Այս չորեքշաբթի՝ նոյեմբերի 14-ին Արաբական Միացյալ Էմիրություններում տեղի է ունեցել նշանավոր իրադարձությունը, որն ուրախացնելու է ամբողջ աշխարհի ֆուտբոլասերներին։
Մադրիդի «Ռեալը» պաշտոնապես բացել է իր թեմատիկ այգին, որը, ըստ ղեկավարության, դարձել է ամենաառաջինն աշխարհում։
Դուբայում տեղակայված «Real Madrid World» այգին զբաղեցնում է մոտ վեց հեկտար տարածք՝ առաջարկելով այցելուներին ավելի քան 40 ատրակցիոններ, որոնք ներշնչված են մադրիդյան ակումբի հարուստ պատմությամբ և ձեռքբերումներով։ Պարկի եզակի առանձնահատկություններից են աշխարհի ամենաբարձր «թռչող աթոռներով» կարուսելը և Մերձավոր Արևելքի առաջին փայտե տիեզերական գնացքը։
Բացման արարողությանը մասնակցում էին «արքայական ակումբի» լեգենդ, Բրազիլիայի հավաքականի նախկին ֆուտբոլիստ Ռոբերտո Կարլոսը, ինչպես նաև ակումբի ինստիտուցիոնալ հարաբերությունների տնօրեն Էմիլյո Բուտրագենյոն։ Միջոցառման շրջանակում անցկացվել է նաև մարզումային դասընթաց ավելի քան 100 երեխաների համար, որոնք ընդգրկված էին ակումբի բարեգործական գործընկեր «Ռեալ Մադրիդ» հիմնադրամում։
Բացի հետաքրքիր ատրակցիոններից, «Ռեալ Մադրիդի» երկրպագուները կարող են հավաքվել այգում՝ իրենց սիրելի թիմի խաղերը ուղիղ հեռարձակմամբ դիտելու համար։ Նշենք, որ չնայած պաշտոնական բացումը տեղի ունեցավ չորեքշաբթի օրը, այգին այցելուներին սկսել էր ընդունել դեռևս այս տարվա ապրիլին՝ «փափուկ մեկնարկի» շրջանակում։
«Real Madrid World»-ը հանդիսանում է Dubai Parks and Resorts համալիրի մաս, որտեղ տեղակայված են մի քանի թեմատիկ և ջրային այգիներ։ Գլխավոր տեսարժան վայրերից են Hala Madrid Coaster տիեզերական գնացքը և Stars Flyer ատրակցիոնը, որը կոչում են «աշխարհի ամենաբարձր պտտվող ատրակցիոնը»՝ 140 մետր բարձրությամբ։
Այգում իսկական մադրիդյան մթնոլորտ ստեղծելու համար տեղադրվել է Սիբելեսի շատրվանի ճշգրիտ կրկնօրինակը՝ Մադրիդի հայտնի վայրը, որտեղ թիմը ավանդաբար նշում է իր հաղթանակները։ Բացի այդ, այցելուները կարող են վայելել իսպանական խոհանոցի ուտեստները Hala Madrid ռեստորանում՝ ընկղմվելով արքայական ակումբի մշակույթի և ավանդույթների մեջ։
