Մադրիդի «Ռեալի» հարձակվող Կիլիան Մբապեն վերհիշել է 2017 թվականի իրադարձությունները, երբ «Մոնակոյից» հեռանալիս շատ մոտ էր անգլիական «Լիվերպուլ» տեղափոխվելուն:
The Athletic-ին տված հարցազրույցում ֆրանսիացի աստղը նշել է, որ իր մայրը, որն այն ժամանակ կատարում էր նաև նրա գործակալի պարտականությունները, մի քանի անգամ այցելել է Մերսիսայդ և խորհուրդ տվել որդուն կարիերան շարունակել «Էնֆիլդում»:
«Այն ժամանակ ես խաղում էի «Մոնակոյում» և պետք է որոշում կայացնեի: Այո, ես շատ մոտ էի «Լիվերպուլին»: Մայրս Յուրգեն Կլոպի մեծ երկրպագուն էր, և նրա նախընտրած տարբերակը հենց այդ ակումբն էր: Նա շատ էր ցանկանում, որ ես տեղափոխվեմ այնտեղ»,- պատմել է Մբապեն:
Ֆուտբոլիստի խոսքով՝ մայրը մեկնել էր Անգլիա՝ բանակցությունների առաջին փուլին մասնակցելու համար, եղել էր քաղաքում, ստադիոնում և հանդիպել ակումբի ներկայացուցիչների հետ։
«Նա ասում էր՝ «Սա հիանալի, մեծ ու ընտանեկան ակումբ է, բոլորն այնքան բարի են»: Մայրս եղել էր «Էնֆիլդում» և պարզապես սիրահարվել էր այդ մարզադաշտին: Նա միայնակ մի քանի խաղի էր ներկա գտնվել՝ մթնոլորտը զգալու համար, քանի որ ուզում էր ինձ պատկերացնել այդ ստադիոնում: Նա անընդհատ ինձ ասում էր. «Իմ կարծիքով՝ քեզ պետք է տեղափոխվել Լիվերպուլ. այնտեղ խաղալը քեզ համար պարզապես խելահեղություն կլինի»»:
Մբապեն նաև ջերմությամբ է հիշել Յուրգեն Կլոպի հետ իր հանդիպումն ու զրույցը.
«Նա ցնցող մարզիչ էր: Մենք հանդիպեցինք, և մեր միջև հիանալի հարաբերություններ ձևավորվեցին: Ես նրան շատ էի հարգում։ Հիշում եմ՝ մենք օդանավում էինք և երկար պտտվում էինք օդում, մինչ նա պատմում էր իր նախագծի մասին: Ես նրան ասացի. «Ինձ համոզելու կարիք չկա: Դուք Յուրգեն Կլոպն եք, դա «Լիվերպուլն» է՝ մեծագույն ակումբ, այնպես որ, բնականաբար, ես հետաքրքրված եմ: Բայց ես այլ տարբերակներ էլ ունեմ, այլ նախագծեր, որոնք նույնպես լավն են»։ Ես ասացի նրան, որ ինչ որոշում էլ կայացնեմ, դա կլինի ճիշտ, քանի որ խոսքն աշխարհի մեծագույն ակումբներից մեկի մասին է»:
Այնուամենայնիվ, ֆրանսիացին որոշեց ընտրել ՊՍԺ-ն: Ըստ նրա՝ գլխավոր պատճառը հայրենի քաղաքում կայանալու ցանկությունն էր.
«Դա զվարճալի պատմություն է: Բայց արդյունքում ես չլսեցի մորս, որովհետև ուզում էի խաղալ իմ քաղաքում՝ Փարիզում: Չէի ցանկանում հեռանալ երկրիցս, մինչև ինքս ինձնից որևէ բան չներկայացնեի: Որոշեցի տեղափոխվել ՊՍԺ, քանի որ ինձ համար՝ Փարիզում ծնված և մեծացած տղայի համար, չկար ավելի լավ բան, քան ապացուցելը, որ ես կարող եմ աստղ դառնալ հենց իմ հարազատ քաղաքում»,- եզրափակել է Մբապեն:
Հիշեցնենք, որ Մբապեն «Մոնակոյից» ՊՍԺ տեղափոխվեց 35 մլն եվրոյի դիմաց։
