Անգլիական «Լիվերպուլի» նորանշանակ գլխավոր մարզիչ Անդոնի Իրաոլան կիսվել է իր սպասելիքներով թիմի ղեկին «Էնֆիլդ» մարզադաշտում կայանալիք իր առաջին տնային հանդիպումից առաջ։
ԱՄՆ-ում կայացած նախամրցաշրջանային շրջագայությունից հետո մերսիսայդյան ակումբը վերադարձել է Անգլիա և կիրակի օրը ընկերական հանդիպում կանցկացնի «Մոնակոյի» հետ։ Սա կլինի թիմի առաջին տնային խաղն այս ամռանը և իսպանացի մասնագետի նորամուտը որպես «Լիվերպուլի» գլխավոր մարզիչ սեփական հարկի տակ։
Խաղային օրվա ծրագրում Իրաոլան անդրադարձել է նախապատրաստական փուլին և առաջիկա անելիքներին.
«Հուսով եմ, որ բոլորդ լավ եք հանգստացել և մեզ պես անհամբերությամբ եք սպասում կիրակնօրյա խաղին։ Այս հանդիպումը, ինչպես նաև հաջորդ շաբաթ «Կոմոյի» դեմ նախատեսված խաղերը, չափազանց կարևոր են մեզ համար, քանի որ մենք սկսում ենք նախապատրաստվել Պրեմիեր լիգայի մեկնարկին՝ «Նյուքասլի» դեմ արտագնա խաղին»։
Խոսելով ԱՄՆ-ում անցկացրած հավաքի մասին՝ «Լիվերպուլի» գլխավոր մարզիչն ընդգծել է, որ այն դրական ու կարևոր փորձ էր իր և մարզչական շտաբի համար՝ ակումբին ավելի լավ ծանոթանալու տեսանկյունից։ Նա նշել է, որ այցերը Չիկագո, Նեշվիլ և Նյու Յորք ևս մեկ անգամ հիշեցրել են ակումբի մեծության ու գրավչության մասին։
Իրաոլան նաև տեղեկացրել է, որ թիմն արդեն գրեթե ամբողջական կազմով է մարզվում.
«Այժմ մեզ է միացել գրեթե ողջ թիմը, ինչը շատ կարևոր է։ Մեր նորեկ Վիկտոր Մունյոսն արդեն մարզաբազայում է. նա Իսպանիայի հավաքականի կազմում նախորդ ամիս դարձավ Աշխարհի չեմպիոն։ Թիմին միացել են նաև Վիրջիլ վան Դայկը, Կոդի Գակպոն և Ալիսոն Բեկերը։ Աշխարհի առաջնությանը մասնակցած մեր վերջին ֆուտբոլիստը՝ Ալեքսիս Մաք Ալիստերը, կմիանա մեզ երկուշաբթի»։
Եզրափակելով իր խոսքը՝ իսպանացի մասնագետը հույս է հայտնել, որ կկարողանան արդարացնել երկրպագուների սպասելիքները.
«Նախկինում եղել եմ «Էնֆիլդում» որպես հակառակորդ, և դա յուրահատուկ էր, բայց գիտեմ, որ «Լիվերպուլի» գլխավոր մարզչի դերում զգացողություններն այլ կլինեն։ Մենք ցանկանում ենք ձևավորել մի թիմ, որով երկրպագուները կհպարտանան։ Այս կիրակին կարևոր քայլ է այդ ճանապարհին, մի ճանապարհորդություն, որը ես ուզում եմ, որ մենք բոլորս վայելենք միասին»,- Իրաոլայի խոսքն է մեջբերում «Լիվերպուլի» պաշտոնական կայքը։
