«Սանտոսի» բրազիլացի հարձակվող Նեյմարը զարմացրել է ֆուտբոլային հանրությանը՝ լրագրողների հետ զրույցում խոստովանելով, որ չգիտի՝ ով է Ֆլորիան Վիրցը։
Լևերկուզենի «Բայերի» կիսապաշտպանը նախորդ մրցաշրջանում փայլուն հանդես եկավ և համարվում է Բունդեսլիգայի ամենավառ աստղերից մեկը։ Սակայն, ըստ երևույթին, նա դեռ հայտնի չէ ճանաչված բրազիլացու համար։
«Գիտե՞մ, թե ով է Ֆլորիան Վիրցը։ Ո՛չ, չգիտեմ։ Մուսիա՞լան… Ա՛հ, Ջամալ Մուսիալան՝ այո։ Հզոր ֆուտբոլիստ է, շատ լավն է։ Կարծում եմ՝ ապագայում նա կդառնա աշխարհի մեծագույն խաղացողներից մեկը»,– ասել է Նեյմարը SkySport-ի հետ զրույցում։
Посмотреть эту публикацию в Instagram
22-ամյա Վիրցը 2024/25 մրցաշրջանում մասնակցել է 45 հանդիպման՝ խփել 16 գոլ և կատարել 15 գոլային փոխանցում։ Transfermarkt-ը գերմանացու տրանսֆերային արժեքը գնահատում է 140 միլիոն եվրո։
Ֆուտբոլիստի նկատմամբ հետաքրքրություն են ցուցաբերում մի շարք եվրոպական թոփ ակումբներ։ Լուրերի համաձայն՝ «Լիվերպուլը» արդեն քայլեր է ձեռնարկում նրա տրանսֆերը կազմակերպելու համար, մինչդեռ «Մանչեսթեր Սիթին» և Մադրիդի «Ռեալը» ևս ուշադիր հետևում են խաղացողի շուրջ ստեղծված իրավիճակին։
