Իսպանական Լա Լիգայի 33-րդ տուրի շրջանակում կայացած «Բարսելոնա» — «Սելտա» հանդիպումն աչքի ընկավ ոչ միայն կատալոնական ակումբի հերթական հաղթանակով, այլև իսկական դրամայով։
«Սպոթիֆայ Կամպ Նոու» մարզադաշտում Խոսե Մարիա Սանչես Մարտինեսի գլխավորությամբ ընթացող խաղն ավարտվեց տանտերերի նվազագույն՝ 1:0 հաշվով հաղթանակով, սակայն գլխավոր և ամենացավալի մարզական իրադարձությունը Լամին Յամալի ստացած վնասվածքն էր։
Խաղի միակ գոլը հեղինակեց հենց 18-ամյա Յամալը՝ 40-րդ րոպեին անվրեպ իրացնելով 11-մետրանոց հարվածը։ Սակայն դրանից անմիջապես հետո երիտասարդ աստղը տապալվեց խոտածածկին։ Հանդիպման առաջին խաղակեսը վերածվեց իսկական փորձության և ունեցավ ռեկորդային տևողություն՝ ավարտվելով միայն 68-րդ րոպեին։
Պատճառը ոչ միայն Յամալին տրամադրվող երկարատև բժշկական օգնությունն էր, այլև այն հանգամանքը, որ տրիբունայում երկրպագուներից մեկի ինքնազգացողությունը կտրուկ վատացել էր, և պահանջվում էր բժիշկների հրատապ ու տևական միջամտությունը։ 45+9-րդ րոպեին Յամալը ստիպված եղավ լքել խաղադաշտը. նրան փոխարինեց Ռունի Բարդղջին։
Իսպանական հեղինակավոր Mundo Deportivo պարբերականն ահազանգում է, որ վինգերը կարող է բաց թողնել ոչ միայն մրցաշրջանի մնացած հատվածը, այլև ԱԱ-2026-ի մեկնարկը։ Ըստ աղբյուրի՝ խաղացողը վնասել է ձախ ոտքի ծնկատակի ջիլը, և եթե հետազոտությունը հաստատի կապանների խզում, ապա հետևանքները չափազանց ծանր կլինեն։
Միևնույն ժամանակ, լրագրող Ֆերան Մարտինեսը X սոցիալական ցանցում հայտնել է, որ մարզադաշտում արված նախնական զննման արդյունքում բժիշկներն ախտորոշել են ազդրի հետին մակերեսի մկանի ձգվածություն։ Վնասվածքի ստույգ բնույթը և ապաքինման հստակ ժամկետները հայտնի կդառնան հինգշաբթի՝ ապրիլի 24-ին նախատեսված խորացված բուժզննումից հետո։
Նշենք, որ ընթացիկ մրցաշրջանում Լամին Յամալը իսկական առաջատարի խաղ է ցուցադրել՝ բոլոր մրցաշարերում մասնակցելով 45 հանդիպման, դառնալով 24 գոլի և 18 գոլային փոխանցման հեղինակ։
Այս ծանր, բայց կարևոր հաղթանակից հետո «Բարսելոնան» վաստակած 82 միավորով շարունակում է վստահորեն գլխավորել Լա Լիգայի մրցաշարային աղյուսակը։ Վիգոյի «Սելտան» իր ակտիվում ունի 44 միավոր և զբաղեցնում է աղյուսակի միջնամասը։
Հաջորդ տուրում կատալոնացիները ապրիլի 25-ին արտագնա խաղում կմրցեն «Խետաֆեի» հետ, իսկ «Սելտան» մեկ օր անց սեփական հարկի տակ կընդունի «Վիլյառեալին»։
Lamine Yamal s’est blessé en tirant un penalty
C’est du jamais vu pic.twitter.com/LLaqwPL3Sn
— Kenpachi (@Kenpachi1070) April 22, 2026
Ի՞նչ է պատահել Յամալին և ինչո՞ւ է ընդհատվել խաղը. շոկային իրադարձություններ և սրտի կանգ տրիբունայում
Տեսանյութը՝ ԱՅՍՏԵՂ
Լա Լիգայի մրցաշարային աղյուսակն այս պահին
