Լեո Մեսսին մնում է «Բարսելոնայում»։
- Armsport-ի համար դա առիթ է վերհիշելու նախորդ շրջանի՝ «Բարսայի» ամենակարող ու հզոր շրջանի խաղն ու Մեսսիի բացարձակ գերակայությունը դաշտում։
Նախորդ շրջանի ավարտն ազդարարող պատմական խաղը «Բավարիայից» կրած 2:8 հաշվով պարտությունն էր։ Goal.com-ին տված հարցազրույցում, իհարկե, Մեսսին խոստովանեց, որ ավելի վաղ ևս ցանկություն է հայտնել հեռանալ ակումբից, սակայն այդ խաղը բեկումնային էր։ Կարծում ենք, որ հենց այդ խաղով է բաժանվելու ոչ վաղ անցյալի «Բարսելոնան» ու ակումբի անորոշ ապագան, որտեղ մենք հնարավոր է տեսնենք Մեսսիին, սակայն թե ինչպես կփայլի նրա աստղը, ոչ ոք չի կարող ասել, անգամ ինքը՝ Մեսսին։
2015 թվականի թբիլիսյան սուպերգավաթը «Բարսելոնայի» ակումբային գերակայության շրջաններից մեկն էր։ «Սևիլյան» հիանալի խաղով կրնկակոխ պատասխանում էր կատալոնյան ակումբին, սակայն հենց այդ տարվա աշխարհի լավագույն ֆուտբոլիստի տիտղոսին հետագայում արժանացած Մեսսին կերտեց ֆանտաստիկ սուպերգավաթային եզրափակչի է՛լ ավելի ֆանտաստիկ հաղթանակը 5:4 հաշվով։
Պատկերացրե՛ք հանդիպում, որի 16-րդ րոպեին Մեսսին արդեն երկու անգամ տուգանային հարվածով գրավում է մրցակցի դարպասը։ Ընդամենը 16 րոպե ու արդեն գրանցված երեք գնդակ, երեքն էլ տուգանային հարվածներից, որոնցից երկուսը աշխարհի լավագույն ֆուտբոլիստի կատարմամբ։ Առաջատար միջազգային գործակալությունները այդ խաղում հատուկ ունեին առանձին ֆոտոլրագրողներ, որոնք միայն ու միայն պետք է նկարեին Մեսսիին։ Նման մեկը նստած էր հենց իմ (Armsport-ի ֆոտոլրագրող Գևորգ Ղազարյան) հարևանությամբ։ Դրվագներից մեկում, երբ օտարազգի հարևանս որոշեց նկարներ ուղարկել խմբագրություն, իր ուշադրության կենտրոնից կորցրել էր արգենտինացուն ու երբ նորից հայացքն ուղղեց դեպի խաղադաշտ, մի պահ պարզվեց, որ նա կորցրել է Մեսսիին։ Վայրկյաններ անց նա արդեն նյարդայնացած գոռաց՝ Where the f*** is Messi? Պարզվեց «Բարսայի» առաջատարը պարզապես մի պահ կռացել էր, և կանգնած ֆուտբոլիստների թվում ֆոտոլրագրողը չէր նկատել նրան։
2015 թվականին արդեն Մեսսին այնքան շատ անձնական ու ակումբային տիտղոսներ էր նվաճել, որ հետխաղյա արարողության ընթացքում նա ամենահամեստ ուրախացողներից մեկն էր խաղադաշտում։ Ժպիտը դեմքին, նա պատվո շրջան կատարեց խաղադաշտում, սակայն երբեք միայնակ չմնաց ու անգամ չխնդրեց անձամբ իրեն տալ ՈՒԵՖԱ-ի ակումբային սուպերգավաթը՝ տիտղոսի հետ նկարվելու համար։ Մեկ լուսանկար ակումբի ֆոտոլրագրողի համար, այն էլ՝ Ինիեստայի հետ, որտեղ Մեսսին հպվեց ու պահեց մի պահ գավաթը խաղընկերոջ հետ։ Հաջորդ իսկ վայրկյանին նա թողեց գավաթը Ինիեստայի մոտ ու րոպեներ անց լքեց խաղադաշտը։
Այս ֆոտոշարքը մեկ հանդիպումից ու դրան մեկ օրվա տարբերությամբ նախորդած նախախաղային մարզումից լուսանկարների շարք է, որը հրապարակում ենք որպես եվրոպական ու համաշխարհային ֆուտբոլում գերակայած «Բարսելոնայի» վկայություն։ Լուսանկարների մեծ մասը նախկինում երբեք չենք հրապարակել։ Հուսով ենք, որ այդուհանդերձ ֆուտբոլային պատմության ամենամեծ աստղերից մեկը դեռ կփայլի ու առիթներ կտա ապագայում ևս մեկ անգամ լուսանկարելու նրա խաղը։