնդիրներ է դնում Ձեր առջև ակումբի ղեկավարությունը:
— Այսպես ասեմ, այստեղ ակումբի ղեկավարության հետ մեր խնդիրն նպատակը առավելագույնն անելն է՝ հաղթել յուրաքանչյուր խաղում և նման իրավիճակում ձգտել բարձունքի:
— Ինչպե՞ս եք գնահատում Ձեր նոր ակումբը, և առհասարակ որո՞նք են ձեր առաջին տպավորությունները հայկական ֆուտբոլից:
— Բավականին բարդ առաջնություն է, ես դեռ պետք է այն ավելի խորը ուսումնասիրեմ: Այստեղ կան բավականին բարձրակարգ լեգեոներներ: Ես տեղյակ եմ նաև լիմիտի մասին, ինչը կապված է Հայաստանում ֆուտբոլի զարգացման հետ: Բնականաբար, ես դիտել եմ մի քանի խաղ, բայց ամբողջական պատկերացում կազմելու համար ավելի մանրամասն ուսումնասիրելու շատ բան կա:
— Ո՞րն է ձեր փիլիսոփայությունը ֆուտբոլում, ձեր պատկերացրած կատարյալ թիմը:
— Ճիշտ թիմը արդյունքի հասնող թիմն է: Ինձ համար ֆուտբոլը խաղ է, որպես արդյունքի հասնելու միջոց, և դա կախված է ներկայում խաղադաշտ դուրս եկող կատարողների որակից:
— Ձեզ գոհացնո՞ւմ է այն, ինչ արդեն տեսաք «Նոայում»:
— Ես արդեն ասել եմ, որ դեռ վաղ է եզրակացություններ անել: Ընդամենը 90 րոպե աշխատանքային ժամանակ ունեցա առաջին մարզման ընթացքում, իսկ մինչ այդ ես դիտել եմ մեկ խաղ ուղիղ հեռարձակմամբ («Շիրակ» — «Նոա» հանդիպումը) և մի քանի ձայնագրված խաղեր: Կցանկանայի հնարավորինս շատ խաղացողների հնարավորություն տալ նրանց զարգացման և նպատակների իրականացման համար:
— Հայտնի է դարձել, որ այսուհետև «Նոան» տնային հանդիպումները կանցկացնի ՀՖՖ տեխնիկական կենտրոն/ֆուտբոլի ակադեմիայի մարզադաշտում: Ըստ Ձեզ, որքանո՞վ նոր մարզչի գործոնը և նոր դաշտը կարող են ազդել խաղացողների հոգեբանության և, որպես արդյունք, թիմի հաջող խաղի վրա:
— Ֆուտբոլային դաշտը կարող է ազդել խաղի որակի վրա ավելի շատ, քան կարող էր թվալ առաջին հայացքից: Տեսանք Չեմպիոնների լիգայի խաղարկությունում, թե ինչպես Լովրենը սայթաքեց, և «Զենիթը» թանկարժեք միավորներ կորցրեց, բայց դատելով այն բանից, թե ինչպես ֆուտբոլիստները արձագանքեցին Ավանի ակադեմիայում խաղալու որոշմանը, այն ճիշտ էր, և ես դրա համար շատ շնորհակալ եմ ակումբի և թիմի ղեկավարությանը: Ինչ վերաբերում է իմ նշանակման գործոնին, ապա ինձ անհանգստացնում է ֆուտբոլիստների արձագանքը դաշտում, թե ինչպես են նրանք կատարում պահանջները, մնացածը կարևոր չէ:
— Ո՞րն է ձեր ուղերձը «Նոայի» երկրպագուներին:
— Ես իսկապես հուսով եմ, որ մեր խաղն ու արդյունքները հնարավորինս շատ երկրպագուներ կգրավեն: Ես ուզում եմ, որ մեր երիտասարդ ակումբի երկրպագուների կորպուսը բանակի չափ դառնա․․․
