Աշխարհի 2026 թվականի առաջնությունում Կաբո-Վերդեի հետ սենսացիոն ոչ-ոքիից (0:0) հետո Իսպանիայի հավաքականի ճամբարում ամենաքննարկվող թեմաներից մեկը Լամին Յամալի վիճակն էր։ Վնասվածքից ապաքինված և դաշտ վերադարձած «Բարսելոնայի» եզրային հարձակվողը խաղից անմիջապես հետո շտապել է հանգստացնել բոլորին:
SPORT պարբերականի հետ կարճ զրույցում Յամալը հայտարարել է. «Ամեն ինչ կատարյալ է»՝ հստակեցնելով, որ իրեն լավ է զգում և ոտքի հատվածում ոչ մի ցավ չի զգացել:
Այս կարճ, բայց հուսադրող արտահայտությունը զգալիորեն թոթափեց լարվածությունն Իսպանիայի հավաքականի գլխավոր աստղերից մեկի շուրջ: Սա չափազանց կարևոր նորություն էր թիմի համար, հատկապես այն ֆոնին, որ հանդերձարանում տրամադրությունն ամենևին էլ բարձր չէր:
Խաղից հետո երիտասարդ ֆուտբոլիստների դեմքերին ակնհայտ հիասթափություն էր նկատվում: Գավին, Նիկո Ուիլյամսն ու Դանի Օլմոն իրենց ժեստերով ցույց էին տալիս, թե որքան ծանր են ընդունել մեկնարկային տուրում միավորների կորուստը։ Այս բարդ պահին հենց Լամին Յամալն իր վրա վերցրեց ոչ պաշտոնական առաջնորդի դերը՝ փորձելով բարձրացնել թիմակիցների մարտական ոգին:
Դրական տրամադրվածություն էր փորձում պահպանել նաև դարպասապահ Ունաի Սիմոնը, ով հիշեցրեց, որ Աշխարհի առաջնությունը երկար մրցաշար է, և պետք է արժանին մատուցել մրցակցին, որը բարձր մակարդակի ֆուտբոլ ցուցադրեց: Սիմոնը հանդես եկավ որպես փորձառու առաջնորդ՝ կոչ անելով չկենտրոնանալ այս գայթակղության վրա:
Հանդիպումից հետո լրագրողների հետ շփման խառը գոտում վերջինը հայտնվեց Մարկ Կուկուրելյան: Պաշտպանն այնքան ուշ դուրս եկավ, որ մադրիդյան մամուլի ներկայացուցիչները (ովքեր հիմնականում լուսաբանում են «Ռեալն» ու ազգային հավաքականը) արդեն հեռացել էին։ Մադրիդի «Ռեալի» կողմից նրա տեղափոխության պաշտոնական հայտարարությունից հետո կատալոնացի ֆուտբոլիստը գլխավոր թիրախում էր, սակայն նա հմտորեն «շրջանցեց» մամուլին՝ հավանաբար գիտակցելով, որ այժմ գլխավորն Աշխարհի առաջնությունն է, իսկ ակումբային ֆուտբոլը պետք է մի կողմ դնել:
Մինչ իսպանացիները վերլուծում էին սխալները, Կաբո-Վերդեն տոնում էր: «Կապույտ շնաձկները» ոչ-ոքին նշում էին այնպես, կարծես տիտղոս էին նվաճել: Խաղավերջում նրանք պատվո շրջան կատարեցին մարզադաշտում՝ արժանանալով տրիբունաների մեծ մասի ծափահարություններին։ Գլխավոր հերոսն, իհարկե, 40-ամյա դարպասապահ Վոզինյան էր:
Արժանի է հիշատակման նաև Իսպանիայի գլխավոր մարզիչ Լուիս դե լա Ֆուենտեի պահվածքը: Նա արժանապատվորեն ընդունեց արդյունքը՝ առանց ավելորդ էմոցիաների և հրապարակային քննադատության, և անմիջապես ջերմորեն գրկախառնվեց Կաբո-Վերդեի մարզչի հետ: Դե լա Ֆուենտեն դեռ խաղից առաջ զգուշացրել էր, որ այս թիմը կարող է դառնալ մրցաշարի գլխավոր հայտնություններից մեկը:
