Էստոնիայի հավաքականի գլխավոր մարզիչ Կարել Վուլաիդը Վազգեն Սարգսյանի անվան «Հանրապետական» մարզադաշտի մամուլի ասուլիսների սրահում խոսել է Ազգերի լիգայի երկրորդ տուրի շրջանակում կայանալիք՝ Հայաստան-Էստոնիա խաղի մասին:
-Վաղը ի՞նչ խաղ եք ակնկալում: Հայաստանի հավաքականի գերաստղ Հենրիխ Մխիթարյանի բացակայությունը հավասարեցնո՞ւմ է թիմերի շանսերը:
-Վաղը, իհարկե, դժվար խաղ ենք սպասում: Թիմերը միավորներ վաստակելու հավասար շասներ ունեն մեր C խմբում: Ինչպես մենք, այնպես էլ Հայաստանի ընտրանին պարտվել ենք առաջին խաղերում: Հնարավոր ամեն ինչ կանենք հաղթելու համար: Մեծ ճնշում կա, որովհետև ուզում ենք լավ արդյունքի հասնել: Մխիթարյանը աստղային խաղացող է, բայց նախկինում էլ Հայաստանի հավաքականը առանց նրա խաղացել է ու, կարծում եմ, Հայաստանը բավականաչափ ուժեղ թիմ ունի, որ առանց նրա էլ լավ խաղա, լավ շանսեր ունեն:
-Վրաստանի հավաքականը տիրում էր գնդակին ձեզ հետ խաղում ու լավ գործում եզրերից: Մոտավորապես այդպիսի՞ խաղ եք ակնկալում վաղը Հայաստանից:
-Իրավացի եք, Վրաստանը հիմնականում եզրերով էր խաղում, բայց նաև կիսապաշտպանությունից էր գրոհում ու կարծում եմ, որ Հայաստանը վաղը ևս տարբեր կողմերից կգրոհի:
-Հետևելով Հայաստանում հանդես եկող Նիկիտա Բարանովի ու Իլյա Անտոնովի ելույթներին՝ նաև ընդհանուր պատկերացում ձևավորած կլինեք հայկական ֆուտբոլի մակարդակի մասին: Ի՞նչ տպավորություն ունեք: Էստոնացի ֆուտբոլիստների՝ այստեղ հանդես գալը կարիերայի առաջխաղացում համարո՞ւմ եք:
-Բնականաբար, նախորդ մրցաշրջանում հետևել եմ Նիկիտա Բարանովի ու Իլյա Անտոնովի խաղերին Հայաստանի առաջնությունում: Ուրախ եմ, որ երկու թիմերն էլ պայքարում էին չեմպիոնության համար: Շատ լավ ակումբներ կան, որոնք իրենց ենթակառուցվածքներն ունեն: Էստոնիայում ևս 4-5 լավ թիմեր կան: Մարզչի համար միշտ էլ լավ է, որ խաղացողները միջազգային մակարդակում են խաղում: Շարունակելու եմ հետևել, որովհետև Իլյա Անտոնովը դեռ այստեղ է հանդես գալիս:
Հիշեցնենք, որ Ազգերի լիգայի 2-րդ տուրի՝ Հայաստան-Էստոնիա խաղը կկայանա վաղը՝ սեպտեմբերի 8-ին Երևանում:
