Ամերիկյան MLS-ի կանոնավոր առաջնության հերթական տուրը իսկական հակադրությունների թատերաբեմ էր համաշխարհային ֆուտբոլի աստղային վետերանների համար։ Մինչ Ռոբերտ Լևանդովսկին փայլուն նորամուտ էր նշում իր նոր ակումբի կազմում, Կազեմիրոյի դեբյուտը Մայամիում վերածվեց իսկական մղձավանջի։
«Չիկագո Ֆայերը» սեփական հարկի տակ 2։1 հաշվով կարևոր հաղթանակ տարավ «Շառլոտի» նկատմամբ, իսկ հանդիպման գլխավոր հերոսը 37-ամյա Լևանդովսկին էր։ Հունիսի վերջին ամերիկյան ակումբ տեղափոխված լեհ ռմբարկուն ապացուցեց, որ տարիքն ընդամենը թիվ է՝ խփելով իր առաջին գոլերը նոր թիմի կազմում ու միանգամից աչքի ընկնելով դուբլով։ Այս հաղթանակից հետո «Չիկագոն» 29 միավորով բարձրացավ Արևելյան կոնֆերենցիայի 4-րդ հորիզոնական։
Տեսանյութերը՝ ԱՅՍՏԵՂ
Բոլորովին այլ սցենարով դասավորվեց մեկ այլ աստղային նորեկի՝ բրազիլացի կիսապաշտպան Կազեմիրոյի առաջին խաղը «Ինտեր Մայամիի» կազմում։ «Կոլամբուս Կրյուի» դեմ տնային դրամատիկ խաղում (2:2) բրազիլացին դարձավ ինքնագոլի հեղինակ, ինչն արժեցավ թիմի հաղթանակը։
Թեև հանդիպումը հրաշալի էր մեկնարկել դաշտի տերերի համար՝ 16-րդ րոպեին Լուիս Սուարեսը բացել էր հաշիվը, սակայն մինչև ընդմիջում հենց Կազեմիրոյի անզգույշ գործողությունը թույլ տվեց հյուրերին վերականգնել հավասարությունը։ Առաջին խաղակեսի ավելացված ժամանակում Սուարեսի փոխանցումից հետո Նոա Ալենը կրկին առաջ մղեց «Ինտերին»։ Թվում էր, թե մայամցիները կպահեն առավելությունը, բայց 85-րդ րոպեին «Ռեալ Սոսիեդադի» նախկին կիսապաշտպան Բրայս Մենդեսը խփեց հյուրերի երկրորդ գնդակն ու փրկեց «Կոլամբուսին» պարտությունից։
Այս հանդիպումը նշանավորվեց նաև արգենտինացիներ Լիոնել Մեսսիի և Ռոդրիգո Դե Պաուլի վերադարձով, ովքեր խաղադաշտ դուրս եկան ԱԱ-2026-ից հետո ստացած հանգստից հետո։ Մեսսին, ում հավաքականը Մունդիալի եզրափակիչում 0։1 հաշվով զիջել էր Իսպանիային, փոխարինման մտավ 53-րդ րոպեին, իսկ Դե Պաուլն անցկացրեց ամբողջ հանդիպումը։ Այս անգամ արգենտինական դուետը արդյունավետ գործողություններով աչքի չընկավ։
Տեսանյութերը՝ ԱՅՍՏԵՂ
Այս ոչ-ոքիով ընդհատվեց «Ինտեր Մայամիի»՝ 6 խաղից բաղկացած հաղթական շարքը MLS-ում։ Թիմը վաստակած 38 միավորով շարունակում է զբաղեցնել 2-րդ տեղը Արևելյան կոնֆերենցիայում։
