Լոնդոնի «Արսենալի» մամուլի ծառայությունը պաշտոնապես հայտարարել է գլխավոր մարզիչ Միկել Արտետայի հետ պայմանագրի երկարաձգման մասին։ Իսպանացի մասնագետի և «զինագործների» միջև նոր համաձայնագիրը նախատեսված է մինչև 2030 թվականի հունիսը։ Գլխավոր մարզչի հետ միաժամանակ երկարաձգվել են նաև նրա մարզչական շտաբի անդամների պայմանագրերը:
44-ամյա Արտետան, որը նախկինում աշխատում էր որպես Խոսեպ Գվարդիոլայի օգնական «Մանչեսթեր Սիթիում», լոնդոնյան ակումբը գլխավորել է 2019 թվականի դեկտեմբերին. սա նրա առաջին ինքնուրույն աշխատանքն էր մեծահասակների ֆուտբոլում: Նրա գլխավորությամբ նախորդ՝ 2025/26 մրցաշրջանում, «Արսենալը» 22 տարվա դադարից հետո հռչակվեց Անգլիայի չեմպիոն՝ նվաճելով ակումբի պատմության 14-րդ տիտղոսը։ Բացի այդ, Արտետայի օրոք թիմը նվաճել է Անգլիայի գավաթը (2019/20) և երեք անգամ տիրացել երկրի Սուպերգավաթին (2020, 2023, 2026)։
Մինչ օրս իսպանացի մասնագետը թիմը ղեկավարել է 361 հանդիպումներում՝ գրանցելով 62.05% հաղթանակների ցուցանիշ, ինչը լավագույնն է ակումբի պատմության բոլոր հիմնական մարզիչների շրջանում։
«Սա կարևոր պահ է «Արսենալի» պատմության մեջ։ Մենք ցանկանում ենք Միկելի հետ միասին հաղթական դարաշրջան կերտել»,- նշել է ակումբի գործադիր տնօրեն Ռիչարդ Գարլիկը: Ակումբի համանախագահներ Սթեն և Ջոշ Կրոնկեներն էլ հավելել են, որ նախորդ մրցաշրջանի չեմպիոնությունը հիշարժան պահ էր, և իրենք անչափ հպարտ են այն ամենով, ինչին թիմը հասել է Արտետայի վերադարձից ի վեր:
Ինքը՝ Արտետան, որը որպես ֆուտբոլիստ հանդես է եկել «Արսենալում» 2011-2016 թվականներին, չի թաքցրել իր ոգևորությունը. «Մեծ պատիվ է իմ ապագան ակումբին կապելը: Այս ակումբը յուրահատուկ է։ Մենք արդեն ստեղծել ենք հատուկ կապ և կերտել հիշողություններ, որոնք կմնան ողջ կյանքում, բայց ամենաոգևորիչն այն է, որ սա ընդամենը սկիզբն է այն ամենի, ինչին կարող ենք միասին հասնել»:
Պայմանագրի ստորագրման արարողությունն առանձնացել է յուրահատուկ պատմական մանրամասնով։ Ռիչարդ Գարլիկը Արտետային նոր պայմանագիրը ներկայացրել է 1886 թվականով թվագրվող անտիկ փայտե տուփի՝ շարժական գրասեղանի մեջ։
Այդ իրը ժամանակին պատկանել է ակումբի հիմնադիրներից մեկին և առաջին քարտուղար Էլայջա Ուոթքինսին: Հենց նրա ջանքերով է կրիկետի ակումբին կից ստեղծվել ֆուտբոլային բաժինը՝ ապագա «Արսենալը», և կազմակերպվել պատմության առաջին հանդիպումը (6-0 հաշվով հաղթանակ 1886 թ. դեկտեմբերի 11-ին): «Այս պահը կապում է մեր անցյալը, ներկան և ապագան»,- ընդգծել է Գարլիկը՝ խորհրդանշական կերպով կամրջելով ակումբի 140-ամյա պատմությունն ու գալիք հաղթանակները:
