ՀՀ սպորտային մարմնամարզության հավաքականը չի մասնակցի Եվրոպայի առաջնությանը։ Այս մասին գրում է ՀԱՕԿ-ի կայքը: Մրցաշարը պետք է անցկացվեր դեկտեմբերի 9-13-ը Բաքվում , որին հայտ չէր ներկայացրել մեր ֆեդերացիան։
Սակայն մրցաշարի անցկացման վայրի փոփոխություն է եղել և մարզաձևի եվրոպական ֆեդերացիայի ադրբեջանցի նախագահը գործկոմի առցանց նիստով առաջնության նոր վայր է դարձրել Թուրքիայի Մերսին քաղաքը։
Այսպիսով, մեր թիմը չի մեկնի նաև Թուրքիա: Նշվում է, որ նախ՝ եվրոպականում օլիմպիական ուղեգիր չի խաղարկվում և բացի այդ, մասնակցության հայտ ներկայացնելու դեպքում, որպես տուգանք պետք է վճարվեր երեք հազար եվրո։
Մեր հավաքականն, այնուամենայնիվ, նախատեսում է Մինսկում նոյեմբերին անցկացնել ուսումնամարզական հավաք, որից հետո մասնակցել Բելառուսի գավաթի բաց խաղարկությանը։ Մրցաշրջանի վերջում ՌԴ Պենզա քաղաքում դեկտեմբերին տեղի կունենա օլիմպիական չեմպիոն Միխայիլ Վորոնինի միջազգային ավանդական հուշամրցաշարը։