Մադրիդի «Ռեալի» գլխավոր մարզիչ Ժոզե Մոուրինյուն ամփոփել է Լա Լիգայի 13-րդ տուրում «Սելտայի» նկատմամբ տարած կամային հաղթանակը (2։1)։
Հետխաղային մամուլի ասուլիսում պորտուգալացի մասնագետն անդրադարձել է միջազգային դադարից հետո ֆուտբոլիստների հոգնածությանը, Կառլոս Էսպիի դերին, երկրպագուների սուլոցներին, դարպասապահների մրցակցությանը, ինչպես նաև հաստատել է, որ Վինիսիուս Ժունիորը հաջորդ խաղը կսկսի մեկնարկային կազմում։
Դժվար հաղթանակի և հավաքականներից հետո կուտակված հոգնածության մասին
«Սպասում էի, որ բարդ խաղ է լինելու, թեև չէի պատկերացնում, որ այսքան դժվարությամբ ենք հաղթելու։ «Սելտան» շատ լավ թիմ է, և նրանց խաղացողների մեծ մասը հավաքականներ չէր մեկնել․ նրանք միասին են պատրաստվել այս խաղին։ Մեր ֆուտբոլիստներից ոմանք վերադարձել են երեքշաբթի, չորեքշաբթի կամ հինգշաբթի, ոմանք 12 ժամ անցկացրել են ինքնաթիռում՝ ուրբաթ մարզմանը հասնելու համար։ Նման իրավիճակում միշտ դժվար է։
Տեսա ֆուտբոլիստների, որոնք ֆիզիկապես տանջվում էին, բայց միևնույն ժամանակ կարողացան ուժ գտնել իրենց բնավորության և թիմային ոգու մեջ։ Ինչպես կատակով ասացի «Ռեալ Մադրիդ TV»-ին՝ ընդմիջմանը նրանց էներգիա չտվեց իզոտոնիկ ըմպելիքը․ դա ընկերների խումբն էր, որը ցանկանում էր հաղթել։ Երկրորդ գոլից հետո խաղադաշտում լրիվ անհավասարակշիռ կազմ ունեինք՝ կենտրոնում շատ հոգնած Արդա Գյուլերն ու Ջուդ Բելինգհեմը, բայց թիմը պայքարեց ու պահպանեց հաղթանակը։ Մի փոքր հիասթափված եմ խաղի որակից, բայց հպարտ եմ տղաներով և այս երեք կարևոր միավորով»։
Կառլոս Էսպիի (93 րոպեում 4 գոլ) և Մբապեի հետ նրա համատեղելիության մասին
«Կառլոսը կարող է խաղալ մեկնարկային կազմում, բայց մեր խաղաոճն ավելի շատ հիմնված է համակցված գործողությունների վրա, իսկ նա տուգանային հրապարակի դասական հարձակվող է։ Երբ մրցակիցը փակվում է պաշտպանությունում, Էսպին շատ վտանգավոր է․ լավ է խաղում գլխով, մեջքով դեպի դարպասը։ Նա չի դժգոհում, թե ինչու է քիչ խաղում կամ ինչու Մբապեն չի նստում պահեստայինների նստարանին։ Երջանիկ է «Ռեալում» և զարգանում է։ Ի դեպ, նրա կարիերայում ամենամեծ դերը ոչ թե ես եմ ունեցել, այլ «Լևանտեի» պորտուգալացի մարզիչը․ ամենամեծ գնահատանքը նրան է հասնում։
Կարո՞ղ են Մբապեն և Էսպին միասին խաղալ։ Կարող եմ նրանց միասին դաշտ դուրս բերել, բայց երբ գնդակը կորցնենք, ստիպված կլինեմ մտնել խաղադաշտ ու հարվածել հակագրոհի դուրս եկող մրցակցին։ Երկու մաքուր հարձակվողով՝ դասական 4-4-2-ով խաղալու համար եզրայինները պետք է շատ լավ պաշտպանվեն կենտրոնում, իսկ մեր եզրայինների հատկանիշներով մենք դրան պատրաստ չենք։ Երկրորդ խաղակեսում Կուկուրելյան ստիպված էր պաշտպանվել կենտրոնում, որովհետև Խավի Ռուեդան արդեն Վինիսիուսին ստիպում էր հետևել իրեն։ Այն կազմով, որով ավարտեցինք խաղը, եթե երկրորդ գոլը խփեինք 15 րոպե շուտ, չէինք հաղթի։ Հինգ րոպե էր մնացել, և տղաները պարզապես կարողացան պահել գնդակն ու ժամանակ շահել»։
«Սանտիագո Բեռնաբեուի» երկրպագուների սուլոցների մասին
«Ես երբեք չեմ քննադատի երկրպագուներին․ նրանք են ակումբը, և նրանք ինքնիշխան են։ Բայց աջակցությամբ խաղալն ավելի հեշտ է։ Արտագնա խաղում մրցակցի երկրպագուների ճնշումը կարող է խթան լինել, իսկ տանը դա ավելի բարդ է։ Այդուհանդերձ, «Ռեալի» ֆուտբոլիստի հատկանիշներից մեկն էլ հենց այդ ճնշմանը դիմանալն ու ռիսկի դիմելուց չվախենալն է։ Նրանք այդ ուժը ցույց տվեցին»։
Տիբո Կուրտուայի և Անդրեյ Լունինի մասին
«Կասկած չունեմ, որ արդեն մի քանի տարի Կուրտուան աշխարհի լավագույն դարպասապահն է։ Պատմականորեն «Ոսկե գնդակն» ավելի շատ տալիս են հարձակվողներին, և միայն Լև Յաշինն է այն նվաճել որպես դարպասապահ։ Նոյերը կարիերայի ավարտին է մոտենում, և ես չեմ տեսնում մեկին, ով մոտ է Տիբոյի մակարդակին։ Միևնույն ժամանակ՝ շատ եմ հավանում Լունինին․ նա արժանի է ավելի շատ խաղալու։ 1970-ականներին Պորտուգալիայում մի հայտնի մարզիչ իր դարպասապահին ասել էր՝ «Դու Եվրոպայի լավագույնն ես»։ Երբ վերջինս հարցրել էր՝ «Այդ դեպքում ինչո՞ւ չեմ խաղում», մարզիչը պատասխանել էր՝ «Որովհետև մյուսն աշխարհի լավագույնն է»։ Լունինի և Կուրտուայի պարագայում նման իրավիճակ է»։
Վերջնամասում հաղթանակներ կորզելու ռիսկերի մասին
«Իհարկե, դա անհանգստացնում է․ մի օր կգա պահը, երբ չես կարողանա հետ բերել խաղը։ 2։1-ից հետո մենք այլևս փոխարինումներ չունեինք․ կցանկանայի վեցերորդ փոխարինում ունենալ՝ Մբապեի կամ Արդայի փոխարեն Չուամենիին խաղադաշտ մտցնելու համար։ Իդեալական տարբերակն առաջին րոպեից լավ խաղալն է։ Այսօր հանդիպման առաջին փոխանցումը Կոնատեն կատարեց դեպի գնդակները հավաքող տղան, և ես անմիջապես զգացի, որ թիմը լիովին կենտրոնացած չէ։
Բայց դժվար շրջան է բոլորի համար․ հավաքականներից հետո չհաղթեցին «Արսենալը», «Մանչեսթեր Սիթին», «Չելսին», «Բավարիան», իսկ «Պորտուն» երրորդ դիվիզիոնի թիմին հաղթեց միայն 11-մետրանոցներով։ Լուրջ վնասվածքներ ստացան Դուեն, Հարի Քեյնը։ Այսօրվա միավորները ոսկու արժեք ունեն»։
Վինիսիուս Ժունիորի մասին
«Որպեսզի երկուշաբթի նորից չտաք այդ հարցը և առաջիկա օրերին այդ թեմայով շատ չխոսեք, մի փոքր չարաճճի կլինեմ և կփակեմ խոսակցությունը․ երեքշաբթի նա կսկսի մեկնարկային կազմում»։
Հատուկ ուղերձի և Ռաֆայել Նադալի մասին
«Կցանկանայի մեծ գրկախառնություն փոխանցել այստեղ ներկա Խեսուսի ընտանիքին։ Ուզում էի մոտենալ ու ողջունել նրանց, բայց չկարողացա․ միայն նրանց նայելն արդեն ցավ է պատճառում սրտիս։ Նաև ուզում եմ ասել, որ ինձ համար մեծ պատիվ ու հպարտություն է, որ «Ռեալ Մադրիդի» ղեկավարներից մեկը Ռաֆայել Նադալն է՝ ոչ թե պարզապես որպես մարզիկ, այլ որպես մարդ»։
Հավելենք, որ այս հաղթանակից հետո «Ռեալը» 13 խաղում վաստակել է 33 միավոր (11 հաղթանակ, 2 պարտություն) և զբաղեցնում է Լա Լիգայի մրցաշարային աղյուսակի 2-րդ հորիզոնականը՝ միավորներով հավասարվելով առաջատար «Բարսելոնային», որը մեկ խաղ պակաս է անցկացրել։
Մոուրինյուի թիմի հաջորդ հանդիպումը Չեմպիոնների լիգայի հիմնական փուլի 5-րդ տուրում է՝ ՊՍՎ-ի դեմ։ Խաղը կկայանա նոյեմբերի 24-ին (Երևանի ժամանակով՝ նոյեմբերի 25-ին, ժամը 00։00-ին)։

























































