Այս մրցաշրջանում Ալֆոնսո Դեյվիսը, ինչպես կանադական տորնադոն, պարզապես ոչնչացրեց այն բոլոր կարծրատիպերը՝ իբր «ֆուտբոլ» և «Կանադա» արտահայությունները պարզապես անհամատեղելի են ներկա իրականությունում։
18 տարեկան հասակում կանադացին MLS-ից տեղափոխվեց Բունդեսլիգա, այն էլ՝ «Բավարիա»։ Շատերը հավանաբար կարծում էին, որ այս տղան հերթական հեռանկարային ֆուտբոլիտներից է, ովքեր համալրում են գրանդ ակումբների շարքերը, խաղում երիտասարդական թիմերում, մեկ-երկու անգամ մասնակցում գլխավոր թիմերի ոչ կարևոր հանդիպումներին, իսկ հետո, այդպես էլ չդառնալով մեգաաստղ, տեղափոխվում որևէ միջակ ակումբ։ Բայց․․․ Ալֆոնսոն չի դասվում այդ կատեգորիային։
Ալֆոնսոն դարձել է պատմության մեջ առաջին կանադացին, ով հաղթել է Չեմպիոնների լիգան: Այս մրցաշրջանում Դեյվիսը դարձել է «Բավարիայի» հիմնական կազմի խաղացող: Նա բոլոր մրցաշարերում անցկացրած 42 խաղում խփել է երեք գոլ և կատարել 9 գոլային փոխանցում:
«Ո՞վ կմտածեր, որ Կանադայից մի տղա կհաղթի Չեմպիոնների լիգան: Եթե երկու տարի առաջ ինչ-որ մեկն ինձ այդ մասին ասեր, ես հաստատ չէի հավատա»,- մեջբերում է Դեյվիսին ՈւԵՖԱ-ի պաշտոնական կայքը:
MLS-ի «Վանքուվեր» ակումբը բազմաթիվ պատճառներ ուներ երկրպագելու Մյունխենի «Բավարիային»՝ ՊՍԺ-ի դեմ Չեմպիոնների լիգայի եզրափակիչ խաղում. ի վերջո, գերմանական թիմի հաղթանակի դեպքում «Բավարիան» կանադացիներին կվճարեր մեկ միլիոն եվրո բոնուս՝ Ալֆոնսո Դեյվիսի տրանսֆերի համար, հայտնում է ESPN-ը: «Բավարիան» հաղթեց 1-0 հաշվով և այժմ լրացուցիչ գումար կվճարի «Վանքուվերին»: Այսպիսով, խաղացողի տրանսֆերի արժեքը կբարձրանա մինչև 11 միլիոն եվրո: Այս կետը ընդգրկվել էր ակումբների միջև համաձայնագրում, երբ 2019 թվականին Ալֆոնսո Դեյվիսը տեղափոխվեց «Բավարիա»:
Globe Soccer Awards պորտալը կազմել է 2020 թվականի ամենաարագավազ խաղացողների վարկանիշային աղյուսակը: Տարվա ամենաարագավազ ֆուտբոլիստ է ճանաչվել «Բավարիայի» կանադացի պաշտպան Ալֆոնսո Դեյվիսը։ Դեյվիսը Բունդեսլիգայի 28-րդ տուրի Դորտմունդի «Բորուսիայի» հետ խաղում (0-1) զարգացրել է առավելագույն արագություն՝ 35.3 կմ/ժամ:
«Դեյվիսը ֆուտբոլի Հուսեյն Բոլտն է: Նա աշխարհի լավագույն պաշտպաններից մեկն է: Այդ տղան ֆանտաստիկ արագություն ունի: Լավ է, որ ժամանակին ավարտեցի կարիերաս և չհանդիպեցի նրան խաղադաշտում»,- կանադացու մասին իր կարծիքն է հայտնել Ռիո Ֆերդինանդը:
Ալֆոնսոն ճանաչվել է նաև 2019/20 մրցաշրջանի Բունդեսլիգայի լավագույն նորեկը։ Եվ այս ամենից հետո «Բավարիան» հայտարարել է թիմի 19-ամյա Դեյվիսի հետ համագործակցությունը երկարացնելու մասին։ Պայմանագիրը նախատեսված է մինչև 2025 թվականի հունիսի 30-ը։
Դեյվիսը ծնվել է Գանայում՝ լիբերացի փախստականների ճամբարում, իսկ մի քանի տարի անց նրա ընտանիքը մեծ դժվարությամբ կարողանում է գաղթել Կանադա, որտեղ էլ Ալֆոնսոն սկսում է զբաղվել այդ երկրում ոչ այդքան մեծ մասսայականություն վայելող մարզաձևով՝ ֆուտբոլով։ Ի դեպ, Ալֆոնսոյի ընկերուհին՝ Ջորդին Հուեթիման, ևս զբաղվում է պրոֆեսիոնալ ֆուտբոլով։ 19-ամյա կանադուհին հանդես է գալիս կանանց ակումբային ֆուտբոլի գրանդներից մեկի՝ ՊՍԺ-ի կազմում։
«Ֆուտբոլն ինձ համար առաջին տեղում է, սակայն ապագայում ես ցանկանում եմ դերասան դառնալ։ Ես շատ եմ սիրում զվարճացնել մարդկանց և TikTok-ն ինձ տալիս է այդ հնարավորությունը»,- հարցազրույցներից մեկի ժամանակ ասել է Դեյվիսը։ Եվ իսկապես, կանադացին բավականին ակտիվ է սոցցանցերում։
Nah I tear🤣🤣https://t.co/7PzNtkHrA8
— .ɟɐʞ (@kafuikumah_) August 24, 2020
Հուսանք առաջիկա 10-15 տարվա ընթացքում Դեյվիսի համար առաջնային կմնա հենց ֆուտբոլը և ժամանցային հավելվածները չեն խանգարի նրա կարիերային․ հիշո՞ւմ եք Միրկո Անտոնուչիի պատմությունը՝ կապված սոցցանցերում նրա ակտիվության հետ։ Եթե դեռ չեք կարդացել, ապա կարող եք այդ պատմությանը ծանոթանալ այստեղ:
Վերջերս Դեյվիսի instagram-ին է բաժանորդագրվել նույնիսկ աշխարհահռչակ ռեփեր Դրեյքը, ով Ալֆոնսոյի հայրենակիցն է։ Այնպես որ, բացի հոկեյից, մի շարք երաժիշտներից (Սելին Դիոն, Ջասթին Բիբեր, The Weekend, Դրեյք․․․) և մեր շատ սիրելի կանադական նրբերշիկներից, հյուսիսամերիկյան այդ երկիրը ևս մեկ ներկայացուցիչ ունի միջազգային հարթակում՝ հանձինս Ալֆոնսո Դեյվիսի։
Վար Բաբայան