Irish Examiner-ը ներկայացրել է հետաքրքիր բացիկ Երևանից՝ կիսվելով երկրպագուների տպավորություններով: Ահա թե ինչ է գրում իռլանդական պարբերականը․
«Այսօր դեպի մարզադաշտ 15 րոպեանոց զբոսանքը շատ ավելի գրավիչ է, քան 30 րոպեանոց ծանր ու հոգնեցուցիչ տաքսիով ուղևորությունը: Երկրպագուները ճանապարհին կանցնեն երկու բացօթյա շուկաներով, որոնցից մեկը հայտնի «Վերնիսաժն» է:
Երբ Երևանի փողոցները կեսօրին խցանված էին ծանր երթևեկությամբ, մեր տաքսու վարորդը հիացմունքով ցույց տվեց կողքով անցնող հին մեքենան:
«30 տարեկան է, բայց դեռ գնում է, – ասաց նա: – Կառուցված է երկար ծառայելու համար»:
Մենք չհարցրինք՝ արդյոք նրա գովեստը «Լադայի» հասցեին վկայում է ռուսամետ վերաբերմունքի մասին, բայց խորհրդային ժամանակների մեքենաները, ներառյալ «Վոլգան», դեռևս լցնում են այս հին քաղաքի փողոցները:
Ամեն ինչում «մեղավոր» է Ջենիֆեր Լոպեսը: Եթե չլիներ նրա համերգը «Հանրապետական» մարզադաշտում և դաշտին հասցված վնասը, Իռլանդիային պետք չէր լինի փոխել նախամրցաշարային մարզումների վայրը: Քաղաքի ծայրամասում գտնվող Հայաստանի ֆուտբոլի ֆեդերացիայի ակադեմիայի մարզադաշտ հասնելու համար նախատեսված չորս մղոն ճանապարհը վերածվեց մոտ 40 րոպեանոց տանջալից ուղևորության:
Իռլանդացի խաղացողներից շատերն արդեն ծանոթ էին այս համալիրին, որը հիշեցնում է Իռլանդիայի ֆուտբոլի ասոցիացիայի Էբոթսթաունի համալիրը, բայց ավելի բարձր որակի պայմաններով, որոնց մասին իրենք կարող էին միայն երազել կառավարության աջակցությամբ:
Իռլանդիայի երկու կենտրոնական պաշտպաններն այստեղ տարբեր հիշողություններ ունեն: Նաթան Քոլինզը 2019-ի նոյեմբերին այստեղ էր անցկացրել իր առաջին խաղը մինչև 21 տարեկանների ընտրանու համար: Նրա խաղընկեր Դարա Օ’Շին նույն խաղում կարմիր քարտ էր ստացել։
Նույն համալիրում երեք ամիս առաջ անցկացվել էր Իռլանդիայի մինչև 19 տարեկանների Եվրոպայի առաջնության առաջին հանդիպումը: Էնդրյու Օմոբամիդելեն խաղացել էր Նորվեգիայի դեմ, իսկ Ջո Հոջի գոլը մեկ միավոր էր բերել թիմին:
Իռլանդիայի ամենավստահ երկրպագուները Կովկասյան այս տարածաշրջանը լավ են ճանաչում վերջին 15 տարում Հայաստան և Վրաստան կատարած այցերից: Յոթ հարյուր երկրպագու հասել էր այստեղ՝ դիմանալով վեցժամյա թռիչքին՝ գիտակցելով, որ իրենց սպասում են արևադարձային եղանակ, էժան ուտելիք և խմիչքներ: «Յուրաքանչյուր կին, յուրաքանչյուր տղամարդ, միացեք Երևանի սիրուն», – երգում էին նրանք համերաշխությամբ՝ գլխավոր հրապարակին նայող տանիքի բարերից մեկում:
Հունիսին Լյուքսեմբուրգում կայացած ընկերական խաղը նման հմայք չուներ, սակայն այս արագընթաց արշավը երկրպագուներին ապահովել է գեղատեսիլ ճանապարհորդությամբ, որում հաջորդ ամիս ներառված է Լիսաբոնը, իսկ նոյեմբերին՝ Բուդապեշտը:
Այսօր դեպի մարզադաշտ տանող ճանապարհին երկրպագուները կրկին կանցնեն երկու բացօթյա շուկաներով, որոնցից մեկը «Վերնիսաժն» է: Այստեղ վաճառվում են հայկական ավանդական արհեստագործական իրեր՝ ձեռագործ գորգեր, յուրօրինակ զարդեր, փայտե իրեր և նույնիսկ խորհրդային դարաշրջանի հուշանվերներ, եթե ինչ-որ մեկին դա հետաքրքրում է:
Երեք տարի առաջ՝ Իռլանդիայի վերջին այցի ժամանակ, Երևանի փողոցներում տեղի ունեցող քաղաքական բողոքի ակցիաների աղմուկը խլացնում էր տեղի բնակիչների հաղթանակի տոնակատարությունները: Այդպիսի երևույթները սերունդներ շարունակ սովորական են եղել այստեղ, ներառյալ ընդամենը յոթ տարի առաջ տեղի ունեցած Թավշյա հեղափոխությունը:
Հիմա Դոնալդ Թրամփը հանդես է գալիս որպես խաղաղարար Հայաստանի և Ադրբեջանի միջև լարված հարաբերություններում: Վաշինգտոնում նա վերջերս անցկացրեց գագաթնաժողով՝ մեկնարկելով «Թրամփի ուղի» նախագիծը, որը պետք է միացնի Ադրբեջանի մայրցամաքային մասը Նախիջևանի էքսկլավի հետ՝ Հայաստանի տարածքով: Հայաստանի վարչապետ Նիկոլ Փաշինյանն այս շաբաթ աննախադեպ քայլով ուղևորվեց Ադրբեջանի օդային տարածքով՝ հաշվի առնելով Բաքվի ոչ պաշտոնական արգելքը հայկական ինքնաթիռների համար:
Մենք ապրում ենք փոփոխվող ժամանակներում, բացառությամբ «հավատարիմների» մեքենաների ընտրության:
