«Ինտերի» նախկին խաղացող Ֆրեդի Գուարինը խոսել է ալկոհոլի հետ ունեցած խնդիրների մասին, հայտնում է Bild-ը։ Նա խոստովանել է, որ սկսել է շատ խմել, երբ դեռ խաղում էր Իտալիայում «Ինտերում», իսկ կորոնավիրուսային համաճարակի սկսվելուց հետո նա ամբողջովին հատեց բոլոր սահմանները։
«Գիշերը 50, 60 կամ 70 գարեջուր էի խմում։ Դժվար օրեր էին։ Երբ համաճարակը սկսեվեց ոչ թիմ ունեի, ոչ ֆուտբոլ խաղալու ցանկություն ու ոչ էլ վախ: Ես լիովին հիասթափված էի ինքս ինձանից․ ես ադրենալին էի ուզում: Սակայն չէի գիտակցում այդ ամենի ռիսկերը»,- ասել է Գուարինը:
Այնուհետև, 2020 թվականին, Ֆրեդին կարող էր նույնիսկ մահանալ՝ փորձելով ցած նետվել 17-րդ հարկի պատուհանից: Միայն պատուհանի ցանցը, որը նա չի նկատել, խանգարել է նրան ճակատագրական ցատկ կատարել։
Այժմ Գուարինը վերադարձել է Կոլումբիա, որտեղ հատուկ կենտրոնում վերականգնողական փուլ է անցել։ Այժմ նա նպատակ ունի դառնալ մարզիկների շրջանում ալկոհոլիզմի դեմ պայքարին ուղղված ծրագրի դեսպան և դրա հետ այցելել ԱՄՆ։
Նշենք, որ Գուարինը ժամանակին համարվում էր կոլումբիական ֆուտբոլի գլխավոր հույսերից մեկը, նա նույնիսկ 2011 թվականին «Պորտուի» հետ հաղթեց Եվրոպայի լիգան։
