ՀՀ պարետի որոշմամբ մայիսի 4-ից մասնակի գործունեություն թույլատրվեց սպորտային բնագավառում: Մի շարք մարզաձևերում մարզիկներն արդեն սկսել են մարզումները՝ պահպանելով պարետատան և ՀՀ առողջապահության նախարարության ցուցումները: ArmSport-ի հետ զրույցում բռնցքամարտի Հայաստանի հավաքականի գլխավոր մարզիչ Վահան Ադիլխանյանը նշեց, որ սկսել են մարզումները, սակայն հավաքական թիմն ամբողջությամբ չի մասնակցում մարզումներին:
«Հավաքականի հետ մարզումները դեռ չենք սկսել: Տղաներից շատերը չեն կարողանում գալ մարզադահլիճ, քանի որ տրանսպորտի խնդիր կա: Ովքեր ունեն ավտոմեքենա, նրանց համար խնդիր չէ, բայց հավաքականի անդամներից շատերն ապրում են ծայրամասերում և նրանց համար ամեն օր հաճախելը մարզումներին դժվարություններ է առաջացնում: Սա բռնցքամարտիների վրա շատ վատ է անդրադառնալու հետագայում: Գոնե 2 հավաք է պետք անցկացնենք և մասնակցենք միջազգային մրցաշարերի, որպեսզի աստիճանաբար կարողանանք հասնել նախկին մարզավիճակին: Ամեն դեպքում, այնպես չէ, որ սա ազդում է միայն մեր բռնցքամարտիկների վրա: Ամբողջ աշխարհում է այս վիճակը՝ հատկապես Եվրոպայում, մարզիկները մարզվում են անհատական ծրագրով»:
Հավաքականի մարզիչը նշեց, որ օրացուցային տարում դեռ կան մրցաշարեր, որոնց հետաձգման մասին չեն հայտարարվել. «Այս տարվա մրցաշարերից դեռ չհետաձգված մրցաշարեր կան: Սեպտեմբերին Իտալիայում կայանալու է Եվրոպայի մինչև 22 տարեկանների առաջնությունը: Եվրոպայում վիճակն ավելի վատ է՝ հատկապես Իտալիայում, բայց հույս ունենք, որ այս ամենը շուտ կանցնի և շուտ կվերադառնանք բնականոն աշխատանքին:
Իհարկե անցկացնում ենք նաև բացօթյա մարզումներ Հրազդանի կիրճում, սակայն ռեժիմային մարզումերից հետ ենք մնացել: Ինչքան էլ տղաները անհատապես մարզվեն, դրսում վազեն, միևնույն է, մասնագիտացված մարզումներից հետ ընկնելը մեծ խնդիրներ է բերելու: Կփորձենք ամեն ինչ հետ բերել»:
Հարցին, թե ավելի նպատակահարմար չէ ուսումնարզական հավաք կազմակերպել, հավաքականի գլխավոր մարզիչն ասաց. «Որոշել ենք հավաք անցկացնել մյուս ամիս: Եթե ավելի բարդ խնդիրներ չառաջանան, ապա հունիսին Երևանում անպայման հավաք կանցկացնենք»:
