Չեմպիոնների լիգայի որակավորման երրորդ փուլի արգելքը չհաղթահարելուց հետո Հայաստանի չեմպիոն «Արարատ-Արմենիան» պայքարը կշարունակի Եվրոպա լիգայի որակավորման փլեյ-օֆֆ փուլում:
Արդեն հայտնի են երևանյան թիմի հավանական մրցակիցները. անցումային այս փուլում «Արարատ-Արմենիան» ուժերը կչափի ԿուՊՍ (Ֆինլանդիա) – «Ունիվերսիտատյա Կրայովա» (Ռումինիա) զույգի հաղթողի հետ: Նշենք, որ այս թիմերի միջև կայացած առաջին դիմակայությունն ավարտվել է ոչ-ոքի՝ 1-1 հաշվով: Զույգի հաղթողի անունը վերջնականապես պարզ կդառնա վաղը՝ օգոստոսի 13-ին կայանալիք պատասխան խաղում:
Եվրոպա լիգայի խաղարկության լիգայի փուլի ուղեգրի համար մղվող պայքարում հայկական ակումբը որակավորման փլեյ-օֆֆի առաջին հանդիպումը կանցկացնի օգոստոսի 20-ին՝ արտագնա խաղում հյուրընկալվելով մրցակցին, իսկ պատասխան դիմակայությունը տեղի կունենա մեկ շաբաթ անց՝ օգոստոսի 27-ին, սեփական հարկի տակ:
