Հայաստանի բասկետբոլի ֆեդերացիայի նախագահ Արթուր Նազարյանն ամփոփել է պաշտոնավարման առաջին 100 օրն ու ներկայացրել հայկական բասկետբոլի զարգացման երկարաժամկետ ռազմավարությունը՝ ընդգծելով առկա մարտահրավերները, առաջիկա տարիների առաջնահերթություններն ու մինչև 2040 թվականը նախատեսված թիրախները։
2026 թվականի հուլիսի 29-ին ՀԲՖ նախագահի պաշտոնը ստանձնած Նազարյանը նշել է, որ անցած երեքուկես ամիսների ընթացքում բազմաթիվ հանդիպումներ և քննարկումներ է անցկացրել մարզիչների, ակումբների, մարզական կառույցների և միջազգային գործընկերների հետ՝ խորությամբ գնահատելու ոլորտի ներկա վիճակը։ Ըստ ֆեդերացիայի ղեկավարի՝ թեև վերջին տարիներին հայկական բասկետբոլում նկատվում է առաջընթաց և հետաքրքրության աճ, միևնույն ժամանակ առկա են լուրջ խնդիրներ. ժամանակակից ենթակառուցվածքների պակաս, մարզերում զարգացման սահմանափակ հնարավորություններ, մարզչական կրթության բարելավման անհրաժեշտություն, կանանց բասկետբոլի ներգրավվածության ցածր մակարդակ և կայուն ֆինանսավորման համակարգի բացակայություն։
ՀԲՖ-ի գլխավոր նպատակը երկարաժամկետ և կայուն համակարգի ստեղծումն է, որը կախված չի լինի դրվագային հաջողություններից և անընդհատ կպատրաստի մրցունակ բասկետբոլիստներ։ Այդ նպատակով առանձնացվել է աշխատանքի վեց հիմնական ուղղություն.
Պատմական 2027 թվական. Հայաստանը՝ Եվրոպայի բոլոր 6 առաջնություններում
2027 թվականը բեկումնային է լինելու հայկական բասկետբոլի պատմության մեջ։ Հայաստանն առաջին անգամ ՖԻԲԱ-ի Եվրոպայի տարիքային առաջնություններում ներկայացված կլինի տղամարդկանց և կանանց բոլոր 6 հավաքականներով (Մ16, Մ18 և Մ20)։ Հատկանշական է, որ Հայաստանի Մ20 կանանց հավաքականն իր պատմության մեջ առաջին անգամ հանդես կգա Եվրոպայի առաջնությունում, ինչը կարևոր խթան է կանանց բասկետբոլի զարգացման համար։ Ֆեդերացիայի նպատակն է առաջիկա տարիներին պարզապես մասնակցությունից անցում կատարել բարձր հորիզոնականների համար պայքարին։
Նախապատրաստական նոր մոդել և Մ14 հավաքականների հիմնում
ՀԲՖ-ն արմատապես փոխում է պատանեկան հավաքականների նախապատրաստության համակարգը։ Եթե նախկինում Մ16 Եվրոպայի առաջնության նախապատրաստությունը մեկնարկում էր մրցաշարից 3–4 ամիս առաջ, ապա այժմ այդ գործընթացը սկսվելու է 2.5–3 տարի շուտ։ Հիմնաքարը դրվելու է Մ14 տարիքային խմբում. զարգացվելու է տղաների ծրագիրը և ձևավորվելու է Մ14 աղջիկների հավաքականի համակարգը։ Ակումբային մարզիչների հետ սերտ համագործակցությամբ անցկացվելու են կանոնավոր մարզումներ, հավաքներ, ֆիզիկական պատրաստվածության թեստավորումներ և միջազգային խաղեր՝ նպատակ ունենալով պատրաստել ոչ թե թիմեր մեկ մրցաշարի, այլ բասկետբոլիստներ՝ երկարաժամկետ հաջողությունների համար։
Մարզային զարգացում, դպրոցական բասկետբոլ և մարզչական կրթություն
Բասկետբոլի աշխարհագրությունը Երևանից դուրս բերելու համար ընդլայնվելու է համագործակցությունը մարզպետարանների, համայնքապետարանների և դպրոցների հետ՝ տեղերում նոր տաղանդներ բացահայտելու նպատակով։ Կարևորագույն թիրախ է նաև «Վարչապետի գավաթ» դպրոցական մրցաշարի ընդլայնումը, որտեղ 2027 թվականին նախատեսվում է մասնակից աշակերտների թիվը հասցնել առնվազն 12,000-ի՝ հիմնական շեշտը դնելով մարզերի դպրոցների վրա։
Զուգահեռաբար, ֆեդերացիայում արդեն ձևավորվել է Մարզիչների կոմիտե, որը զբաղվելու է տեղական մասնագետների կրթությամբ, վերապատրաստմամբ, մանկապատանեկան բասկետբոլի մարզման մեթոդաբանության մշակմամբ և միջազգային փորձագետների ներգրավմամբ։
Տեսլական 2040. 4 խոշոր ակադեմիա և Եվրոբասկետի ուղեգիր
Երկարաժամկետ ռազմավարության առանցքային կետը ժամանակակից բասկետբոլային ակադեմիաների ցանցի ստեղծումն է։ Նախատեսվում է հիմնել 4 խոշոր ակադեմիա՝ երկուսը Երևանում, մեկական՝ Գյումրիում և Վանաձորում, որտեղ բարձրակարգ մասնագետների գլխավորությամբ կկարողանա մարզվել շուրջ 1,500 երեխա։
Այս համակարգի լիարժեք ներդրումից հետո ՀԲՖ-ն իր առջև դրել է հստակ մարզական նպատակներ.
- 6 տարվա ընթացքում Մ16 տղամարդկանց և կանանց հավաքականներն ընդգրկել Եվրոպայի B դիվիզիոնի լավագույն տասնյակում, իսկ 8 տարվա ընթացքում՝ լավագույն հնգյակում։
- 8 տարվա ընթացքում Մ18 և Մ20 տղամարդկանց ու կանանց հավաքականները հասցնել B դիվիզիոնի լավագույն տասնյակ։
- 10 տարվա ընթացքում ապահովել Հայաստանի տղամարդկանց և կանանց ազգային հավաքականների մասնակցությունը Եվրոբասկետի եզրափակիչ փուլերին։
Ամփոփելով իր ուղերձը՝ Արթուր Նազարյանն ընդգծել է, որ այս հավակնոտ նպատակներին հասնելու համար անհրաժեշտ է պետության, համայնքների, ակումբների, գործարարների և սփյուռքի համատեղ աշխատանքը. «Մեր նպատակը պարզապես ավելի շատ խաղեր հաղթելը չէ։ Մեր նպատակը հայկական բասկետբոլի այնպիսի ապագա կառուցելն է, որտեղ յուրաքանչյուր նոր սերունդ ավելի մեծ հնարավորություններ կունենա, քան նախորդը»։
