Անգլիայի Պրեմիեր լիգայում հասունանում է 2026/27 մրցաշրջանի առաջին մարզչական պաշտոնանկությունը։ Հեղինակավոր The Athletic պարբերականի տեղեկություններով՝ «Քրիսթալ Փելասի» ղեկավարությունը մտադիր է խզել պայմանագիրը թիմի գլխավոր մարզիչ Պիեռ Սաժի հետ, որի գլխավորությամբ լոնդոնյան ակումբը ձախողել է առաջնության մեկնարկը։
47-ամյա ֆրանսիացի մասնագետի ապագան լուրջ հարցականի տակ է հայտնվել 10-րդ տուրում «Լիվերպուլից» կրած պարտությունից (1։3) հետո, որի հետևանքով թիմը հայտնվել է մրցաշարային աղյուսակի վերջին՝ 20-րդ հորիզոնականում։ Ըստ The Guardian-ի՝ Սաժի պաշտոնանկության մասին կարող է հայտարարվել արդեն այսօր՝ նոյեմբերի 9-ին, իսկ ակումբի ղեկավարությունն օգտագործում է միջազգային դադարը՝ նոր մարզչի թեկնածուների հետ բանակցելու համար։
Պիեռ Սաժը հարավլոնդոնյան ակումբը գլխավորել էր այս տարվա հունիսին՝ կնքելով 3 տարվա պայմանագիր և փոխարինելով Օլիվեր Գլասներին։ Նախորդ մրցաշրջանում ավստրիացի մասնագետի օրոք «Քրիսթալ Փելասը» պատմական հաջողության էր հասել՝ նվաճելով Անգլիայի գավաթն ու Կոնֆերենցիաների լիգայի տիտղոսը, սակայն ընթացիկ մրցաշրջանում թիմի արդյունքները կտրուկ անկում են ապրել։
Մեկնարկային 10 տուրերում «արծիվները» վաստակել են ընդամենը 7 միավոր (2 հաղթանակ, 3 ոչ-ոքի, 5 պարտություն) և բաց թողած 24 գնդակով ունեն առաջնության ամենաթույլ պաշտպանությունը։ Թիմը չի հաղթում հոկտեմբերի 11-ից ի վեր՝ կրելով չորս անընդմեջ պարտություն, այդ թվում՝ 0։5 հաշվով ջախջախիչ պարտությունը «Բրայթոնից»։
Ովքե՞ր են հավակնում գլխավորել լոնդոնյան ակումբը
Բրիտանական մամուլն առանձնացրել է մի քանի մասնագետների, որոնք դիտարկվում են որպես Սաժի փոխարինող.
- Թոմաս Ֆրանկ. «Բրենթֆորդի» և «Տոտենհեմի» նախկին գլխավոր մարզիչը, որը փետրվարին հեռացվել էր լոնդոնյան ակումբից, համարվում է գլխավոր ֆավորիտներից մեկը և պատրաստ է վերադառնալ Պրեմիեր լիգա։
- Շոն Դայչ. «Բարնլիում», «Էվերթոնում» և «Նոթինգհեմ Ֆորեստում» աշխատած փորձառու մասնագետը ևս ընդգրկված է ակումբի կարճ ցուցակում։
- Ֆրենկ Լեմպարդ և Վիտոր Պերեյրա. Ներկայումս «Քովենթրի Սիթին» գլխավորող Լեմպարդն ու պորտուգալացի մասնագետը դիտարկվում են որպես այլընտրանքային տարբերակներ։
Հատկանշական է, որ «Լիվերպուլի» դեմ խաղից հետո ինքը՝ Պիեռ Սաժը, հրաժարվել էր իրավիճակը որակել որպես «երազանքից վերածված մղձավանջ»՝ նշելով, որ շարունակում է կենտրոնանալ խաղային համակարգի բարելավման վրա և ձմեռային տրանսֆերային պատուհանի ընթացքում ակնկալում է նոր համալրումներ։
